Денеска ќе се повлечат првите вработени кои се роднини на припадници на СДСМ


Скопје, 19 февруари, 2019 - 13:34 (META) 

Денеска ќе се случат првите повлекувања на вработените за кои јавноста оцени дека станува збор за непотизам, и се блиски на партиски припадници на СДСМ, одговори министерот за информатичко општество и јавна администрација, Дамјан Манчевски на новинарско прашање во врска со овој вид вработувања.

Тој не кажа, конкретно кои се имињата кои ќе се повлечат.

– Главната реформа е што воведуваме Закон за висока раководна служба која ќе треба да има за цел, деполитизација на институциите. Главната изборна комисија ќе биде составена освен од членови од инститциите, и од надвор. Законското решение ќе биде претставено до крај на февруари. Со него ќе се воведе и бројач на ограничени вработувања на одредено време – рече Манчевски.


Заев и Ахмети не се договорија за заеднички кандидат, се договорија дека може да го имаат


Скопје, 18 февруари, 2019 - 14:21 (META) 

Сега немаме договор за заеднички, консензуален претседателски кандидат, но заклучивме дека има основа да излеземе со таков кандидат. Тоа по партиските консултации неделава повторно ќе биде предмет на разговор, откако ќе поминат партиските консултации, порача премиерот и претседател на СДСМ, Зоран Заев, по денешната средба со претседателот на ДУИ, Али Ахмети.

На средбата на врвот на двете партии – коалициски партнери во Владата, се зборувало за повеќе можни имиња за заеднички претседателски кандидати, но Заев не сакаше да наведе ниту едно до тие имиња.

-Заклучивме дека е важно, заради иднината на државата, заради концептот „Едно општество за сите“, заради можноста повторно да се испрати пораката на единство меѓу граѓаните, да посветиме внимание на изнаоѓање на можност за застанување зад заеднички кандидат. Ние лидерите тоа го посакуваме, но секако нашите органи и тела ќе го кажат тоа. Ќе отвориме постапка во партиите, да видиме дали и таму постои тој амбиент. Секако, ова е вредна шанса, можеби ќе успее, можеби нема да успее, но шансата како шанса треба да ја имаме, затоа што верувам дека, прво, ќе ги отклониме сите шпекулации пред втор круг, дали има тајни договори, кој што дава, кој што изгубил, кој примил – ако застанеме сите зад заедничко име за кандидат за претседател на државата – рече претседателот на СДСМ.

Прашан дали и самиот размислува да се кандидира, Заев рече дека засега останува во извршната власт, но јасно не ја исклучи можноста дека би можело и тој да биде кандидат..

– Знаете дека сум јас пред сè економист, сакам да се посветам на економијата и на реформите коишто претстојат, ова е важен процес за Република Северна Македонија, така што засега, сè до изборот на официјалниот кандидат, останувам да работам во извршната власт – рече Заев.


Заев со Ахмети денеска ќе разговара за консензуален претседателски кандидат


Скопје, 18 февруари, 2019 - 10:02 (META) 

Зоран Заев како претседател на СДСМ и во име на коалицијата денеска ќе разговара со претседателот на ДУИ, Али Ахмети за можен заеднички, односно консензуален кандидат за претседателските избори.
Средбата ќе се одржи денеска во 12.30 часот во Клубот на органите на државната управа (порано познат како Клуб на пратениците) .

Претходно ДУИ реши на претседателските избори да излезат со свој кандидат, но сепак кажа и дека е отворена за  предлозите што би дошле од СДСМ.

Синоќа СДСМ со партиите од нејзината коалиција одржаа прв состанок на тема консензуален претседателски кандидат. На средбата не беше претседателот на ЛДП, Милевски кој најави дека на изборите ќе одат со свој кандидат.

Според соопштението од средбата, била постигнатаначелна согласност на лидерско ниво партиите од коалицијата предводена од СДСМ да застанат зад заеднички кандидат за претседател на државата, како и заеднички да настапат на претстојните претседателски избори.

Коалициските консултации за кандидатот продолжуват.


СДСМ и Коалицијата постигнаа согласност за заеднички кандидат за претседател


Скопје, 18 февруари, 2019 - 9:45 (META) 

Постигната е начелна согласност на лидерско ниво, партиите од Коалицијата предводена од СДСМ да застанат зад заеднички кандидат за претседател на државата, како и заеднички да настапат на престојните претседателски избори, уште во првиот круг, информираа од партијата.

„Договорено е да продолжат пошироки консултации во рамки на самите партии, кои се дел од коалицијата, за избор на најсоодветен заеднички кандидат за претседател на државата, во интерес на граѓаните. Претседателот на СДСМ, Зоран Заев, во име на Коалицијата, ќе ги продолжи консултациите со партиите од албанскиот блок во владината коалиција, како и со други парламентарни и вонпарламентарни партии, од власта и опозицијата, околу можностите да се дојде до заеднички кандидат за претседател на државата, кандидат за кој што ќе застанат граѓаните“, се вели во соопштението.


