Власта и опозицијата се препукуваат, граѓаните дишат отров


Скопје, 3 декември, 2018 - 10:28 (META) 

Синоќа речиси сите мерни станици на Министерството за животна средина покажаа неколку пати поголемо количество на канцерогените ПМ10 и ПМ2,5 честички.

Опозициската ВМРО-ДПМНЕ ја обвини власта дека е виновна што граѓаните се гушат од енормното загадување на воздухот, а од СДСМ велат дека Владата заедно со сите надлежни институции активно работи на надминување на долгогодишниот проблем со аерозагадувањето.

„Концентрацијата на опасните канцерогени ПМ10 честички е повеќе од пет пати над дозволеното, а Шилегов и Макрадули наместо итно да преземат мерки, ги омаловажуваат и замолкнуваат невладините активисти и граѓаните. СДСМ додека беа опозиција ветуваа итни мерки за почист воздух и манипулираа дека кога ќе дојдат на власт веднаш ќе го решат проблемот со загадувањето. Откако се сместија во удобните фотелји заборавија на своите ветувања и речиси две години немаат реализирано ниту еден проект за подобрување на воздухот“, велат од опозициската ВМРО-ДПМНЕ.

ВМРО-ДПМНЕ предлага да се обезбедат средства во буџетот и да се постават најмалку три дополнителни статични и четири мобилни мерни станици. Статичните да бидат поставени во близина на РЕК Битола, РЕК Осломеј во Кичево, како и Дрисла, а мобилните во Радовиш, Прилеп, Гостивар, како и во Петровец.

Од СДСМ велат дека во 2018 година постои намалување на бројот на деновите со надмината дозволена загаденост од 50 микрограми, споредено со 2016 и 2017 година.

„Според просекот од сите мерни станици во Македонија, во периодот од први јануари до 30 ноември 2018 година, регистрирани се 88 загадени денови, што е благо намалување во однос на 2016 и 2017 кога бројот на загадени денови бил 99. Претстои уште работа и затоа, Владата предводена од СДСМ, надлежното министерство, општините и сите останати засегнати институции постојано преземаат мерки за справување со загадениот воздух, со крајна цел, загадувањето за две години да биде намалено за 50 отсто во Скопје и од 30 до 50 отсто во цела Македонија“, велат од владејачката партија.


Мираковска: Се создаде законска можност да се отпишат долговите на граѓаните


Скопје, 28 ноември, 2018 - 14:35 (META) 

Пратеничката од парламентарното мнозинство предводено од СДСМ и коалицијата, Соња Мираковска денеска информираше дека со усвојувањето на Законот за отпишување на камата на долгови, создадена е можноста да се отпишат долговите кои со години ги мачат илјадници семејства во Македонија.

– Ова финансиско олеснување за граѓаните е конечно решение за граѓаните кои од 2011 година се соочуваат со огромни долгови по основ на камати за предмети, за кои не биле свесни ниту дека постојат, кога извршните предмети од судовите се пренесени кај нотарите, а потоа тие завршија кај извршителите. Покрај отписот на затезната односно казнената камата, која се однесува на главниот долг и на трошоците на постапката за комунални дејности, електрична, топлинска енергија, вода и смет, телефонија, мобилни и кабелски оператори, одржување на заеднички простории, наводнување и одводнување на земјоделско земјиште, во Законот постои можност и за отпишување на каматите и за долговите за телевизија – рече Мираковска.

Таа додаде дека истовремено со законското решение се намалуваат и трошоците на постапката, кои не можат да бидат повисоки од 20 проценти од нивните предјавени и утврдени трошоци.

– Се намалува и надоместокот што должниците го плаќаат на извршителите, нотарите и адвокатите за овие предмети.Право на отпис на камата ќе може да оствари секој граѓанин должник, кој ќе го плати главниот долг и трошоците на постапката во рок од 12 месеци откако доверителите ќе донесат одлука за отпишување на каматите за наплата на долговите. Ваква Одлука доверителите се должни да донесат во рок од 10 дена од стапувањето на сила на овој Закон – додаде таа.


Партиите бараат во пописот да се вклучи етничката припадност


Скопје, 22 ноември, 2018 - 10:38 (META) 

Предлогот на директорот на Државниот завод за статистика, Апостол Симовски во пописот од 2020 година да нема изјаснување за верската и етничката припадност на населението предизвика негативни реакции, главно кај албанските партии, со оглед на тоа дека Република Македонија е мултиетничката држава, но и непостоење на регистрација, известува Порталб.мк“.

