Собранискиот спикер Џафери во официјална посета на Словенија


Скопје, 11 февруари, 2019 - 9:39 (META) 

Претседателот на Собранието, Талат Џафери, престојува во официјална посета на Република Словенија каде ќе се сретне со претседателот на Државниот Збор на Република Словенија, Дејан Жидан.

Џафери ќе има средби и со претседателот на Република Словенија Борут Пахор и претседателот на Владата, Марјан Шарец.

Покрај тоа, собранискиот спикер ќе се сретне со членовите на Комитетот за надворешна политика, Комитетот за ЕУ работи, Комитетот за одбрана, Групата на пријателство со Република Македонија и со министерот за надворешни работи на Република Словенија.

Во Програмата за посета е предвидено и обраќање пред пратениците на Државниот Збор и средба со координаторите на пратеничките групи.

Во состав на Делегацијата предводена од претседателот на Собранието ќе бидат и членовите на пратеничката група за соработка со Парламентот на Република Словенија, Фросина Ташевска – Ременски, потпретседател на Собранието на Република Македонија и член на групата за соработка Нада Ципушева, претседател на Групата за соработка со Парламентот на Република Словенија и Шпреса Хадри, исто така член на групата за соработка.


Советникот од Германија кој ќе помага во реформите, ќе пристигне на крајот на месецот


Берлин, 6 февруари, 2019 - 14:59 (META) 

Вицепремиерот задолжен за економски прашања, Кочо Анѓушев, како копретседавач на Мешовитиот управувачки комитет помеѓу нашата земја и СР Германија, денеска е во еднодневна посета во Берлин.

Според Анѓушев, Германија е земјата во која што најмногу може да се научи за економијата и индустријата и токму поради тоа е формиран Мешовитиот управувачки комитет помеѓу двете влади.

„Денес имавме работна средба на која договоривме многу работи пред се’, договоривме кога ќе дојде советникот од германската влада во Република Македонија. Тоа ќе се случи кон крајот на февруари годинава, а се работи за искусен професионалец од Германија кој се надеваме ќе даде голем придонес кон нашите структурни реформи и едукацијата на нашата администрација во полето на пристап кон фондовите од ЕУ кои Македонија ќе има право да ги користи во следниов период. На тој начин, сметам дека ќе стекнеме квалификации за тоа како подобро да ги искористиме европските фондови во интерес на нашите граѓани за реализација на инфраструктурни проекти, како и за сите останати делови од економијата“, рече Анѓушев.

Со Германија лани остваривме нов рекорд во трговската размена што изнесува околу четири милијарди евра.

„Што се однесува до реалните проекти, со помош на Мешовитиот управувачки комитет и финансиските институции во Германија ќе обезбедиме средства, кои што ќе ги договориме во рамки на овој Комитет, за реализација на инфраструктурни проекти на комерцијална основа, а притоа ќе добиеме и одредени грантови преку редовните фондови на Европската унија“, додаде Анѓушев.


Заев – Борисов: Oтвораме перспективи за засилена економска соработка


Софија, 5 февруари, 2019 - 9:27 (META) 

Премиерот Зоран Заев за време на работната посета на Бугарија, остварил тет-а-тет средба со премиерот Борисов, со кого разговарале за идната соработка помеѓу двете земји, која после потпишувањето на Договорот за пријателство и добрососедство бележала постојан раст во сите области. На средбата се разгледувале можности за создавање услови за зголемување на трговската размена со взаемно намалување на царинските стапки.

„Премиерите Заев и Борисов разговараа и за подготовките за втората меѓувладина седница која оваа година треба да се одржи во Бугарија, а заеднички бизнис-форум, што се одржа во Скопје го оценија како дополнителен импулс за економската соработка како врвен приоритет на граѓаните и на бизнис заедниците на двете земји. На средбата беше констатирано дека прекуграничната соработка се интензивира и дека ќе бидат вложени сите неопходни напори стабилната трговска размена од речиси 600 милиони евра да достигне вредност од 1 милијарда евра“, се вели во соопштението на Владата.

