!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

СДСМ: ВМРО-ДПМНЕ останува заробенa во сопствената политика на затвореност


Скопје, 21 јуни, 2017 - 16:24 (META) 

ВМРО-ДПМНЕ и Трајко Вељаноски остануваат заробени во сопствената политика на затвореност, тајност, манипулација и на лажење на граѓаните, се вели во реакцијата на СДСМ на прес-конференцијата на Трајко Вељаноски.

Од владејачката партија додаваат дека „за разлика од тајните преговори што ВМРО-ДПМНЕ ги водеше со соседите, Владата предводена од СДСМ е максимално транспарентна и секоја политика, секој нејзин потег е им ќе биде на увид на граѓаните“.

„ВМРО-ДПМНЕ ги погази државните и национални интереси и ги изневери граѓаните кога тајно преговараше и се договараше за промена на името, што се докажа и од материјалите објавени во проектот „Вистината за Македонија“. Преку постојани блокади на демократските реформи и на евроатлантските интеграциски процеси, ВМРО-ДПМНЕ 11 години работеше против државните и националните интереси“, се вели во соопштението на СДСМ.


Вељаноски: Бараме увид во тоа што го договорил Заев за добрососедството


Скопје, 21 јуни, 2017 - 15:40 (META) 

„ВМРО-ДПМНЕ е крајно загрижена од нетранспарентноста и леснотијата со која Заев пристапи на едно исклучително сериозно прашање, како што е склучувањето на договорот со Бугарија. ВМРО-ДПМНЕ бара увид во тоа што Заев договорил при посетата на Софија. Македонскиот народ бара увид во содржината на договорот што Заев се согласил да ја потпише“, порача пратеникот на ВМРО-ДПМНЕ, Трајко Вељаноски, на прес-конференција.

Осврнувајќи се на вчерашната изјава на премиерот Зоран Заев во Софија дека Македонија затвора едно поглавје на историја на национализам и на омраза, Вељаноски порача дека е крајно срамно и недолично да го обвиниште сопствениот народ за ширење национализам и омраза и вели дека прашањата кои задираат во идентитетот на македонскиот народ не може да бидат прашања со кои ќе се занимава само СДСМ.

– Ваквите теми, кои задираат во идентитетот на македонскиот народ, не се и не смее да бидат ексклузивен интерес ниту на Зоран Заев, ниту на СДС. Овие теми се надпартиски. За нас е разбирливо соседна Република Бугарија да има свои интереси и нив да ги брани и да ги застапува. Тоа што не можеме и нема да го прифатиме е Зоран Заев сам да одлучува за темите кои се од интерес, а пред граѓаните ветуваше инклузивност и дебата за многу понесуштински прашања – рече Вељаноски.

Тој рече дека е опасно да се доведува на таков начин во прашање посебноста на македонскиот народ.

– Република Македонија има сопствена историја. Ова е факт што никој не смее да се дрзне да го менува. Етногенезата на македонскиот народ е посебна и затоа е исклучително опасно да се говори за „заедничка историја“. Дали изјавите на Зоран Заев околу заедничката историја значат дека македонскиот народ во минатото немал своја посебна? Дали е Заев свесен колку се опасни овие тези? Прашањето за заедничката историја секогаш било една од најголемите пречки при постигнување на договорот со соседна Бугарија – праша Вељаноски.


Вељаноски на „Фејсбук“: Немаше никакво примопредавање на функцијата на Џафери


Скопје, 5 мај, 2017 - 16:28 (META) 

Досегашниот претседател на Собранието, Трајко Вељаноски, кој беше и претседавач со конститутивната седница по изборите, на својата фејсбук-страница напиша дека немало примопредавање на функцијата помеѓу него и новоизбраниот претседател, Талат Џафери.

„Не, немаше никакво примопредавање на нелегитимно и неуставно избран претседател на Собранието“, напиша Вељаноски, како коментар на споделеното соопштение од Собранието за првиот работен ден на Џафери како претседател на законодавниот дом.

Вељаноски беше претседател на Собранието речиси осум години. Тој на функцијата стапи на 21 јуни 2008 година по одржаните парламентарни избори и како претседател на законодавниот дом се води сè до 30 декември 2016 година, кога се одржа првото продолжение на конститутивната седница.