ДУИ:

Формиравме партиска комисија со луѓе со искуство и знаење во овој поглед, која ги анализира сите аспекти на пописот. Оваа недела Комисијата ќе се сретне со раководството на Заводот за статистика за да ги слушне нивните идеи и ќе продолжи со бројни состаноци, анализи и потоа ќе искаже својот став за организирањето на овој важен процес – велат од ДУИ.

Алијанса за Албанците:

Алијансата за Албанците, се категорични против предлогот, проценувајќи дека нема причина поради која на пописот на населението не треба да има изјаснување на етничката припадност.

АА не прифаќа таков попис, бидејќи не гледа ниту причина да нема графа за етничка и религиозна припадност. Алијансата ќе се обиде да ги побие тврдењата дека етничката и верската припадност не се значајни, апелираме до сите Албанци да не го потпишат е поништувањето на идентитетот на Албанците – вели потпретседателот на АА, Елми Азири.

БЕСА (Гаши):

Сметаме дека недостатокот на пописот од 2002 година веќе имплицира таква определба. Треба да знаеме кој и колку е во оваа држава. Ако оваа држава во преамбулата е дефинирана според етничката припадност, не гледаме причина зошто во пописот треба да се кријат етничките идентитети. Во тој случај би требала да се договориме во преамбулата “Македонија да биде држава на граѓаните”, и на ниту една определена етничка групаМислиме дека етничката припадност е важна за иднината на земјата, уште повеќе што етничкиот идентитет не се менува со јазичниот идентитет – вели Орхан Муртезани од движењето Беса чиј претседател е Африм Гаши.

БЕСА (Касами)

Во сите земји во светот пописот е статистички процес, додека кај нас е политички бидејќи колективните права на Албанците во многу сегменти се поврзани со процентот. Затоа сакаме да ги отстраниме навредливите термини од уставот и откако ќе ги регулираме отворените прашања на Албанците тогаш нема да има проблем да се реализира статистички процес кој исто така треба да го содржи графата на етничките заедници што живеат. Предлогот на Заводот за статистика е неодмерен и остава простор за сомневање дека со ова се подготвува сценарио на штета на Албанците. Движењето Беса ќе се ангажира со сиот капацитет во пописот да се содржи и етничката и религиозната припадност и да се реализира откако Албанците да бидат соодветно потставени во раководни позиции – вели Елмедин Мемиши, портпарол на движењето Беса со претседател Билал Касами.

НДП:

Весел Мемеди од Националната демократска преродба (НДП), вели дека Албанците немаат дилема дека етничката припадност е тема од суштинско значење, а законот за регистрација го усвојува Собранието, а не Заводот за статистика.

Законот за регистрација го усвојува Собранието, а не Заводот за статистика. Конкретна акција се води во Парламентот, а не на социјалните мрежи. Јавноста треба да разбере кои се суштинските теми што ги бара ЕУРОСТАТ и кои се секундарните. Ништо од тоа што се говори во јавноста не е суштинска тема за ЕУРОСТАТ, вклучувајќи го и јазикот, и затоа нема потреба за паника. За Албанците, не постои дилема дека етничката припадност е суштинска тема, и никој не се сомнева во тоа – вели Мемеди.

„Порталб.мк“, исто така, побара мислење и од ДПА, но тие не беа достапни. 

СДСМ:

Владејачкиот Социјалдемократски Сојуз на Македонија (СДСМ) смета дека е “логично во пописот да се вклучи и етничката припадност”, додека опозицијата ВМРО-ДПМНЕ вели дека немаат став, но дека оваа идеја според нив е “чудна и опасна“.

Ова е предлог на Државниот завод за статистика, станува збор за тестирање на системот пред спроведување на општиот попис. До крајот на оваа година, Владата треба да подготви нов предлог-закон за попис. Според нас, како СДСМ, пологично е да имаме графа на етничка припадност – вели портпаролот на СДСМ, Костадин Костадинов.

ВМРО-ДПМНЕ:

Во овие денови ќе се состаната органите на ВМРО-ДПМНЕ и ќе излезат со конечен став во врска со графата националност. Она што можам да го кажам сега е дека ова чудно и опасно – вели портпаролот на ВМРО-ДПМНЕ, Димче Арсовски.

