Викендов, од 26 до 28 април се организира второто издание на Стартап Викенд Охрид, настан кој е најголем од ваков тип во државата, а кој започна вчера попладне и ќе трае до утре (недела) вечер. Идејата е учесниците да ги преточат своите идеи во бизнис решенија, односно прототипи.
Организатор е Стартап Македонија, а Универзитетот за информатика „Св.Апостол Павле” е домаќин на настанот.
Младите професионалци презентирале околу 20 идеи пред менторите и останатите учесници на настанот.
Откако сите ги презентирале своите идеи, следувало гласањето, а учесниците чии идеи отпаднале, се приклучиле на учесниците чии идеи продолжиле понатаму, при што се формирале тимови.
„Откако беа формирани тимовите, се одржа работилница за Бизнис модел канвас, на која што се разговараше за важнста и суштината на овој модел. Тимовите започнаа со работа на своите идеи во текот на ноќта, сѐ до финалното гласање, кое што е закажано во недела попладне. Нивната задача е да ги преточат своите идеи во бизнис решенија, односно прототипи“, раскажуваат организаторите.
Во текот на вториот ден, тимовите ќе имаат и менторска поддршка од различни области кои ќе ја понудат својата експертиза, со цел да им помогнат на тимовите да дојдат до подобри прототипи.
„Нашата идеја е Omnilyst, воглавно тоа ќе биде платформа специјализирана за контент креатори и инфлуенсери. Искуството на целиов стартап викенд е доста едукативно, поради тоа што има многу голем број на информации на интернет, што може да ги најдеме и што може само да нè збунат во процесот на самата креација на бизнис. Фасилитаторот беше тука за да нè насочи и да ни помогне полесно да креираме еден квалитетен стартап бизнис“, вели Милента Петковска, учесник на Стартап Викенд и дел од тимот на Ommn.
