Заев до Каракачанов: Мое право е да бидам Македонец и да зборувам македонски јазик


Штип, 10 декември, 2018 - 17:34 (META) 

Дека јас сум Македонец, дека јас зборувам македонски јазик, тоа е мое право, тоа е европска вредност, одговори премиерот Зоран Заев по острите напади во колумната и телевизиските настапи викендов и денеска од Красимир Каракачанов, актуелен вицепремиер и министер за одбрана на Бугарија и претседател на националистичката ВМРО-БНД, но и на пораките од Екатерина Захариева, бугарската министерка за надворешни работи.

Заев на денешната јавна расправа во Штип за уставните измени, порача дека ќе продолжи и понатаму да гради пријателство со Бугарија.

– Јас очекувам навистина европските вредности да бидат прифатени од сите, како што исто така подадов рака и прифатив дека споедлуваме заедничка историја. Ќе продолжам да зборувам во духот на пријателството и ќе продолжам да градам пријателство, без разлика на какви причини некој темели свои изјави или слично. Јас верувам дека и господинот Каракачанов и министерката Захариева и премиерот Борисов, но пред се бугарскиот народ е пријателски народ на нашиот народ – рече Заев.

На неговата изјава се надоврза професорот Ѓорѓи Спасов, кој рече дека изјавата на Каракачанов е реакција на стравот дека со влезот на Македонија во ЕУ, може да остане без парите од продажбата на бугарските пасоши.

И лидерот на опозицијата, Христијан Мицкоски, го искритикува нападот од Каракачанов.

– И во Македонија и во Бугарија сè уште постојат сили кои не им мислат добро на односите помеѓу соседите, рече претседателот на ВМРО-ДПМНЕ.

Мицкоски даде идентична оценка со таа на Спасов за мотивите на Каракачанов.

– Постои основано сомнение за поткуп за издавање на бугарски пасоши, во неговата земја. Па така овој квази патриотски набој и крик на господинот Каракачанов е во функција на таа политика – рече лидерот на ВМРО-ДПМНЕ.

Во меѓувреме, во Бугарија беше објавено новинарско истражување кое покажува дека и Каракачанов како министер за одбрана ја продолжил практиката на неговите двајца претходници да набавува храна за војската без расчистена постапка за јавна набавка. За тоа во изминатите три години се потрошени околу 31 милиони лева (повеќе од 15 милиони евра).


СДСМ: Мицкоски ја потврдува поврзаноста на ВМРО-ДПМНЕ со насилството од 27 април


Скопје, 10 декември, 2018 - 10:36 (META) 

За владејачката СДСМ е неприфатливо барање на Христијан Мицкоски да се формира независно тело кое ќе ги преслуша снимките на судиите и обвинителите во изминатите две години.

„Мицкоски ги потврдува сведоштвата за сериозна поврзаност на насилниците со ВМРО-ДПМНЕ во организацијата и координацијата на насилството од 27 април. Преку нелогични, несериозни и неосновани барања, интерпелации, измислици, Мицкоски се обидува да ги закочи реформите, да ги блокира процесите за интеграција на Македонија во НАТО и ЕУ. Не му беа доволни 11 години прислушување на Мицкоски па бара нови снимки да преслушувале „експертите“ од ВМРО-ДПМНЕ, одговори вчера СДСМ.

Мицкоски своите вкупно шест барања ги упати вчера од Кочани, каде ВМРО-ДПМНЕ одржа протест.

„Веднаш да се формира независно тело предводено човек предложен од опозицијата, коешто ќе ги преслуша, анализира, систематизира сите материјали коишто се собрани  изминативе две години како резултат на црниот Вотергејт на Заев, односно прислушувањето на сите судии и обвинители. Да ги видиме нарачаните пресуди  за поткуп, да ја видиме нарачаната пресуда за „Глобал“ , да видиме како нарачувате обвиненија за луѓето од 27 Април, да видиме како нарачувате обвиненија за ВМРО-ДПМНЕ, побара претседателот на ВМРО-ДПМНЕ од Кочани.

Тој рече дека после секој протест ќе има нови барања и побара оставки од министрите Спасовски и Димитров.

– Итна и неотповиклива оставка на министерот којшто својата нација ја нарече искомплексирана нација. Министерот кој благодарение на ова нација која го полни буџетот зема плата, ужива во привилегиите да се школува неговото семејство надвор од Република Македонија со стипендиите кој овој народ ги обезбедил. Итна и неотповиклива оставка на министерот за терор и прогон т.е. полиција, Оливер Спасовски затоа што откако е министер само порази шпиунски акции, претреси и омаловажувања на нашите браќа и сестри, граѓани на Република Македонија – рече Мицкоски.