Тој изминатите два месеци ја имаше улогата претседавач со Собранието, сè до изборот на Талат Џафери на 27 април, кога група граѓани насилно упаднаа во Собранието и повредија неколку пратеници и новинари.


Вељаноски не ги предал печатите зашто тие се кај собраниските служби


Скопје, 4 мај, 2017 - 10:51 (META) 

Примопредавањето на кабинетот на претседателот на Собранието не е поврзано со некакво предавање на печати, од проста причина што ниту еден претседател на Собранието немал печати, туку само факсимили, велат за „Мета“ од собраниските служби.

– Претседателот не е архивар, па да има печат – изјавија кратко од службите.

Печатите, инаку, се потребни за да може претседателот на Собранието, Талат Џафери, да испрати официјално писмо до претседателот на Република Македонија, Ѓорге Иванов, дека е формирано парламентарно мнозинство за формирање влада, но и за сета друга службена комуникација.

Примопредавањето на кабинетот на претседателот на македонското Собрание се случи вчера, а како што изјави Џафери, тоа се одвивало „нормално“.


Вељаноски не го признава Талат Џафери, од СДСМ велат дека и тој ќе одговара


Скопје, 30 април, 2017 - 10:43 (META) 

Претседател не се избира за половина минута, не се избира на таков начин, тоа не се прави на шверцерски начин, тоа е свечен чин и не може на шверцерски начин, во едно катче, во еден ќош од една просторија да се избере претседател на Собрание, рече Трајко Вељаноски во изјава за вестите на телевизија „Сител“.

– Со изборот на Талат Џафери за претседател на Собранието го прекршија Законот на Собранието, Уставот и деловникот на парламентот на Македонија. Исто така, ги изоставија и службите и гласањето не беше легитимно. Врз која основа тие утврдија колку гласале „за“, а колку пратеници биле „против“ и колку имало воздржани, воопшто колку патеници биле присутни? Политиката треба да го следи правото и не смее да биде над него, бидејќи не може некој да биде претседател на Собрание без да се објави одлука во „Службен весник“. Тоа што тие си направија слики и „селфи“ со мобилен телефон, не значи дека избрале некого – рече Вељаноски.

Пратеникот од ВМРО-ДПМНЕ кажа и дека за обезбедувањето на Собранието е одговорно Министерството за внатрешни работи и дека веројатно имало големи пропусти.

Вељаноски најави дека Собранието ќе продолжи да работи и дека тој ќе закаже ново продолжение на конститутивната седница откако ќе биде „извршен ремонт на народното собрание“, по упадот на граѓаните.

Од СДСМ преку соопштение велат дека Трајко Вељаноски со месеци дозволил кршење на деловникот на Собранието, ги блокирал демократските процеси и го блокирал изборот на нов претседател на парламентот и нова влада.

„Вељаноски, со ова, заедно со Груевски, Иванов, Чавков, е меѓу главните виновници за обидите за убиство на пратеници во Собранието и за насилството врз новинари и вработени во него. Истрагата дополнително ќе ја покаже инволвираноста на Вељаноски во терористичкото загрозување на уставниот поредок и на безбедноста вечерта, за време на крвавото насилство во Собранието. Насилниците и криминалците ќе одговараат“, велат од СДСМ.


Заев: Очекувам во рок од 10 дена претседателот Иванов да ми го даде мандатот


Скопје, 28 април, 2017 - 21:09 (META) 

Во вечерашната „Топ тема“ на телевизијата „Телма“, лидерот на СДСМ, Зоран Заев, рече дека очекува утре, или најдоцна до вторник, Трајко Вељаноски да му го предаде кабинетот на новиот претседател на Собранието, Талат Џафери. Заев кажа и дека очекува во рок од 10 дена претседателот Ѓорге Иванов да го даде мандатот на парламентарното мнозинство.

– Мора да го даде мандатот, нема друго. Или, ако не го дава, нека го каже излезот, не може вака, не го давам мандатот, како децата, не ја давам играчката – рече Заев.

Тој раскажа и дел од морничавите работи при вчерашното дивеење, кои не беа откриени на пошироката јавност.

– Ми рекоа „Видете го Села заклан, вие сте следниот!“ – обелодени Заев.


СДСМ: Иванов е еднакво виновен за крвавото сценарио во Собранието


Скопје, 27 април, 2017 - 23:24 (META) 

Иванов, еднакво со Груевски и со Вељаноски, е виновен за крвавото сценарио во Собранието и за тоа ќе сноси сериозна одговорност, стои во реакцијата на СДСМ на вечерашното обраќање на претседателот на државата до граѓаните.

