!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Контраспин: Собранието можело да разрешува министри, ама не смее да го разреши Зврлевски?!


Скопје, 15 август, 2017 - 11:41 (META) 

На 10.08.2017 година ВМРО-ДПМНЕ поднесе интерпелација за работата на министерот за финансии Драган Тевдовски. Ваквиот потег на најголемата опозициска партија, којшто го сметаме за спинерски, на прес-конфернција го образложи пратеничката Лилјана Кузмановска,  која, меѓу другото, рече:

Спин: Министерот за финансии односно министерот за кратење и задолжување Драган Тевдовски со своето конфузно, неодговорно и некомпетентно работење во овие седумдесетина дена откако ја извршува оваа функција докажа пред нас пратениците и целата македонска јавност дека е поставен од страна на Зоран Заев единствено со цел да ги споведува погубните политики на СДСМ…

Поради демонстрираното незнаење и неспособност да ја извршува оваа фукција сметаме дека е потребно што поскоро Драган Тевдовски да замине од функцијата министер за финансии и на негово место да дојде способен министер кој што нема да прави катастрофални грешки во работењето. Македонија не може да си дозволи неспособен човек на оваа клучна позиција.

[Извор: веб – страница на ВМРО-ДПМНЕ, Датум: 10.08.2017]

Kontraspin-foto-Vistinomer-1024x281

Контраспин: Ова досега (11.08.2017), е четврта интерпелација поднесена од ВМРО-ДПМНЕ во Собранието, иако Владата предводена од СДСМ сè уште нема 100 дена. Освен за министерот за финансии, Драган Тевдовски, опозицијата претходно поднесе интерпелации и за  министерот за надворешни работи Никола Димитров (09.08.2017), за министерката за труд и социјална политика Мила Царовска (08.08.2017) и за министерот за земјоделство, шумарство и водостопанство Љупчо Николовски (07.08.2017).

Ваквите иницијативи на ВМРО-ДПМНЕ, со кои се бара Собранието да ги  разреши министрите,  делуваат во најмала рака чудно, бидејќи токму ВМРО-ДПМНЕ се противи Парламентот, сега откако се распишани локалните избори, да расправа за разрешување на еден друг државен функционер – јавниот обвинител Марко Зврлевски! Значи, според ваквите двојни аршини на ВМРО-ДПМНЕ државниот обвинител Зврлевски не смее да биде сменет, бидејќи е предизборен период и тоа според партијата, ќе значи кршење на Изборниот законик (член 8-а). Но, истиот тој Закон не е пречка Собранието да разреши неколку министри и потоа на нивно место да избере нови!

Фактички имаме една целосно нелогична ситуација. Од една страна се тврди дека:

Парламентарното мнозинство свесно влегува во кршење на Изборниот законик, бидејќи „членот 8-а од Изборниот законик ги ставаат во мирување сите вакви постапки“ (разрешување н.з.) (Илија Димовски)

Од  денот на донесување на одлука за распишување на избори до завршување на изборот и на самите избори, постои законска пречка да се разрешуваат и именуваат директори на органи на државна управа и други државни институции за кои што владата има надлежност (Антонијо Милошоски)

А, од друга страна, се бара истото парламентарно мнозинство и во истиот, наводно, проблематичен (изборен), период да разреши четворица министри!

И токму ваквото поставување и гледање на работите претставува хипокризија. Значи, нема законска пречка Собранието да смени неколку членови на Владата, но има таков правен проблем кога е во прашање Зврлевски. Па, сега се бара и мислење од Државната комисија за спречување корупција за примената на член 8-а, став 1, алинеја 4 од Изборниот законик, и додека ДКСК не се произнесе собраниската расправа за Зврлевски треба да се стави во мирување! Што, исто така, претсавува спинување на целата ситуација.

Иако, автентично толкување на закони не дава Анатикорупциската комисија, туку Собранието и тоа е утврдено со Уставот на РМ. Тоа е регулирано со  членот 68 од Уставот , каде што се наведени надлежностите на Собранието, при што, меѓу другото, е посочено:

Член 68

Собранието на Република Македонија:

– го донесува и изменува Уставот;

– донесува закони и дава автентично толкување на законите;

За ваквото нелогично барање на ВМРО-ДПМНЕ, поранешениот член на ДКСК, Драган Малиновски, во изјава за „Дојче Веле“ вели:

Што се однесува до иницијативата за ова прашање да се произнесе ДКСК, сметам дека за такво нешто нема никаква основа, имајќи предвид дека ова не е прашање кое е регулирано со Законот за спречување на корупцијата, ниту, пак, ДКСК има таква позиција кон Собранието. Се разбира, автентично толкување на Изборниот законик може да дава само Собранието, како негов донесувач. 

Ако се погледне Законот за спречување на корупцијата, поточно  членот 49, каде се прецизно наведени надлежностите на ДКСК, може да се види дека таму воопшто не е предвидено дека оваа Комисија има овластувања да толкува закони.