Во него се додава дека „континуитетот на изградбата на патната и железничката инфраструктура на Коридорот 8 остануваат капитален интерес за двете земји“.

„Рехабилитацијата и градењето на железничката пруга е капитален проект од вкупна вредност од 670 милиони евра, а патната инфраструктура 93 милиони евра. 120 милиони евра се неповратни средства односно грантови од Западно-балканскиот инвестициски фонд, односно од ЕУ. Со исто толкаво внимание двете земји работат и на поврзување на гасната инфраструктура, и заедничко учество во регионални проекти и мрежи на гасна интерконекција“, се додава во соопштението.

Двајцата премиери присуствувале и на свеченото потпишување на заедничката Програма за соработка во областа на културата меѓу двете земји до 2021 година, како потврда на добрата волја и интересот за интензивирање на комуникацијата, размена на искуства и афирмација на културните вредности на двете земји.

Во насока на спроведување на Договорот за пријателство и добрососедство, премиерот Заев соопштил дека како резултат на работата на двете комисии за заедничко одбележување на историски настани и личности, наскоро во Македонија, во близината на Дојран, на местото каде што го загубил животот, ќе биде подигнат споменик на полковник Константин Каварналиев, бележит лик од историјата на Бугарија од периодот на Првата светска војна.


Директорите на Бордот на ЕБОР во посета на Македонија од 5 до 8 февруари


Скопје, 4 февруари, 2019 - 11:58 (META) 

Делегација на Бордот на директори на Европската банка за обнова и развој (ЕБОР) ќе пристигне во Скопје во четиридневна посета на Македонија, при што ќе оствари средби со претставници од Владата на државно ниво. Директорите ќе се сретнат и со претставници од меѓународните институции, граѓанското општество, инвеститори и претприемачи.

„Посетата се остварува како подготовителна активност за новата стратегијата на ЕБОР за Македонија од 2019 до 2023 година. Целта е да се договорат приоритетите на македонската влада и да се идентификуваат клучните области каде ЕБОР може да се ангажира, за да се интензивира деловниот и политичкиот дијалог“, се вели во соопштението.

ЕБОР има инвестирано над 1,8 милијарди евра во 113 проекти во Македонија, фокусирајќи се на поддршка на интеграцијата на земјата во регионалните и глобалните пазари.

„Банката и понатаму ја интензивира политичката ангажираност во регионот и ќе биде домаќин на третиот Инвестициски самит за Западен Балкан, каде шест премиери од регионот ќе бидат гости на Банката во ЕБОР Лондон. Оваа година, Годишното собрание на ЕБОР ќе се одржи во Сараево на 8 и 9 мај 2019“, се додава во соопштението.


Димитров од 16 до 18 јануари во посета на Турција


Скопје, 16 јануари, 2019 - 9:57 (META) 

Министерот за надворешни работи, Никола Димитров од 16 до 18 јануари ќе престојува во работна посета на Турција, информираат од МНР.

Димитров ќе се сретне со својот турски колега Мевљут Чавушоглу, со министерот за одбрана, Хулуси Акар како и со други високи државни претставници на Турција. Тој ќе има средба и во Големото народно Собрание на Република Турција.

„Во фокусот на средбата со министерот Чавушоглу, ќе биде зајакнувањето на севкупните билатерални односи, унапредувањето на заемната соработка, како и размената на ислења за повеќе актуелни регионални прашања. Се очекува, министрите Димитров и Чавушоглу да го потпишат Меморандумот за соработка меѓу министерствата за надворешни работи на Република Македонија и Република Турција за соработка во областа на информатичките технологии и дипломатските архиви“, соопштуваат од МНР.


Таравари во Брисел на средба со Хан и тројцата европратеници


Брисел, 9 јануари, 2019 - 12:09 (META) 

Генералниот секретар на Алијансата за Албанци и градоначалник на Гостивар Арбен Таравари, денеска отпатува на официјална посета во Брисел.

Како што соопштија од партијата, во текот на дводневниот престој, Таравари ќе има средби со високи претставници на институции на ЕУ, како и со поддржувачи на Македонија на патот кон ЕУ и НАТО интеграциите, како што се европскиот комесар за соседство и проширување Јоханес Хан и со европратениците Флекенштајн, Кукан и Вајгл.

