!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Чешкото МВР бара граѓаните да можат да пукаат во терористи


Прага, 3 јануари, 2017 - 13:34 (META) 

Чешкото министерство за внатрешни работи предложило измени во уставот со кои на граѓаните на земјата, кои легално поседуваат оружје, би им се овозможило да го искористат и да пукаат во терористи, јавуваат агенциите.

„Во време кога се изведуваат напади во Европа, имаме впечаток дека уставот на граѓаните треба да им даде поголемо право да се бранат, но со легално набавено оружје“, изјавил чешкиот министер за внатрешни работи, Милан Хованец, за денешното издание на „Хосподаржски новини“.

Чешка не се согласува со барањата на Европската Унија за ограничување на можноста за поседување на некои видови огнено оружје, а чешкото МВР поднело предлог за измени на уставот со кои Чесите што легално поседуваат оружје, би можеле самоиницијативно да го употребат за одбрана на земјата и да спречат терористички напади како тие во Париз, Ница или неодамнешниот во Берлин.

Според чешкото МВР, право да пукаат во терорист во случај на напад, дури и кога самите не се загрозени, би добиле само чешките државјани и тоа само на територијата на Чешка. Евентуални измени не би се однесувале на граѓаните на ЕУ кои престојуваат во Чешка.


„Лавиринт“ од Ристо Лазаров објавена на чешки јазик


Прага, 20 декември, 2016 - 14:44 (META) 

Осум години по објавувањето на книгата поезија „Чехопек“, во Чешка е објавена втора книга од македонскиот поет Ристо Лазаров, стихозбирката „Лавиринт“, создадена во формат по кој е препознатлив овој поет – седум циклуси по седум песни.

Песните на чешки ги преведе академик Иван Доровски, кој е автор и на предговорот на книгата, како и на биографијата и на библиографија на Лазаров. Ликовното решение на корицата на книгата е на Дагмар Доровски.

Издавач на ова втора поетска книга на Ристо Лазаров, кој инаку е член на чешкиот ПЕН-центар, е издавачката куќа „Теибуна ЕУ“.

Наскоро во Белград се очекува и објавување на неговата најнова стихозбирка „Мрак“ на српски јазик.


Герила-акција на натпреварот Македонија – Чешка


Скопје, 15 јуни, 2016 - 21:29 (META) 

„Шарената револуција“ вечерва изведе нова герила-акција на ракометниот натпревар на репрезентациите на Македонија и на Чешка.

Демонстрантите, за време на натпреварот во салата „Борис Трајковски“, извадија транспарент на кој беше испишана пораката „Шутка не ти гине Никола“.

Вечерва се одигрува реванш-мечот од квалификациите за Светското првенство во ракомет, кое треба да се одржи следната година во Франција.


Иванов – Земан: Размената на туристи е празнина која треба да се пополни


Охрид, 10 јуни, 2016 - 13:23 (META) 

Традиционално добрите пријателски односи меѓу Македонија и Чешка треба да ги следат и бизнис-заедниците на двете држави, а исклучително позитивната политичка и културна соработка да биде насока за понатамошно интензивирање и унапредување на релациите и во областа на економијата. Ова денеска на учесниците на Македонско-чешкиот бизнис-форум, што се одржува во Охрид, им го порача претседател на Република Македонија, Ѓорѓе Иванов.

– Особено значајна за двете држави е соработката во енергетскиот сектор, обновливите ресурси, развојот на малите хидроцентрали, ветерните електрани, сончевата енергија, геотермалните технологии, рударството. Посебен интерес постои и во областа на металната и на електроиндустријата, во автомобилската индустрија за поврзување на македонските производители со чешки компании, хемиската индустрија, животната средина, земјоделството, прехранбената индустрија и во туризмот – рече Иванов.

Чешкиот претседател Милош Земан, воодушевен од убавините на Македонија, особено на Охрид, изрази отворено жалење што во моментов нема организирани туристички посети на чешки гости во нашата земја.

– Целта на активностите и на бизнисмените и на политичарите е да ги увидат празнините во соработката. Македонија е прекрасна земја, а доколку се има предвид дека туризмот е индустрија, тука постои празнина што треба да се пополни – рече тој.

Истовремено, Земан критички се осврна на недоволно искористените можности за чешки инвестиции во Македонија, забележувајжи дека тоа е пропуст на двете држави, притоа посочувајќи примери на конкретни парадоксални административни и бирократски пречки.

– Убеден сум дека оваа моја посета на Македонија ќе помогне во насока на пополнување на празнините што ги посочив. Веќе соработуваме во областа на хидроенергетскиот сектор. „Хидропол“ веќе има изградено седум хидроцентрали во Македонија, што е добар почеток. Оттаму, искрено се надевам дека и денешниот собир ќе резултира со нови бизнис-договори, во духот на меѓусебно пријателство – рече Земан.

 


Милош Земан в четврток во посета на Македонија


Скопје, 5 јуни, 2016 - 13:28 (META) 

Чешкиот претседател Милош Земан в четврток ќе ја посети Македонија и ќе биде примен од неговиот колега, Ѓорѓе Иванов.

Според најавите, една од темите на кои ќе разговараат двајцата претседатели ќе биде миграциската криза. Македонија, како што е познато, е дел од балканската рута на мигрантите од Африка и од Азија на нивниот пат кон земјите на Европската Унија. Чешка во екот на кризата испрати неколку десетици полицајци како помош за Македонија на границата со Грција.

