fbpx

Како Ковачевски и Мицкоски го честитаа 11 Октомври – Денот на народното востание

Премиерот Ковачевски на неколку наврати ја спомнува Европа и Европската унија, додека лидерот на опозицијата Мицкоски го спомнува бугарскиот фашистички окупатор, но и „оние кои распродаваат, преговараат и уценуваат“ без да прецизира на кого точно мисли

-

И премиерот и претседател на владејачката СДСМ, Димитар Ковачевски, и претседателот на опозициската ВМРО-ДПМНЕ денеска го честитаа големиот државен празник, 11 Октомври – Денот на народното востание кога македонскиот народ се кренал на вооружено антифашистичко востание во 1941 година.

Иако навидум двете честитки се многу слични, во нив може да се забележат драстични разлики. Така, премиерот Ковачевски на неколку наврати ја спомнува Европа и Европската унија, додека лидерот на опозицијата Мицкоски го спомнува бугарскиот фашистички окупатор, но и „оние кои распродаваат, преговараат и уценуваат“ без да прецизира на кого точно мисли.

„Благодарение на успехот во НОБ, постои денешна, современа и независна, демократска, евроатлантска Република Северна Македонија“, вели Ковачевски додавајќи дека овој ден „ќе биде секогаш на светлите страници на македонската историја“.

Од друга страна, Мицкоски, потенцира дека „овој ден е почеток на борбата на македонскиот народ против бугарскиот фашистички окупатор“.

Во следната реченица тој користи одредена нелогичност велејќи дека всушност востанието е „финалето на борбата што ќе ни ја донесе независна Македонија“.

„Да веруваме во нашите „борби“ бидејќи историјата покажува дека македонскиот народ секогаш бил на вистинската страна. На страната на правдата, за оние кои веруваат во вредности, и оние што веруваат во слободата, во заедничкиот живот и патриотизам“, посочува опозиционерот Мицкоски.

Понатаму, двајцата лидери повикуваат на обединување со таа разлика што премиерот зборува за „патот напред“, а лидерот на опозицијата бара „да ја почитуваме историјата“.

Според Ковачевски, потребно е „исто како партизаните, едни до други и едни со други, да останеме цврсти и обединети по патот напред“.

„Да ја внесеме државата во ЕУ и да ги донесеме европските стандарди во родната земја. Да одговориме на аманетот и нашата света должност – денес ние, да создадеме иднина за следните генерации!“, порача премиерот.

Од друга страна Мицкоски вели дека треба да се спротивставиме на “оние кои распродаваат, преговараат и уценуваат“.

„Важно е да ја почитуваме и учиме историјата, за да ги научиме од грешките, да бидеме обединети и сплотени, да го слушаме гласот на народот и да се спротивставиме на оние кои распродаваат, преговараат и уценуваат“, посочи лидерот на опозициската ВМРО-ДПМНЕ.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

Полицаец од Крушево исфрлил во ѓубре доверливи документи

Полициски службеник од Крушево исфрлил во ѓубре службени материјали сместени во картонски кутии, а меѓу кои имало и документи со одреден степен на класификација, соопшти Министерството за внатрешни работи...