Тој побара веднаш да сопре иницијативата од Владата за покачување на даноците „и да престане осиромашувањето на бизнисот и на граѓаните.“ Побара и соодветни мерки за решавање на проблемот со загадувањето на воздухот.

– Ги лажевте граѓаните испентарени на падините на преубавото Водно и велевте само да падне режимот и ќе започне да дува алпски воздух. Овде во Кочани им велевте на луѓето најзагаден град сте, многу скара вртите па затоа ви е загаден градот – рече Мицкоски, кој исто така побара „почитувања на јасно изразената волја на народот на референдум“.


Азески: ЦЕФТА договорот е мртов, соседите наместо да соработуваат се случува катастрофа


Скопје, 28 ноември, 2018 - 16:08 (META) 

ЦЕФТА договорот е мртов, тоа само треба да се констатира, рече денеска претседателот на Стопанска комора на Македонија, Бранко Азески по средбата со раководството на ВМРО-ДПМНЕ, на која се размениле мислења околу економските прашања од значење за бизнисот.

– Загрижува ЦЕФТА договорот кој паѓа. Секој ден имаме кршење на неговите одредби. Ако претставуваше предворје на ЕУ, преку кое се подготвуваме да влеземе на 28-члениот пазар, не успеавме да го поминеме тестот на шестчлен пазар на Балканот. Осум отсто бележиме пад во разменета изминатиот период, тоа е доволен индикатор дека тој договор е мртов. Тоа треба само да се констатира. Регионот сам и испраќа сигнал на Европската унија дека не е за таму каде што тргнал. Ова што се случува сега со Косово, Србија и Босна и Херцеговина е катастрофа. Наместо да ја интензивираме размената со соседите, остваруваме суфицит со земји како Германија – рече Азески одговарајќи на новинарски прашања.

Тој додаде дека кажал се со податокот дека, размената идната година со Германија ќе достигне над четири милијарди, а со првиот наш сосед имаме 300 милиони евра размена.

Во однос на економијата, Азески потенцираше дека Македонија мора да се стреми кон уште поголема соработка и размена со соседите и да гради сериозен пристап кога се во прашање индустријата, извозот и образованието на кадарот, согласно потребите на пазарот.

Фокусот идната година, според него треба да се стави и врз општините кои, како што истакна, имаат многу ниска инвестициска активност, но и врз малата искористеност на капиталните инвестиции, како и на општата потрошувачка која е многу слаба.

Лидерот на ВМРО-ДПМНЕ, Христијан Мицкоски напомена дека неговата партија секогаш била и ќе остане партнер на стопанските комори во Македонија.

– Економијата оди надоле, граѓаните се се посиромашни и понезадоволни. Голем дел се одлучуваат да ја напуштат државата трајно или привремено. Власта го напушти и пристапот на привлекување странски инвестиции – рече Мицкоски.

Ова е втора средба на Мицкоски со Азески годинава, по првата одржана на 1 март.


Мијалков: Христијане, играш двојно, лажеш, лицемер си и немаш капацитет


Скопје, 8 ноември, 2018 - 13:33 (META) 

Поранешниот шеф на УБК и висок функционер во ВМРО-ДПМНЕ кој неодамна беше исклучен од партијата, Сашо Мијалков, му пиша второ писмо на актуелниот лидер на партијата, Христијан Мицкоски.

Според Мијалков, ниедно претходно раководство на ВМРО не доживеало ваков срам на меѓународна сцена од сестринските партии кои се дел од Европската Народна Партија. Тој изразува уверување дека во иднина секој прв човек на ВМРО ќе биде фактор кој ќе биде прашан околу тоа дали ќе има една или две партиски делегации и кој ќе биде во тие делегации.

„Ти не си фактор и наместо да ја обединиш и зацврснеш партијата, ти ја слабееш и ја делиш. За тоа си крив ти, твоето лицемерие, лажниот патриотизам и твојата незаинтересираност за иднината на Македонија. Во иста вечер јавно да те бламираат и да ти пишуваат пораки на социјалните мрежи и Дорис Пак и Јоханес Хан не говори ништо друго, освен што покажува дека и тие ги прочитале твоите лаги и не ти веруваат. Така е тоа Христијане кога играш дупло. Така е тоа Христијане со искусни политичари кои знаат дека твои советници од доверба шетаат по Скопје и зборуваат „а да си побаравме ние друг партнер, на исток”. Нели Христијане клечеше, се крстеше и се колнеше во Македонија? Која е сега таа конструктивност која што сега ти стана повредна од Македонија? Има ли твојата “борба за Македонија” цена и која е таа ? Дали ќе организираш протести и дали во Собранието ќе ги искористиш сите средства за да го блокираш договорот од Преспа, а такви средства имаш многу“, прашува Мијалков.