„По средбата, Земан би требало да добие македонско државно одликување, а Иванов, за возврат, чешко одликување нема да добие“, изјави портпаролот на шефот на чешката држава Јиржи Овчачек, а пренесе чешката новинска агенција ЧТК.

Милош Земан при посетата на Македонија, ќе присуствува и на чешко-македонскиот бизнис-семинар и ќе го посети манастирот „Св. Наум“ во Охрид.


Чешката полиција врши евакуација во повеќе градови


Прага, 10 мај, 2016 - 13:48 (META) 

Припадници на чешката полицијата во поголем број се распоредени во десетина градови во земјата, вклучувајќи ги главните железнички станици и административните седишта во Прага, Прадубицам и во Плзен, по дојава за бомба која, според повикувачот, ќе експлодира попладне.

Полицијата евакуирала вработени и граѓани, кои по работа дошле во градската управа.

Возовите не возат до главната железничка станица во Прага, туку се насочуваат кон приградските железнички станици.


Чешка е подготвена да преземе бегалци директно од Турција


Прага, 8 март, 2016 - 19:44 (META) 

Чешка е подготвена да преземе бегалци директно од Турција и така да исполни дел од квотата од 4.800 бегалци, со што ќе го исполни претходно договореното прераспределување бегалци во земјите на ЕУ.

– Тоа не се нови квоти, никаков нов систем, туку едноставно ќе се искористат постојните обврски. Едноставно, наместо да земеме 20 или 30 Сиријци од Грција, ќе земеме 20 или 30 Сиријци од Турција. Тоа е единствената разлика – рече чешкиот премиер Бохуслав Соботка.

Чешкиот премиер изрази надеж дека најновиот план, кој допрва треба да биде усвоен на самитот на ЕУ на 17 март, ќе го сопре бегалскиот бран.


Спасовски очекува мудра одлука на ЕУ за мигрантската криза


Гевгелија, 26 февруари, 2016 - 16:02 (META) 

Ние ќе можеме да примиме толку бегалци колку што ќе можат да примат другите земји од западно-балканската рута, Србија, Хрватска и понатаму, изјави министерот за внатрешни работи, Оливер Спасовски, при денешната поста на Прифатниот центар „Вунојуг“ кај Гевгелија, со неговиот чешки колега, Милан Хованец.

Спасовски вели дека се очекува земјите членки на Европската Унија да донесат мудра и соодветна одлука за справување со мигрантската криза, која ќе го реши проблемот во самиот негов извор.

– Очекуваме дека ќе има мудра и соодветна одлука на Европската Унија, на земјите членки на Европската Унија, заради тоа што ние не можеме да бидеме решение сами по себе на овој проблем, заради тоа што не сме извор на проблемот. Бегалската криза мора да се решава од изворот на проблемот и да се создадат услови во државите од каде што потекнуваат бегалците за да можат да останат таму. Секое друго решение што се бара на оваа рута, не е решение – изјави Спасовски.


Прв случај на вирусот зика во Чешка


Прага, 25 февруари, 2016 - 12:37 (META) 

Министерството за здравство на Чешка соопшти дека во земјата е регистриран првиот случај на заболен од вирусот зика.

Уште не е јасно каде лицето од Чешка е заразено и дали патувало во земји како што е Бразил, која е најсилно погодена од вирусот што го пренесуваат комарците.

Повеќе детали, како што рекоа, за првиот случај на зика ќе бидат соопштени во текот на денот.

Светската здравствена организација на 1 февруари на меѓународно ниво објави вонредна состојба.

Таа предупреди на „сериозни сомнежи“ за поврзаноста на инфекцијата од вирусот зика со дефектите кај новороденчињата.

Аномалиите кај повеќе илјади деца родени во Бразил се поврзуваат со вирусот зика.


Попоски – Заоралек: Македонија нема да биде претворена во бегалски камп


Скопје, 10 февруари, 2016 - 12:24 (META) 

Македонија ќе ги исполни своите обврски во согласност со меѓународното право и ќе обезбеди сместување за сите основани баратели на азил во земјата, но нема да дозволиме да бидеме претворени во бегалски камп, изјави денеска шефот на македонската дипломатија, Никола Попоски, по средбата со министерот за надворешни работи на Чешка, Лубомир Заоралек.

– Ниту еден мигрант не е дојден во Македонија со падобран, туку се влезени на наша територија од земја-членка на ЕУ. Ќе обезбедиме хуман и безбеден транзит за сите, ќе ги примениме оние одлуки што се донесени на европско ниво, ќе соработуваме како што сме соработувале досега и со Грција и со сите други земји-членки кои ни помагаат, вклучително и со Чешката Република – рече Попоски.

На средбата, како што рече Попоски, освен за мигрантската криза, се разговарало и за евроатлантските интеграции на Македонија, како и за економската соработка меѓу двете земји.

Заоралек рече дека Чешка и понатаму ќе продолжи да го поддржува членството на Македонија во ЕУ и во НАТО и додаде неговата земјата е во групата пријатели на Македонија.

Шефот на чешката дипломатија, исто така, рече дека заедно со него е дојдена поголема група бизнисмени од Чешка, кои се заинтересирани да инвестираат во Македонија.