СДСМ: Мицкоски да каже дали е за НАТО и ЕУ или за одбрана на криминалот


Скопје, 14 август, 2018 - 10:17 (META) 

Христијан Мицкоски и ВМРО-ДПМНЕ се уште не се изјасниле за референдумот, немаат јасен став за најважните прашања за државата и граѓаните. Цела деценија ВМРО-ДПМНЕ зборуваше за референдум и право на граѓаните да го изберат патот по кој ќе се движи државата во иднина, а сега, кога референдумот е извесност немаат јасен став, велат во соопштение до јавноста од владејачката партија СДСМ.

„Тоа говори за несериозниот, неодговорен однос на оваа опозициона партија и нејзиното раководство кон граѓаните и иднината на државата. ЕУ и НАТО се нашата иднина. Секој што е за просперитетна иднина, со зачуван и зајакнат идентитет ќе го поддржи референдумот на кој граѓаните ќе го имаат последниот збор. Време е Мицкоски да докаже на дело за што е. Ако е за иднина на Македонија во НАТО и ЕУ треба да ги повика членовите на ВМРО-ДПМНЕ да излезат на референдум и да изберат иднина“, се вели во партиското соопштение.

Во спротивно, додаваат од СДСМ, Мицкоски ќе покаже дека лаже и дека всушност е за одбрана на криминалот на неговиот претходник, за изолација, назадување и неизвесност.


Мицкоски за референдумот: Погрешен одговор е полош отколку никаков одговор


Скопје, 13 август, 2018 - 15:18 (META) 

Има една максима која што вели дека погрешен одговор е полош отколку никаков одговор, изјави претседателот на опозициската ВМРО-ДПМНЕ на новинарско прашање дали ВМРО-ДПМНЕ ќе води кампања против референдумот или за бојкот на референдумот.

– Ако вие барате од ВМРО-ДПМНЕ да се изјасни тогаш ќе мора да причекате партијата да ги заврши сите овие консултации кои што ги најавивме и дури потоа ќе излеземе со официјален став а јавноста ќе биде благовремено известена. Трае акцијата „Лето за Македонија“, ВМРО-ДПМНЕ е континуирано на терен и меѓу граѓани. Разговараме со стотици граѓани на дневна основа, исто така ги консултираме партиските тела. Во периодот што следува ќе имаме состанок на Извршниот и Централниот комитет на партијата – рече Мицкоски.

Според лидерот на опозицијата на граѓаните им е потребна реформа во економијата, во образованието, здравството, а не им се потребни наместени тендери кои што се даваат на роднини и по пријателски линии.

– Сето она што денеска и се случува на Македонија претставува пораз и можам од оваа дистанца да кажам дека сето она што СДСМ го ветуваше, останува празно слово на хартија. Апелирам до сите политичари сложно да ја сфатат професијата политичар како волонтерска позиција затоа што неопходни се сериозни реформи пред се во самиот ментален склоп на политичарите – рече Мицкоски.

Според него, за кампањата за референдумот вели дека владата нема капацитет да се справи со еден ваков предизвик и смета дека јавноста многу брзо ќе биде сведок на уште едно големо фијаско кое што најверојатно ќе изобилува со криминали, полувистини и недоречени работи.

– Гледаме дека владата ја темели својата кампања дека го зачувала идентитетот, но еве ја прашувам владата како е зачуван идентитетот кога институционалниот идентитет ќе се изгуби. Станува збор за погрешна стратегија во целокупниот процес на водење преговори – додаде Мицкоски.


СДСМ: Христијан Мицкоски и ВМРО-ДПМНЕ да се изјаснат за референдумот


Скопје, 10 август, 2018 - 9:36 (META) 

Цела деценија, во секој јавен настап и во секоја своја програма ВМРО-ДПМНЕ тврдеше дека за решението на спорот со Грција граѓаните ќе го имаат последниот збор на референдум. Сега кога референдумот е извесен, кога е постигнат историски Договор кој носи членство во НАТО и ЕУ со зачуван идентитет, Мицкоски и ВМРО-ДПМНЕ немаат јасен став, велат од СДСМ преку соопштение до јавност.

„Христијан Мицкоски и ВМРО-ДПМНЕ треба да се изјаснат за референдумот и јасно да соопштат за што се. Дали се за светла иднина или за темно минато? Дали се членство во НАТО и ЕУ или амнестијата на криминалот им е поважна од се? Ако се за иднина, ако се членство на Македонија во ЕУ и НАТО раководството на ВМРО-ДПМНЕ треба да излезе и да ги повика своите членови да гласаат на референдумот. СДСМ заедно со сите политички субјекти и прогресивни сили кои се на страната на иднината, на страната на НАТО и ЕУ, ќе овозможи волјата на граѓаните да биде целосно испочитувана и реализирана“, велат од партијата.

