Вкупно 39 години затвор добија обвинетите за случајот Ласкарци, на денешното објавување на првостепената пресуда во Основниот кривичен суд.
Тие беа прогласени за виновни оти не се придржувале до стандардите за превоз на патници и со тоа предизвикале опасност по животот и здравјето на патниците.
„Станува збор за една од најголемите сообраќајни несреќи која длабоко ја потресе пошироката македонска јавност“, рече судијката Дијана Груевска при изрекувањето на пресудата.
Највисока затворска казна доби возачот на автобусот, Маноил Трифиновски – 14 години казна затвор. На казна затвор од 4 години осуден е Дурмиш Белули, сопственикот на компанијата Дурмо турс. Затворски казни од по 5 години беа пресудени за Игор Ѓорѓиевски, Горан Дуковски и Јане Бобаровски, вработени во станицата за технички преглед. Одговорното лице во Дурмо турс, Ремзи Мифтари беше осуден на 6 години затвор.
Во сообраќајната несреќа кај Ласкарци загинаа 16 лица, откако автобус на „Дурмо турс“ излета од патот Скопје-Тетово во 2019 година. Во несреќата беа повредени 38 луѓе.
За две недели се навршуваат точно 5 години од стравотната несреќа.