Во писмото тој исто така го прашува лидерот на ВМРО-ДПМНЕ дали ќе стори нешто или „ќе се правдаш како имало нова реалност, а ти кутриот не си моќен да преземеш ништо“.

„Ти кажав и пак ќе ти кажам, тоа што го правиш не е чесно и не доликува на човек што треба да го води ВМРО. Сакаш да дојдеш на власт ама ти да си патриотот, а другите да се предавници. Сакаш да газиш преку туѓи животи. Кукавички и ниско од некој што треба да води организација како ВМРО. Прочитан си Христијане дека играш двојно со нашето членство и целиот народ. Извини се на членството за двојните игри и лицемерието. Извини се и на граѓаните на Македонија што ги лажеше дека ти ќе си го бранел името до крај“, додава Мијалков.

На крај поранешниот функционер му вели на Мицкоски дека има подолг стаж во ВМРО од него и од неговите соработници и дека писмата до него имаат една цел – да го спасат и направат посилно ВМРО.

„Ти не си ВМРО. ВМРО е над тебе. Ти си времено на функција во ВМРО. Доколку ВМРО загуби на претстојните избори затоа што е изолирано, тоа ќе биде само заради тоа што немаш капацитет. Крајно време е да размислиш и одлучиш, за враќање на прозападниот курс, зацртан во трајните определби на партијата“, завршува Мијалков.


Хан: На Мицкоски му кажав дека Договорот од Преспа мора да се реализира


Хелсинки, 8 ноември, 2018 - 9:38 (META) 

Еврокомесарот Јоханес Хан вчера на конгресот на Европските народни партии (ЕПП) во Хелсинки се сретнал со лидерот на ВМРО-ДПМНЕ, Христијан Мицкоски, а по средбата на „Твитер“ напиша дека му нагласил на Мицкоски дека Договорот од Преспа мора да се реализира. Тој рече и дека Мицкоски ветил дека нема да ја попречува постапката во Собранието.

„Корисен разговор со лидерот на ВМРО-ДПМНЕ Христијан Мицкоски на конгресот на ЕПП во Хелсинки. Бев кристално јасен дека ратификацијата на Преспанскиот договор мора сега брзо да се заврши, без никакви пречки. Ја поздравувам неговата посветеност да не ја попречува постапката во Парламентот. За евроинтеграцијата треба лојална опозиција“, напиша Хан на својот „Твитер“ профил.

Мицкоски по средбата со Хан на својот „Фејсбук“ профил напиша дека го информирал еврокомесарот за политичкиот прогон и злоупотребата на правосудството против ВМРО-ДПМНЕ, и како што вели посочил дека членството на Република Македонија во Европската Унија преставува стратешки интерес за ВМРО-ДПМНЕ.

Хан исто така се сретна и со исклучените членови на ВМРО-ДПМНЕ, Петар Богојевски кој беше дел од реформското кривло, Емилија Александрова, пратеничката која гласаше за потребата од уставни измени и поранешниот министер за здравство, Никола Тодоров.

„Им честитав на нивната смелост и храброст во гласањето за Преспанскиот Договор. Сите закани кон нив мора да запрат. Сите партии треба да работат за ЕУ агендата бидејќи тоа е она што го сакаат мнозинството граѓани“, напиша Хан.

 


Костадинов: Обвинителство да провери како Мицкоски добил 33.000 квадрати земјиште за хидроцентрала


Скопје, 5 ноември, 2018 - 16:01 (META) 

Портпаролот на СДСМ, Костадин Костадинов денеска го повика јавното обвинителство по допрен глас да ги провери сомневањата за организиран криминал и судир на интереси во случајот со доделување 33.000 квадратни метри земјиште за хидроцентрала на фирма во која сопственик е претседателот на ВМРО-ДПМНЕ, Христијан Мицкоски. Земјиштето е доделено во време кога Мицкоски му бил советник на поранешниот премиер Никола Груевски, а Костадинов на денешната прес-конференција презентираше документи за случајот.