На референдумот на 30 септември, додаваат од СДСМ, граѓаните ќе изберат светла иднина, ќе изберат членство во НАТО и ЕУ со зачуван и зајакнат идентитет граѓаните ќе кажат „да“ за македонската иднина.


Мицкоски до 10 септември ќе се изјасни за референдумот, од СДСМ велат дека е несериозен


Скопје, 8 август, 2018 - 9:53 (META) 

Претседателот на ВМРО-ДПМНЕ, Христијан Мицкоски во интервју за телевизијата „Канал 5“ вчера рече дека до 10 септември ќе соопшти дали ќе го повика членството да го бојкотира референдумот за името на 30 септември, или пак да гласа против или за. Тој исто така негираше дека неговата партија барала амнестија. На неговите тврдења реагираше СДСМ, порачувајќи дека сепак Мицкоски потврдил дека неговата партија барала амнестија на криминалот. Порача и дека

– Не е точно дека ВМРО-ДПМНЕ нема став по ова прашање. Во минатото во многу наврати го има кажано и повторено својот став што се однесува на принципот за промена на Уставот а со цел промена на уставното име. Впрочем кампањата за референдумот почнува на 10 септември. Дотогаш се надевам дека оваа акција ќе трае така што јавноста благовремено ќе биде информирана за сите чекори на ВМРО-ДПМНЕ – рече Мицкоски за референдумот.

Во интервјуто тој порача дека тврдењата на власта за наводно барање на амнестија од страна на опозицијата се лага. Тој рече дека со ваквите тврдења  кореспондираат со криминалите и скандалозните тендери кои ја тресат владата на СДСМ, а со тврдењето за барање на амнестија Заев и СДСМ се обидуваат да го оттргнат вниманието на јавноста од актуелните скандали.

-Овој дел кој што вие мене ме прашувате коинцидира со периодот исполнет со многу афери во јавноста, коруптивни како што се на пример доделувањата на оние грантови преку оној криминален Фонд за иновации. Потоа тука се оние криминални тендери кои што ги добиваат фирми формирани пред 6-7 дена пред да аплицира на тендер, еве гледаме, сведоци сме како се злоупотребува државен имот за приватни цели. Од прилика тоа беше еден груб обид да се сврти вниманието на јавноста од реалните теми кон некои други теми – рече Мицкоски.

Од СДСМ велат дека Мицкоски директно одбил да одговори на новинарско прашање и со тоа потврдил дека единствено за што се залага партијата е амнестија на криминалот.

„Македонија му кажа збогум на криминалот и црното минато, сега чекори кон ЕУ и НАТО, а таму важат поинакви вредности и правила од оние за кои се залага ВМРО-ДПМНЕ. Сите политички чинители кои се за македонската иднина се одлучни и обединети, освен Мицкоски и тесното партиско раководство на ВМРО-ДПМНЕ кои сакаат назад во темното минато на криминал, насилство и неказнивост. На Мицкоски веќе треба да му е јасно дека амнестија за криминалците нема да има, секој ќе одговара согласно законите“, порача СДСМ.

Партијата вели дека „без разлика на неодговорност однесување на ВМРО-ДПМНЕ, граѓаните на Македонија, на 30 септември, ќе ја искористат историската шанса за напредок“.

„Прашањето на референдумот е јасно и едноставно – иднина или изолација. Доколку Христијан Мицкоски има малку одговорност и сериозност, јавно ќе излезе и ќе каже за која опција навистина е. Обединети се сите политички партии кои навистина се за ЕУ и НАТО, а само Мицкоски и раководството на ВМРО-ДПМНЕ се изолирани и се против интергација, во обид да одбранат криминал“, велат од СДСМ.

На интервјуто реагираше и Граѓанско демократска унија (ГДУ), која порача дека со одлагањето да изнесе цврст став за референдумот, Мицкоски се однесува непринципиено и крајно несериозно.


Мицкоски: За каква сплотеност говорат кога на сила туркаат референдумско прашање


Струга, 2 август, 2018 - 14:28 (META) 

Гледаме како премиерот и естаблишментот околу него силно се удираат во гради дека биле за Европската унија, а демек сите ние останати кои што не ја споделуваме нивната капитулација не сме биле за ЕУ.  Од една страна имаме премиер кој заедно со својот естаблишмент, за да го сокрие своето минато и за да може да ги покрие сите оние работи кои ги прави заедно со луѓето околу него, го покриваат со една реченица, ние сме за ЕУ. Не, ЕУ не почитува такви вредности.