„Вистиномер“: Како Мира „Дизел“ го засени НАТО


Скопје, 13 февруари, 2019 - 17:27 (META) 

Ако се гледа според бројот на наслови по интернет медиумите пратеничката од СДСМ, Мира Стојчевска, дебело ги засени сите настани изминативе неколку дена. Пратеничката позната во јавноста како Мира „Дизел“, целосно ги преклопи исклучително важните случувања за нашата држава , какви што се: официјалното стапување во употреба на новото име на земјата – Република Северна Македонија и свеченото кревање на знамето на НАТО пред Владата, се вели во анализата на „Вистиномер.мк“.

Опозицијата најпрво обвини дека пратеничката на СДСМ, Мира „Дизел“ Стојчевска, викана така поради наплатата на високите патни трошоци, го вработила синот во владината ЕЛЕМ, а потоа излегоа со информација дека нејзиниот брат се вработил во РЕК Битола. Денес пак, беше пласирана нова информација од серијалот „Мира Дизел“ – дека и сопругот на Стојчевска, наводно, пред еден месец е унапреден во командир на Шумската полиција во Делчево!

По социјалните мрежи, неверојатно инспирирани од оваа ситуација, се ширеа шеги со препознатливиот хумор:

  • Во утрешната штампа ќе читате: Кучето на Мира Дизел вработено во гранична полиција.
  • Бонева не знаеше дека синовите купиле станови, пратеничката Стојчевска не знаела дека синот се пријавил на оглас. Гледате што се случува кога не комуницираат родителите и децата?
  • На интервју за работа: – А ти чие дете си?
  • АВРМ: Агенција за Вработување Роднини на Мира.

Заев на свеченоста по повод подигнувањето на знамето на НАТО пред Владата говореше дека сме излегле од судбината, дека нашата татковина успеа, дека е на вистинскиот пат кон прогресот и кон непречен развој, дека не чека тешка работа во следните месеци и години …

Но, Мира „Дизел“ беше погласна од премиерот! Таа ги „надгласа“ сите вести ! Немаа пробив ниту информациите за тоа дека на свеченоста пред Владата не биле поранешниот претседател Бранко Црвенковски и актуелниот шеф на државата Ѓорѓе Иванов.

Деновиве Мира беше Крлеуша!

Ако ова му го смислиле на Заев од вмровската ПР кујна за да му го минимизираат настанот: браво за нив! Заев треба да им понуди работа.

Ако пак, сето ова било случајно (а, старите удбаши велеа дека ништо не е случајно), Заев и СДСМ треба да преиспитаат конечно колку штета им носат сите „дизелаши“, не само во вакви свечени моменти, туку и кај утрешните гласачи.

А избори идат!


Мицкоски: СДСМ и Заев избегаа од избори, но народот ќе ги порази


Скопје, 13 февруари, 2019 - 9:54 (META) 

Лидерот на ВМРО-ДПМНЕ, Христијан Мицкоски, по одлуката на СДСМ да не распише вонредни парламентарни избори, порача дека Зоран Заев и СДСМ избегале од избори, ама дека нема да избегаат од волјата на народот.

„СДСМ е во страв и хаос. Многу брзо ќе се соочат со вистината на сопствениот неуспех. Колку и да бегаш Заев ќе те победам на парламентарни избори, затоа што народот ќе ве порази, ќе ја вратиме честитоста на нашата земја, Македонија ќе победи“, напиша Мицкоски на неговиот „Фејсбук“ профил.

ВМРО-ДПМНЕ бараше предвремени парламентарни избори да се одржат заедно со претстојните претседателски избори оваа пролет.

Синоќа Извршниот одбор на владејачката СДСМ одлучи да нема предвремени парламентарни избори, бидејќи граѓаните очекуваат спроведување на реформи.

-Веќе сме дел од НАТО, очекуваме датум за преговори со Европската Унија и реализирање на потребните реформи. Одговорна партија, одговорна власт, не би ја загрозила таа шансата, не би го загрозила датумот за преговори во Европската Унија со предвремени избори и стопирање на реформите – рече партискиот портпарол Костадин Костадинов.


СДСМ одлучи да не оди на предвремени парламентарни избори


Скопје, 13 февруари, 2019 - 9:22 (META) 

Извршниот одбор на СДСМ одлучи да нема предвремени парламентарни избори, заедно со претстојните претседателски избори, како што бараше опозицијата. Портпаролот Костадин Костадинов по завршување на седницата синоќа изјави дека, граѓаните бараат резултати во економијата, реформите и интеграциите.