Инаку, минатата недела директорот на Заводот за статистика изјави дека пописот на населението ќе се спроведува од 1 до 21 април година од 2020 година и нема да ја содржи графата за етничка и верска припадност, бидејќи според него, овие графи се злоупотребени за политички цели. За да се разбере припадноста на граѓанинот, ќе се праша кој јазик му е мајчин јазик.

За пописот на населението ќе бидат ангажирани околу пет илјади лица, и овој пат ќе се користи комбиниран метод, што значи дека покрај користењето на теренските податоци ќе се користат и податоци од регистрите. Се проценува дека за овој процес ќе бидат потребни околу 8,5 милиони евра.

За да се спроведе пописот, Владата прво треба да усвои нацрт-закон, а потоа истиот да се усвои во Собрание.

„Порталб.мк“, го контактираше владиниот портпарол, но тој сè уште не прецизира до каде е процедурата за нацрт-законот. Нацрт-законот за попис официјално ќе биде подготвен од Министерството за правда до 31 јануари следната година. Откако ќе се подготви истиот треба да биде ставен на увид на јавноста во Електронскиот национален регистар, каде што ќе биде отворен за дискусија и јавен надзор 20 дена. Потоа, истиот ќе треба да се достави во Влада за усвојување, а потоа ако владата го усвои, ќе биде испратен во собраниска процедура. Последниот попис на населението во Македонија беше реализиран во 2002 година, а во 2011 година започна, но не беше реализиран.


Анкета: Заев со највисок рејтинг, СДСМ има најмногу доверба кај Албанците


Скопје, 22 ноември, 2018 - 10:00 (META) 

Мнозинство од граѓаните, односно 66,9 отсто се против амнестија, а 58,9 отсто се против предвремени избори покажува најновата анкета на телевизија „Телма“ и невладината МЦМС.

Што се однесува до амнестија за обвинетите и учесниците во настаните од 27 Април во Собранието, 57,8 отсто не се согласуваат со амнестија, 37 проценти се согласуваат.

Анкетата покажува дека премиерот Зоран Заев е во убедливо водство со 21,4 отсто рејтинг. Лидерот на ВМРО-ДПМНЕ, Христијан Мицковски е зад него со 14 процентни поени, со раст во личниот рејтинг и прв пат над претседателот Ѓорге Иванов чиј рејтинг е во пад и застанува на само 6 отсто. Следува Ахмети со 5,7, Села 3,8 отсто, и избеганиот Никола Груевски кој е во слободен пад со 2,7 отсто, рејтинг во рамките на статистичките грешки.

Големата поддршка на Заев доаѓа и од популарноста кај Албанците – со 17,6 отсто поддршка тој е втор лидер по популарност кај етничките Албанци. Прв е лидерот на ДУИ, Али Ахмети со 23 отсто , а трет Зијадин Села со 16 проценти. Највисока е бројката кај оние кои немаат доверба во ниту еден политичар – 39,9 проценти.

Според истражувањето, рејтингот на СДСМ расте, додека на опозициската ВМРО-ДПМНЕ паѓа. Владејачката партија има 26,8 отсто, 21,5 проценти се изјасниле за ВМРО-ДПМНЕ, за ДУИ 6,7 отсто, потоа е Алијансата со 3 проценти, БЕСА со 2,4 додека нема да гласаат 21,3 отсто.

Според етничка припадност. ВМРО-ДПМНЕ има водечки рејтинг кај Македонците – 30,4 отсто со пет процентни поени пред СДСМ која 25,5 проценти. СДСМ е прва партија кај Албанците со 27,5 отсто, додека ДУИ е втора со половина процент помалку.


СДСМ: Сите соучесници вмешани во бегството на криминалецот Груевски мора да одговараат


Скопје, 14 ноември, 2018 - 14:10 (META) 

Пред две недели антинародниот пион Христијан Мицкоски, јавно, во интервју на „Алсат-М“ призна дека имал повеќечасовна средба со неговиот ментор, осудениот криминалец Никола Груевски, рече денеска на прес-конференција портпаролот на СДСМ, Костадин Костадинов како реакција на соопштението на ВМРО-ДПМНЕ.