„Агендата на средби ќе биде фокусирана околу последните политички случувања во земјата, со посебен акцент на уставните промени и на веќе познатите ставови на Алијансата за Албанците за потребата на унапредување на уставната положба на Албанците, како клучен фактор за градење на мултиетничко, демократско и вистинско европско општество“, се вели во соопштението.


Папата Франциск на 7 мај ќе ја посети Македонија


Скопје, 13 декември, 2018 - 12:20 (META) 

Владата соопшти дека Папата Франциск ќе ја посети Македонија на 7 мај следната година, откако бил поканет од државната власт.

Засега со сигурност се знае дека римокатоличкиот поглавар ќе го посети Скопје, родниот град на света Мајка Тереза. За останатите детали од посетата, Владата ќе инфомира кога ќе се прецизираат деталите.

Папата Франциск во Македонија ќе стаса од Бугарија, каде ќе биде во дводневна посета, а ќе ги посети главниот град Софија и гратчето Раковски.


Груби во САД на средби во Конгресот и Стејт Департментот


Вашингтон, 5 декември, 2018 - 12:16 (META) 

Претседателот на Комисијата за европски прашања и на Групата за пријателство со САД, Артан Груби ќе престојува во Соединетите Американски Држави од 5 до 9 декември, каде што ќе реализира работни средби со конгресмени и сенатори во Американскиот Конгрес, но и во Сенатот и Стејт Департментот, информираат од собраниските служби.

На средбите, како што стои во соопштението, ќе стане збор за евроатланските интеграции на земјата, можностите за унапредување на билатералните односи со САД, како и за актуелните реформи што Владата ги прави во областа на владеењето на правото.

Груби ќе присуствува на 12. Парламентарен безбедносен форум за разузнавање во Сенатот на кој ќе се расправа за сите видови на борба против тероризмот.

Ова е втора посета на Груби во САД.


Метју Палмер во понеделник во посета на Македонија


Скопје, 19 октомври, 2018 - 10:10 (META) 

Американскиот заменик помошник државен секретар за европски прашања Метју Палмер, в понеделник ќе престојува во посета на Република Македонија, информираа од Американската амбасада на нивните социјални мрежи.

„Заменикот помошник државен секретар Метју Палмер ќе допатува во Македонија во понеделник, 22 октомври, на разговори околу поддршката на САД за Договорот од Преспа помеѓу Македонија и Грција, и важноста да се продолжи со реформската агенда на Македонија. Тој ќе се сретне со претставници на Владата и политичките партии, меѓу кои и премиерот Зоран Заев и министерот за надворешни работи, Никола Димитров“, велат од Амбасадата.


Даути: Политичката стабилност е клучнa за зголемување на ивестициите низ ТИР-зоните


Тетово, 17 октомври, 2018 - 13:06 (META) 

Министерот без ресор задолжен за странски инвестиции Бардиљ Даути, денеска оствари средба со дел од раководството на Технолошко индустриската развојна зона (ТИРЗ) во Тетово. Целта на посетата беше запознавање со работата и состојбата во зоната.

Даути потенцираше дека политичката стабилност е клучен показател за зголемување на инвестиции низ ТИР-зоните во Македонија.

-Како Влада, интензивно работиме за надминување на лошата политичка атмосфера што постои во моментот околу решавањето на проблемот со името. Колку побрзо се надмине оваа состојба, толку попозитивно ќе има влијание за нови инвестиции не само за ТИРЗ Тетово, туку и воопшто во Македонија – истакна Даути.

Директорот на ТИРЗ Тетово пак, Арбен Халили информираше дека компанијата „Лас плекс“ е нова инвестиција во зоната која ќе работи со изработка на стакло. Халили рече дека на средбата со Даути го информирал за досегашната работа на ТИР-зоната и отвореноста кон странски и домашни инвестиции. На средбата заклучиле дека потребна е рамномерна распределба на инвеститорите низ зоните во Македонија, за сите региони да имаат можност за развој и вработувања.