-Сомнежите се основани и поткрепени со документи коишто покажуваат дека во време кога Мицкоски му бил советник на Никола Груевски, преку фирмата „Енерготек ДОО Скопје“ во која лично тој има удел, од Владата добил 33.000 квадратни метри земјиште земјиште за изградба на хидроцентрала. Заедно со компанијата „Минка ДА“ го основаат конзорциумот „Минка-Енерготек“, кој е избран за најповолен понудувач и подоцна го добива земјиштето. Уделот на фирмата „Енерготек ДОО Скопје“ во конзорциумот денеска изнесува 99 отсто. Ова е класичен судир на интереси – рече Костадинов.

Тој порача оти сомнежите дека има организиран се поткрепени и од фактот што еден од сопствениците на „Енерготек ДОО Скопје“ е и Димитар Димовски, член на Извршниот комитет на ВМРО-ДПМНЕ, и во времето на министерувањето на Миле Јанакиески, и негов соработник.


Мицкоски: Ми се кинеше срцето кога ве гледав како гласате, а можевме да го победиме Заев


Скопје, 24 октомври, 2018 - 9:46 (META) 

Претседателот на ВМРО-ДПМНЕ Христијан Мицкоски од вечерашната партиска свеченост по повод одбележувањето на денот на македонската револуционерна борба, побара да се донесе закон за амнестија за учесниците во настаните од 27 април во Собранието.

Според него, така ќе има неселективна правда и слободна за сите.

Во врска со новонастанатата ситуација во партијата што ја води, рече дека минатиот петок бил „црн петок“, а пратениците кои гласале спротивно на партискиот став, како што рече, ја предале партијата и државата и се воделе од личен интерес.

– Тивко и пеколно болно беше во моето срце таа вечер. Тивко и мачно беше во нашиот штаб. Тивко, мачно, болно, гневно, очајно беше во македонските домови, во македонските градови и во македонските села. Не заболе и тоа пеколно. Тоа што ве видовме со посвиткана кичма. Не издржаа вашите плеќи. Не издржаа иако до пред некој ден не убедувавте, се фалевте и ширевте митови дека на вашите плеќи се крепи Македонија. Кога гледав како еден по еден кревавте рака за предлогот на Заев, со секое кревање рака нас срцето ни се кинеше. Пеколна болка е тоа – рече Мицкоски.

Лидерот на ВМРО-ДПМНЕ во своето обраќање потенцираше дека доколку пратениците не гласале „за“ потребата од уставни измени, партијата ќе победела на изборите.

– Само малку фалеше да издржите. Да одговоревте на задачата, да не ја свиткате кичмата, Заев беше готов. Вие само за малку му ја продолживте политичката кариера на Заев на сметка на Македонија. Влеговте во неговиот ол ин план, со кој срамно тргува со илјадници македонски души. А, да издржевте ќе одевме на избори!. И ќе го победевме злото. Ќе го победевме Зоран Заев и групата околу него. Па нели сфативте дека беше готов. Едно сакам да ви кажам тој е слаб и слаб ќе остане, а вашата инјекција, допингот, кратко ќе му трае – додаде Мицкоски.

На прославата на денот на ВМРО не присуствуваше почесниот претседател на партијата Никола Груевски, како ни претседателот Ѓорге Иванов.


ИК на ВМРО-ДПМНЕ ги исклучи пратениците кои гласаа за уставни измени


Скопје, 20 октомври, 2018 - 0:52 (META) 

Извршниот комитет на ВМРО-ДПМНЕ (ИК) на вечерашната вонредна седница донесе одлука да ги исклучи од партијата седумте пратенци кои гласаа за измена на Уставот на Република Македонија заради имплементација на Договорот од Преспа, информираше лидерот на партијата Христијан Мицкоски на прес-конференција.

– Оние седум пратенци од ВМРО-ДПМНЕ кои постапија спротивно на партискиот став и волјата на граѓаните, кој беше, пак, партиски став едногласно донесен и на Извршниот и на Централниот комитет и во координација со претеничката група ме разочараа мене, но тоа и не е толку важно затоа што пред се ја разочараа партијата и татковината и ќе треба со тоа да живеат. Токму затоа, вечерва Извршниот комитет на ВМРО-ДПМНЕ  одржа вонредна седница и на мој предлог едногласно се усвои веднаш да се исклучат од партијата –  рече Мицкоски.

Тој посочи дека од партијата се исклучени Елизабета Канческа Милевска, Емилија Александрова, Нола Исмаиловска Старова, Сашо Василевски, Љубен Арнаудов, Крсто Мукоски и Зекир Ранчиловиќ.

На некои од нив, нагласи, можеби им било ветувано ослободување од обвиненијата или им биле понудени и пари. Мицкоски додаде дека како човек не може да ги оправда ниту, пак, да ја разбере нивната постапка.