– На таа средба, според признанието и зборовите на Мицкоски разговарале за „иднината“ и „личните моменти“ на осудениот Никола Груевски. Јавноста, основано се сомнева дека пионот Мицкоски и антизападното раководство на ВМРО-ДПМНЕ, знаеле за планот на Груевски. Антизападниот пион Мицкоски пред граѓаните треба да одговори дали токму на таа средба било испланирано бегството на Груевски? Ние, како и граѓаните, отворено се сомневаме дека досегашната одбрана на криминалот на Груевски од страна на Мицкоски и антизападното раководство на ВМРО-ДПМНЕ е во функција да му помагнат во неговиот план. Вклучувајќи го тука и бегството – рече Костадинов.

Тој додаде дека нема никаков политички прогон, туку спроведување на правда и правна држава и го повика Основното јавно обвинителство да отвори истрага и целосно да се расветли случајот и да се лоцираат сите виновници.

– Сите сочуесници вмешани во бегството на криминалецот Груевски мора да одговараат пред законите – рече Костадинов.


СДСМ: Eкономијата е стабилизирана и се движи во добар правец


Скопје, 2 ноември, 2018 - 16:18 (META) 

Економска катастрофа беше 11-годишното криминално и расипничко владеење на ВМРО-ДПМНЕ предводено од носителот на криминалот Никола Груевски, кога економијата се уништуваше, а граѓаните се осиромашуваа за да се оствaрат криминалните апетити на Груевски и неговите соработници, се вели во реакцијата на СДСМ на прес-конференцијата на портпаролот на ВМРО-ДПМНЕ, Димче Арсовски.

„За разлика од таквиот пристап на ВМРО-ДПМНЕ предводено од Груевски, Владата предводена од СДСМ работи домаќински и одговорно управува со парите на граѓаните. Последен доказ за тоа е усвојувањето на анекс-договорот со компанијата „Синохидро“ преку кој се решаваат проблемите со автопатот Кичево-Охрид и се заштедуваат 95 милиони евра од буџетот“, се вели во соопштението на СДСМ.

Во него се додава дека „извештајот на Народната банка нотира дека последните проекции укажуваат на здрави и солидни основи на домашната економија, со потенцијал за солиден раст, поддржан и од кредитната активност на банките, како и интензивирање на економскиот раст во следните три години.“

„Преку одговорно управување со финансиите, Владата предводена од СДСМ, успеа да го стави јавниот под контрола, фреквенцијата на задолжувања е намалена, а каматните стапки за задолжувања се далеку пониски од каматните стапки од задолжувањата за време на криминалното владеење на ВМРО-ДПМНЕ. Истовремено, бројни економски параметри како растот на платите, порастот на извозот, потрошувачката и индустриското производство, рекордниот број на странски инвестиции, јасно покажуваат дека економијата е стабилизирана и се движи во добар правец“, се додава во соопштението.


На седницата за уставни измени пак кавги за референдумот и за Договорот од Преспа


Скопје, 15 октомври, 2018 - 14:25 (META) 

Собраниската седница за уставни измени минува во меѓусебни препукувања помеѓу власта и опозицијата за Договорот од Преспа. Од владејачкото мнозинство велат дека имплементирањето на Договорот e за Македонија да излезе од изолација и да има подобра иднина. Пратениците на ВМРО-ДПМНЕ тврдат дека Владата нема мандат да го менува Уставот и дека Договорот со Грција не е добро решение.

Пратеникот од ВМРО-ДПМНЕ, Илија Димовски рече дека Македонија нема друг правец освен ЕУ и НАТО, но дека постојат алтернативи како тоа да се постигне.

– Алтернативата е да му ја одземеме власта на Заев затоа што излезе од својот мандат и да побараме стратешко партнерство со ЕУ и НАТО, сè до целосно решавање на ова прашање – рече Димовски.

Координаторот на пратеничката група на СДСМ, Томислав Тунтев  ги повика пратениците на ВМРО-ДПМНЕ да отидат кај нивниот лидер Христијан Мицкоски и да го убедат дека сега е моментот за подобра иднина на оваа земја.

За иднина се потребни храбри визионерски лидери, смета Артан Груби од ДУИ и им порача на пратениците да не мислат на следните избори, туку на следните генерации.

Координаторот на пратеничката група на ВМРО-ДПМНЕ, Драган Данев вели дека нема ниту можност ниту волја да гласа против волјата на граѓаните изразена на референдум, кој го оцени за неуспешен.