„Ѓорге Иванов е извршителот на Никола Груевски. Иванов работеше спротивно на Уставот и на своите должности пред граѓаните, со тоа што го поддржа насилството на Груевски и заедно со Груевски и со Трајко Вељаноски свесно работеше на омраза и на поделби во државата“, стои во реакцијата на СДСМ.


СДСМ: Ќе има одговорност за насилството поттикнато од Груевски, Иванов и од Вељаноски


Скопје, 27 април, 2017 - 21:53 (META) 

По вечерашните настани во Собранието, во кои има голем број повредени пратеници од СДСМ и од албанските партии, СДСМ во соопштение до медиумите вечерва порача дека ќе сносат одговорност нарачателите на насилствата, односно, според партијата, Никола Груевски, Ѓорге Иванов и Трајко Вељаноски.

„Ќе одговараат за загрозување животи сите што учествуваа во вечерашното насилство во Собранието, како и за сите други злодела нарачани и спроведени од раководството на ВМРО-ДПМНЕ.  Крвавото насилство во Собранието е резултат на насилството на кое изминатиот период повикуваше Никола Груевски, како и провокациите, омразата, поделбите поттикнати од Груевски, Ѓорге Иванов, Трајко Велјаноски, пратеничката група на ВМРО-ДПМНЕ и од нивните соработници и поддржувачи“, се вели во соопштението.

Нагласувајќи дека сериозно се повредени пратеници, претставници на граѓаните, СДСМ вели дека овој факт е „врв на нецивилизираниот однос на овие луѓе, кои се подготвени да жртвуваат сè за да се обидат да избегнат одговорност“.

„На очиглед на целата домашна и меѓународна јавност, паднаа маските и режимот е разобличен до крај“, се вели на крајот на соопштението на СДСМ.


Собрание: Пратениците на ВМРО-ДПМНЕ меѓусебно си реплицираа и си контрареплицираа


Скопје, 19 април, 2017 - 20:00 (META) 

Како што почна, така и заврши четиринаесеттото продолжение на конститутивната седница на Собранието, во реплики и во контрареплики на пратениците на ВМРО-ДПМНЕ.

По паузата за ручек во 15 часот, ниту еден од пратениците на СДСМ не се јави за збор.

Пратениците на ВМРО-ДПМНЕ повторно расправаа за тиранската платформа, протестите, државните симболи, а беа спомнати и последиците по економијата од приватизацијата.

Пратеникот на ВМРО-ДПМНЕ, Антонио Милошоски, кажа дека „кога за претседател на најголемата опозициона партија имате човек кој има проблеми со судот, исто како и неговиот брат, тој има желба и лично и политички да се избави од судските проблеми“.

„Проблемот почна и проблемот ќе заврши со Зоран Заев, кој создаде ваква комплицирана ситуација која е ризична за Македонија“, истакна Милошоски.

Претседавачот Трајко Вељаноски седницата ја прекина во 18 часот, а следната ја најави за утре во 11 часот.


СДСМ: Вељаноски и Иванов се должни да овозможат мирен трансфер на власта


Скопје, 18 април, 2017 - 9:38 (META) 

„Трајко Вељаноски и Ѓорге Иванов не смеат противуставно и противзаконски да ги блокираат демократските процеси. Тие се должни, во согласност со Уставот и со законите, да овозможат мирен трансфер на власта“, се вели во редовното утринско соопштение на СДСМ.

Во него се додава дека и во Македонија, како и секаде во светот, формираното парламентарно мнозинство е власт, бидејќи тоа ја одразува мнозинската волја.

„А како и во секоја демократска земја во светот, и во Македонија, според Уставот и законите, партиите по изборите имаат право да го формираат мнозинството, кое има должност да се обиде да ја формира новата влада. Со Никола Груевски и со ВМРО-ДПМНЕ никој не сака да коалицира. Оттука, нови избори не се решение, туку туркање на граѓаните и на Македонија во долга политичка криза со несогледливи последици по економијата и по стабилноста“, се додава во соопштението.

Од СДСМ велат дека ВМРО-ДПМНЕ има 51 пратеник во Собранието и дека партијата е веќе во опозиција.