Ова денеска го порача лидерот на ВМРО-ДПМНЕ, Христијан Мицкоски во своето обраќање по повод празникот Илинден, во струшкото село Ташмаруништа.

„ЕУ се брани од таков тип на политичари. Тоа е мојата порака. И затоа ќе им порачаме од овде, колку повеќе се удираат во градите и велат ДА, толку повеќе вие и сите оние луѓе во Македонија ќе им кажат едно големо и громогласно НЕ. Доста е!“, порача Мицкоски.

Тој праша „за каква сплотеност се говори кога на сила без консултации туркааат референдумско прашање за смена на името.“

„Вистинската сплотеност треба да започне преку одбрана за државните и национите интереси, и тука доколку се согласи СДСМ секогаш ја имало нашата подадена рака затоа што Македонија е пред и над  се, не треба тоа да го заборават ниту тие, ниту ние, а ниту секој граѓанин во нашата Македонија“, додаде Мицкоски.


Мицкоски на Палмер му се пожалил дека власта избегала од компромис


Скопје, 1 август, 2018 - 19:08 (META) 

Претседателот на ВМРО-ДПМНЕ Христијан Мицкоски денеска на средбата, заедно со партиска делегација, со заменикот-помошник државен секретар на САД за Европа и Евроазија Метју Палмер, порачал дека државата, граѓаните и надворешните пријатели на Македонија „стануваат заложник на неодговорна и непринципиелна политика на политичкиот естаблишмент на власта, како и креираните очекувања кои сега не се во состојба да ги реализираат“, соопшти ВМРО-ДПМНЕ.

Мицкоски рекол дека „е неодговорно и антидемократски е што власта се одлучи на чекор да заобиколи компромис и одби да ги прифати аргументите на опозицијата во однос на формулирањето на референдумското прашање, кое треба да биде производ на општ консензус, а не едностран акт на парламентарното мнозинство“.

Претседателот на ВМРО-ДПМНЕ порачал дека со тоа се  нарушуваат демократските процеси.

Сепак, на средбата и двајцата соговорници се согласиле дека евроатлантската интеграција е единствениот пат за Македонија кон иднината.


Мицкоски: Јас сум за иднина во која нема да се „проституираме“ како народ и држава


Скопје, 1 август, 2018 - 9:42 (META) 

Лидерот на ВМРО-ДПМНЕ, Христијан Мицкоски на неговиот фејсбук-профил напиша дека тој е за иднина во која Македонија ќе ја водат принципиелни, чесни и од збор луѓе, а не аболицирани политичари, иднина во која политичарите што бараат мито ќе одат во затвор.

„Иднина во која нема да се проституираме како народ и држава, затоа што уценети и неспособни политичари се во владата, иднина во која нема министрите да си делат грантови и тендери на шибицарски начин, а премиерот ќе им прости со стерилно образложение дека немало да ги смени затоа што немал со кого да работи. Иднина во која моите студенти наместо да се збогуваат со мене после одбраната на дипломската работа ќе ме консултираат во која фабрика и кое работно место ќе го прифатат овде во нивната татковина, иднина во која нема мојата татковина да биде рекордер по бројот на мртви новороденчиња во Европа“, напиша меѓудругото Мицкоски на неговиот фејсбук-профил.

Од СДСМ рeагираат и му порачаа „Мицкоски, ако си за иднината, поддржи го референдумот за ЕУ и НАТО, во спротивно остануваш заглавен во минатото, на браникот на криминалот“.

„Христијан Мицкоски декларативно вели дека е за иднина, време е да го докаже тоа на дело и да ги повика членовите на ВМРО-ДПМНЕ да излезат на референдум и да изберат иднина. Во спротивно, Мицкоски ќе покаже дека лаже и дека всушност е за изолација, назадување и неизвесност. Мицкоски, ЕУ и НАТО се нашата иднина. Ајде, ако си за просперитетна иднина поддржи го референдумот на кој граѓаните ќе го имаат последниот збор и ќе одлучат за македонска иднина во ЕУ и НАТО“, се вели во реакцијата на СДСМ.


СДСМ: Граѓаните имаат историска можност да одлучат за иднината на државата


Скопје, 31 јули, 2018 - 9:53 (META) 

СДСМ, како одговорна и државотворна партија заедно со сите политички чинители кои се определени за напредок на Македонија, овозможи последниот збор за Договорот со Грција да го имаат граѓаните, се вели во соопштението на партијата.