Претседателот на Собранието Талат Џафери даде пауза за ручек по што продолжува расправата за уставните измени.


Вечерва ќе заседаваат Извршниот одбор на СДСМ и Извршниот комитет на ВМРО-ДПМНЕ


Скопје, 3 октомври, 2018 - 16:52 (META) 

Извршниот одбор на СДСМ вечерва ќе заседава за да ја разгледа ситуацијата по референдумот и да ги утврди следните чекори како и да расправа за можните предвремени парламентарни избори. Истовремено и ВМРО-ДПМНЕ вечерва ќе одржи седница на Извршниот комитет на партијата на која ќе се разгледува актуелната ситуација. Утре се очекува седница да има и Централниот комитет на најголемата опозициска партија.

Најтесното раководство на владејачката партија ќе заседава уште вечерва во партиското седиште, а во игра е и седница на Централниот одбор, за членовите на ова тело да го овластат партискиот лидер Зоран Заев да презема активности за разрешување на ситуацијата која настана по недоволниот одѕив на референдумот, со тоа што или ќе се постигне договор за соработка со опозицијата или ќе се поднесе иницијатива за распуштање на парламентот.

Лидерот на ВМРО-ДПМНЕ Христијан Мицкоски, за предвремени избори бара формирање техничка влада, јавен обвинител на предлог на опозицијата и Анкетна комисија за референдумот.

За уставни промени е потребно двотретинско мнозинство во Собранието, односно да гласаат 80 пратеници, а владејачката коалиција во моментов има поддршка од 71 пратеник, така што недостига поддршка уште од девет пратеници од опозицијата.

Министерката за правда, Рената Дескоска информираше дека во Министерството за правда не пристигнал предлог за уставните измени произлезени од имплементацијата на Договорот од Преспа.

– Треба да се донесат одлуките дали ќе се оди на предвремени избори или на уставни измени ако се обезбеди мнозинството. Почетната процедура во подготовка за измена на Уставот не подразбира веднаш да се почне со уставни амандмани, коишто се технички драфтирани, туку со предлог за измена на Уставот, којшто е во описен текст – вели Дескоска.


Мицкоски: Заев не треба да се подготвува за предвремени избори туку за политичка пензија


Скопје, 30 септември, 2018 - 22:12 (META) 

Зоран Заев не треба да се подготвува за предвремени избори туку за политичка пензија, одговори лидерот на ВМРО-ДПМНЕ на новинарско прашање во однос на изјавата на премиерот Зоран Заев дека очекува пратениците на ВМРО-ДПМНЕ да ја почитуваат одлуката на граѓаните на референдумот, во спротивно ќе мора да се оди на предвремени парламентарни избори.

Мицкоски не се изјасни конкретно, дали ВМРО-ДПМНЕ ќе прифати предвремени избори доколку Договорот не помине во Собранието.

Според него, референдумот е неуспешен и за тоа единствен виновник е Зоран Заев и штетниот Договор со Грција.


ВМРО-ДПМНЕ обвини за притисоци, според СДСМ се гласало и демократски


Скопје, 30 септември, 2018 - 18:23 (META) 

Портпаролот на ВМРО-ДПМНЕ, Наум Стоилковски, обвини дека „СДСМ прави изборен криминал на организиран начин.“ Тој додаде дека „СДСМ го прекршила молкот и ги насочила избирачите како да постапат“.

„Во текот на вчерашниот и денешниот ден се испраќаат и смс пораки од телефонскиот број 071/290-116. Јавното обвинителство мора уште веднаш да постапи и да утврди кој го поседува и бројот 075/232-352 од каде се јавувале и да извади листинг каде се биле испраќани пораки и кај кого се била вршена агитацијата. Постојат сериозни сомнежи за сторено кривично дело по член 160 од КЗ „Повреда на слобода на определување на избирачите“ за кое што е запишана казна затвор во времетраење од најмалку три години“, рече Стоилковски.

Од СДСМ реагираа на пресот на Стоилковски и велат дека „во врвот на ВМРО-ДПМНЕ се нервозни, бидејќи и покрај бојкотот што го заговараше раководството на партијата, пратеници и членови на ВМРО ДПМНЕ излегуваат на референдум и гласаат“.

Од таму додадаваат дека „граѓаните на денешниот референдум гласаат слободно, без притисоци и без закани, во слободна и демократска атмосфера“.