„Државотворна партија на која на прво место и се интересите на граѓаните и државата не мисли на предвремени избори дури и кога рејтингот и поддршката од граѓаните е многу повисока од онаа на опозицијата. Како одговорна влада најавивме економска година, создавање силна економија која отвора шанса за сите. Економијата е раздвижена и стабилизирана, платите растат, се зголемуваат инвестициите, се отвораат нови работни места, се повеќе пари завршуваат кај граѓаните.Тоа е добра основа за засукување на ракавите и посветување на резултат што го бараат граѓаните, на се она што е потребно за подобар животен стандард на сите наши граѓани“, рече Костадинов.

За претседателските избори тој додаде дека Република Северна Македонија ја очекуваат кристално чисти, фер и  демократски претседателски избори на кои ќе победат граѓаните, ќе победи СДСМ.

„Извршниот одбор на СДСМ го овласти претседателот на партијата, генералниот и организациониот секретар, да направи консултации со коалициските партнери како и со други парламентарни и вонпарламентарни партии, за да дојдеме до консензуален кандидат за претседател на државата, заеднички да застанеме зад кандидат за кој што ќе застанат граѓаните“, додаде Костадинов.


Џафери денеска треба да ги распише претседателските избори


Скопје, 8 февруари, 2019 - 10:57 (META) 

Претседателот на Собранието, Талат Џафери, денеска треба да ги распише претседателските избори. Првиот круг на изборите треба да се одржи на 21 април, додека вториот круг би бил на 5 мај.

Согласно Изборниот законик, не треба да поминат повеќе од 90 и не помалку од 70 дена од распишување на изборите до денот на нивно одржување. Мандатот на актуелниот претседател Ѓорѓе Иванов завршува на 12 мај.

Двете најголеми политички партии СДСМ и ВМРО-ДПМНЕ своите кандидати решија да ги избираат преку јавен оглас.

Огласот на ВМРО-ДПМНЕ траеше до крајот на изминатиот месец и на него се пријавија девет кандидати, а од нив еден ќе биде избран на Конвенцијата на 16 февруари во Струга.

СДСМ, пак, на Kонгрес на 3 март ќе го избере својот кандидат.

Доколку на изборите не се постигне цензус од 40 отсто во вториот круг, за шест месеци изборите ќе треба да се повторат, а во меѓувреме Џафери ќе ја врши функцијата претседател на државата за што вели дека е подготвен.

– Според Уставот не може да има празнина во функцијата. Тоа што сум презел одговорност да бидам претседател на Собранието тоа значи дека сум ја презел цела одговорност, а една од тие одговорности е и таа – рече Џафери на брифингот за новинари минатата недела.


СДСМ: Законот за пазарџиите одложен, ќе се бара прифатливо решение


Скопје, 29 јануари, 2019 - 9:41 (META) 

Парламентарното мнозинство предводено од СДСМ на вчерашната собраниска седница го одложи Законот за трговија на зелените пазари на една година, со цел да се најде соодветно и заемно прифатливо решение, порачуваат од партијата.

„Со одлагањето, се отвора простор за консултација и дебата помеѓу сите засегнати страни и без кој било да биде оштетен. Неопходно е институциите, продавачите и организаторите на пазарите на заедничка маса да дискутираат со цел да се подобри организацијата на работата на пазарите и да се дојде до решение со кое ќе бидат заштитени сите засегнати страни. Земјоделците, пензионерите и сите пазарџии да бидат спокојни, се работи за решение со кое секој ќе може достоинствено и чесно да заработи денар повеќе, но и решение кое истовремено ќе обезбеди начин за сузбивање на сивата економија“, велат од СДСМ.


Пратениците од СДСМ ќе гласаат против зголемување на платите на вицепремиерите


Скопје, 28 јануари, 2019 - 16:12 (META) 

Пратениците од СДСМ ќе гласаат против зголемувањето на платите на вицепремиерите, кога точката ќе дојде на дневен ред, порача Костадин Костадинов, пратеник и портпарол на СДСМ, одговарајќи на новинарско прашање на прес-конференцијата во Собранието.

Прашан зошто се спротивставиле на предлогот точката целосно да се исфрли, тој рече оти тоа го направиле за да имаат можност да гласаат против Предлог-законот за изменување на Законот за плата и други надоместоци на избрани и именувани лица во Република Македонија.

– Секако го одбивме барањето за повлекување од дневен ред на точката поврзана за платите на вицепремиерите од причина што ставот на пратеничката група на СДСМ и коалицијата дека поддржување на дополнителни бенефиции за вицепремиери нема да има. Значи ќе гласаме против оваа точка, тоа ќе го докажеме и со самото гласање кога точката ќе дојде на дневен ред – рече Костадинов.

Тој смета дека бенефиции би требало има само за граѓаните.

– Дополнителни бенефиции за функционерите не се потребни, бенефиции ќе има исклучиво за граѓаните, тоа е јасна определба на СДСМ и коалицијата рече портпаролот на СДСМ.