Основниот кривичен суд од Скопје денеска го отфрли барањето за амнестија на обвинетите лица во случајот „Организатори на 27 април“. Барањето за амнестија го поднесоа поранешниот собраниски спикер Трајко Вељаноски, ексминистрите Спиро Ристовски и Миле Јанакиески и бившиот директор на Управата за безбедност и контраразузнавање Владимир Атанасовски.
Претседателот на Судечкиот совет, судијата Илија Трпков на рочиштето изјави дека по барањето на одбраната на обвинетите за примена на Законот за амнестија од 2018 година и по добиеното мислење на Јавниот обвинител, донел одлука со која барањето се отфрла како неосновано.
Барањата за амнестија од обвинетите беа поднесени на почетокот на повторениот судски процес, во кој тие се обвинети за терористичко загрозување на уставниот поредок и безбедноста. Повторениот судски процес доаѓа откако Апелацискиот суд во Скопје во април годинава ја укина првостепената пресуда на Основниот кривичен суд, а предметот го врати на повторно судење.
Со првичната пресуда од Основниот кривичен суд во Скопје за делото терористичко загрозување на уставниот поредок и безбедноста на шест и пол години казна затвор беше осуден Трајко Вељаноски, на по шест години и три месеци беа осудени Спиро Ристовски и Миле Јанакиески, додека Владимир Атанасовски доби шест години затворска казна.