Од таму додаваат дека „на 30 септември, на демократски и непосреден референдум, граѓаните ќе имаат историска можност директно да одлучуваат за сопствената и за иднината на државата.“

„Референдумот е вистинска и непосредна демократија, а волјата изразена на него ќе биде обврзувачка за сите, затоа што гласот на граѓаните е клучен за македонската иднина. Се обединија сите политички партии кои навистина се за ЕУ и НАТО, освен Христијан Мицкоски и раководството на ВМРО-ДПМНЕ кои што се против интеграција. Се обединија сите кои се за напредок на Македонија, освен Мицкоски кој сака изолација, стагнација и неизвеснот. Обединети се сите политички и општествени чинители кои се за македонската иднина, освен Мицкоски и највисокото раководство на ВМРО-ДПМНЕ кои сакаат назад во темното минато на криминал, насилство и неказнивост. Но, ВМРО-ДПМНЕ и Мицкоски нема да ја закочат и загрозат македонската иднина со нивните антидржавни постапки“, велат од СДСМ.


Мицкоски: Македонија не е дивоградба која мора да се впише во катастар


Скопје, 24 јули, 2018 - 13:54 (META) 

Граѓани од Центар утринава во своите сандачиња добиле писмо потпишано од лидерот на ВМРО-ДПМНЕ, Христијан Мицкоски во кое тој им порачува дека е време да го кренат гласот, дека ќе стои рамо до рамо со нив во сите битки се додека, како што вели, не ја „направиме Македонија, стаменита, силна и непокорна“, објави „Фокус“.

Во периодот откако е СДСМ на власт, стои во писмото, стравот ја заменил демократијата, неморалот го заменил моралот, а непринципите ги замениле принципите.

„Корупцијата и криминалот цветаа како никогаш досега, преку ноќ се создадоа недопирливи луѓе, законот не важи за сите подеднакво, рекетот царува. Си поигруваат со човечки судбини, со судбините на убиените деца кај Смилковско, со судбините на семејствата на загинатите полицајци во кумановско Диво насеље. Непотизмот е главна одлика за вработување. Се вработува по партиски клуч. Советници стануваат криминалци и крајно некомпетентни луѓе. Младите се иселуваат не гледајќи никаква перспектива“, пишува во писмото на Мицкоски.

Македонија, вели Мицкоски, не е дивоградба која мора да се впише во катастар. Граѓаните, додава тој, имаат идентитет и минато од кое нема откажување.

„Знам дека не ме познавате доволно добро за да речете дека јас сум тој што треба да го поддржите. Јас сум само еден од вас и гледајте го на тој начин. И оттука не треба да ми верувате мене, туку барам да си верувате себеси. Затоа што јас верувам во вас“, додава тој во писмото.

Според лидерот на ВМРО-ДПМНЕ, во општеството владее хаос и апатија и додава дека тоа го „избрала историјата за нас“.

Во врска со својата партија Мицкоски самокритично посочува „не велам дека сме безгрешни и дека нема да грешиме, но ви ветувам дека умееме да се поправиме“, завршува тој.


Фракција на ВМРО-ДПМНЕ: Неславно заврши епизодната улога на Мицкоски


Скопје, 24 јули, 2018 - 9:28 (META) 

Демократската фракција на ВМРО-ДПМНЕ денеска порача дека вчерашната лидерска средба била дебакл на ВМРО-ДПМНЕ, поради однесувањето на преговарачите од партијата, во кои е и партискиот лидер Христијан Мицкоски.

Порачуваат дека партијата мора да престане да биде заштитник на Никола Груевски.

„По вчерашниот дебакл на лидерската средба по која го видовме вистинското лице и улога на преговарачите на ДПМНЕ сега е вистински и последен момент наметнатиот лидер Мицкоски да поднесе оставка, а партијата да свика вонреден партиски Конгрес. Итно е потребно Конгресот на ВМРО ДПМНЕ, како највисок партиски орган, да донесе Когресна одлука со која ќе се определи дали ВМРО ДПМНЕ и понатаму ќе функционира како злосторничко криминално здружение исклучиво за потребите и интересите на соборениот диктатор Груевски и неговата криминална „фамилија“ или во иднина ќе дејствува како современа демократска и патриотска политичка партија. Последиците од едното или другото ги знаат сите искрени и чесни членови, симпатизери и приврзаници на партијата“, се вели во реакцијата.

Партијата бара што побргу да се одржи конгрес на кој ќе се избере ново раководство.

„Што побрзо Мицкоски поднесе оставка и се одржи вонреден Конгрес последиците по државата и партијата ќе бидат помали. Членството на партијата, мора сторого да ја почитува партиската доктрина која јасно и децидно истакнува дека: „Значењето на татковината е огромно. ВМРО-ДПМНЕ е против општество во кое „владее егоизмот на интереси“. Без нација и национална свест нема еманципација од последиците на егоизмот“, се вели во реакцијата.