Тој вчерашниот ден го оцени како најцрн ден во историјата на Македонија, или како што кажа било „црн петок“.


Мицкоски му одговори на Мичел: Секогаш е најтемно пред зората, Договорот е неприфатлив


Скопје, 17 октомври, 2018 - 15:18 (META) 

„Овој Договор е штетен за интересите на мојата нација и татковина и како таков е НЕПРИФАТЛИВ (големите букви се на Мицкоски, н.з.) за ВМРО-ДПМНЕ и за огромното мнозинство на граѓани на Република Македонија, што впрочем и се покажа на последниот референдум, каде што и покрај бруталното и насилничко полнење на кутиите од страна на луѓе блиски до Владата, сепак на крај не успеаjа во намерата да обезбедат ни приближно услови за референдумот да биде прогласен за успешен“.

Со таква порака Христијан Мицкоски, претседателот на ВМРО-ДПМНЕ, одговори на вчерашното писмо на Вес Мичел, помошник државниот секретар на САД за европски и евроазиски прашања, во кое му беше побарано да се заложи и јавно и приватно да им се отвори простор на пратениците на ВМРО-ДПМНЕ за уставните измени во Собранието да се изјаснуваат по своја волја.

Писмото Мицкоски го завршува со зборовите „секогаш е најтемно пред зората”.

Заблагодарувајќи му се на поддршката за евроатлантските интегративни напори на Македонија, Мицкоски вели дека процесот на преговори со Грција бил манипулативен и сокриен од јавноста, а манипулативно било и референдумското прашање.

– Продолжувам и навистина не можам да поверувам како ќе се придонесе за стабилноста, мирот и сигурноста доколку се прифати Договор кој убедливото мнозинство на граѓани го отфрли на референдумот;  со кој се менува Уставот со цел промена на Уставното име на државата; со кој се поништуваат сите стекнати права на Република Македонија како резолуцијата на ОН за прием на Република Македонија од 1993 година, Времената спогодба  со Грција од 1995 година и Хашката пресуда во полза на Македонија од 2011 година; со кој се предвидува формирање на Комисија помеѓу двете држави со задача за ревидирање на историјата, археологијата и образованието, трајно наштетувајќи на идентитетот на мојата земја;  со кој се откажува земјата од грижата за Македонските малцинства во други земји, но истовремено се откажува и од Македонците во дијаспората – порачува Мицкоски во писмото.

Претседателот на ВМРО-ДПМНЕ вели дека како пријател на САД ја цени ангажираноста да се помогне во процесот и сака заеднички да се гради иднината на Македонија, но нагласува дека за него е важно самоопределувањето.

– Но, исто така сум човек кој силно верува во основните цивилизациски придобивки на самоопределување како Македонец и самоименување на мојата татковина Република Македонија – вели Мицкоски во одговорот до Мичел, кој го завршува со зборовите „секогаш е најтемно пред зората”.


Во Собрание продолжува расправата за уставните измени


Скопје, 17 октомври, 2018 - 9:33 (META) 

Во Собранието на Република Македонија и денеска ќе продолжи седницата на која пратениците расправаат за утврдување на потребата од предлогот на Владата за уставни измени за имплементирање на Договорот од Преспа меѓу Македонија и Грција.

Неколкумина пратеници од ВМРО-ДПМНЕ на вчерашната седница побараа средба помеѓу нивниот лидер Христијан Мицкоски и премиерот Зоран Заев за изнаоѓање решение за Договорот од Преспа и за излез од кризата.

Елизабета Канческа-Милевска, пратеничка на ВМРО-ДПМНЕ, поранешна министерка за култура и обвинета во случајот „Тендери“ на СЈО, вчера во Собранието ги повика Заев и Мицкоски да седнат на заедничка маса за да го најдат потребниот консензус и одржливо решение кое може да се најде преку неколку суштински измени на Договорот од Преспа.

Заев рече дека е подготвен да седне и да разговара со Мицкоски за власта и опозицијата заеднички да ги изготват амандманите.

-Ние сме само изработувачи на нацрт-амандмани и заедно ќе ги работиме ако треба и овде во Парламентот ќе доаѓаме од Владата за да го потврдиме идентитетот, македонскиот јазик дали во постојните амандмани или ќе изработиме и петти амандман. Грција нема ништо против нашиот идентитет и нашиот јазик. Спремен сум да разговарам со грчката страна затоа што тоа не е спорно. Проблемот е во разграничувањето на Северна – рече Заев.

Денешната собраниска седница е закажана во 12 часот.