Одѕивот на гласачите на парламентарните избори до 9 часот бил 4, 45 отсто, додека на претседателските избори 4,17 отсто. Според податоците на Државната изборна комисија, најмалата излезност за парламентарните избори до 9 часот е во Изборната единица број 6, каде одѕивот на граѓаните е 2,62 отсто. Во општините Боговиње и Врапчиште, одѕивот на гласачите бил под 2 отсто, односно 1,43 или 1,61 отсто. Во Желино е 2,11, а во Кичево 2,58 излезност до 9 часот.
Во овие општини е најмал одѕивот и за претседателските избори, Боговиње со 0,57 отсто, Врапчиште 0,84, Желино 1,10, Кичево 2,88 отсто до 9 часот. Малку избирачи излегле и во Сарај, 1,61 отсто и во Струга, 1,93 отсто.
„Споредбено со вториот круг од претседателските избори од 2019 година се бележи намалување на излезноста од 1,99 на овие избори“, соопшти претседателот на ДИК Александар Даштевски.
Најголема излезност до 9 часот за парламентарните избори има во Изборната единица број 3, 6,42 отсто, следува Изборната единица 4 со 5,77 отсто и Изборната едница 1 со 4,83 отсто. Најголемата излезност била во општината Кривигаштани каде гласале 9,46 отсто од гласачите.
Најголема излезност за претседателските избори има во Демир Капија, 10,42, Крива Паланка, 9,81, Пробиштип 9,12 отсто и Македонски Брод 8,93 отсто.