Несомнено дека тоа го знае и ВМРО-ДПМНЕ, особено пратениците со повеќегодишен пратенички стаж како Димовски и Милошоски, кои од уста „не го вадат“ Уставот. Димовски деновиве на прашањето на „Мета“дали не е контрадикторно да се тврди дека Зврлевски не може да биде сменет сега, а во исто време да се поднесуваат интерпелации, немајќи што да каже, штуро одговара:

„Интерпелацијата е уставна категорија“.

Така што, јасно е дека намерата на опозицијата не е да се расчисти некаква вештачки поставена дилема, туку идејата е, кога веќе не може да се спречи смената на Зврлевски, тогаш барем да се разлече собраниската постпака колку што е можно повеќе. Затоа и се (зло)употребуваат парламентарните механизми кои им стојат на располагање: процедурални јавувања, релики, паузи, барање за токлување на закони, поднесување интерпелации…


Контраспин: Груевски владееше „диктаторски“, за другите – ќе видиме


Скопје, 8 мај, 2017 - 14:33 (META) 

„Само диктатори се опираат до последно за да се симнат од тронот и да се согласат да заминат во опозиција. За тоа има премногу јасни показатели за целата домашна и меѓународна просветлена јавност“, пишува „Вистиномер“.

„Статусот на фејсбук-страницата на Никола Груевски е наменет за да укаже дека начинот на гласање и на устоличување на Талат Џафери за претседател на Собранието бил „брутално кршење на Уставот, законот и на деловникот на Собранието“ и дека тоа било кршење на начелото на владеење на правото. „Тоа во старт претставува диктатура“, вели Груевски, спинувајќи притоа дека сè околу изборот, вклучувајќи ја и идната влада, е нелегално.

Но, тој не го споменува целиот контекст. А, контекстот е многу важен, зашто ако некој, во случајот Груевски и покрај јасно декларираното парламентарно мнозинство за добивање мандат за состав на нова влада, изнаоѓа триста начини да не дозволи трансфер на власта, тогаш тој се однесува диктаторски“, појаснува „Вистиномер“.

(Целиот текст од „Вистиномер“ можете да го прочитате и да го преземете ТУКА)


ГРОМ со спинови го храбри Иванов за нови аболиции


Скопје, 26 јануари, 2017 - 11:52 (META) 

Пренџов од ГРОМ нема право кога вели дека „образложението на СЈО за тоа зошто се откажува од обвинителниот акт е обична „евтина манипулација“ со аргументи кои, наводно, само тие ги знаат и никој друг во државата“, а изјавата дека „критизерите на аболициите го губат моралното право да критикуваат евентуално нови аболиции од страна на Иванов“, ја сметаме за недоследна, пишува „Вистиномер“.

„Ваквиот став на ГРОМ претставен на прес-конференција што ја оддржа организациониот секретар на партијата, Љупчо Пренџов, го сметаме за недоследен, бидејќи де факто ѝ се обраќа на јавноста со порака дека Иванов не би требало да има морален проблем ако повторно објави некоја аболиција поврзана со истрагите или обвиненијата што ги спроведува СЈО. Се разбира, реченицата формално и де јуре е внимателно срочена, но де факто, пораката е таа – Претседателе, можете повторно да аболирате и никој не смее да ве критикува поради тоа“, се вели во анализата на „Вистиномер“.

(Целиот текст од „Вистиномер“ можете да го прочитате и да го преземете ТУКА)


Контраспин: Груевски ем се заканува на дипломати, ем бил прозападно ориентиран?!


Скопје, 20 декември, 2016 - 15:28 (META) 

Лидерот на ВМРО-ДПМНЕ, Никола Груевски, изминатиот викенд пред Државната изборна комисија (ДИК), читајќи го прогласот усвоен од партискиот извршен комитет, во кој најави дека партијата нема да учествува на евентуално прегласување, даде неумесна изјава во која остро ги нападна странските дипломати, пишува „Вистиномер“.

Оваа изјава на претседателот на ВМРО-ДПМНЕ, Никола Груевски, дадена пред насобраните партиски приврзаници пред ДИК, во која кажа дека „има информации за вмешување на некои странски претставници во правец на постизборен инженеринг“, ја сметаме за недоследна и за политички спин. Груевски, од една страна, вели дека нема да дозволи дипломати повеќе да се мешаат во внатрешните работи на Македонија, дека во иднина нема да учествува во преговорите помеѓу партиите доколку во нив се вклучени странски претставници, а, од друга страна, кажува дека ВМРО-ДПМНЕ била и ќе биде прозападно ориентирана партија, дека стратешка ориентација ѝ е членство во НАТО и во ЕУ и пријателство со САД!

Ваквиот настап на претседателот на владејачката партија е загрижувачки и претставува грубо извртување на вистината и на прв поглед изгледа чудно, дури збунувачки.

(Целиот текст од „Вистиномер“ можете да го прочитате и да го преземете ТУКА)


Контраспин: Кој работеше на поделби цело време


Скопје, 14 декември, 2016 - 10:28 (META) 

Тој што работеше на поделби на граѓанска, интраетничка и меѓуетничка поделба речиси десетина година, не може сега да повикува на намалување на јазот и на обединување околу заеднички цели, пишува „Вистиномер“.

Никола Груевски, лидер на ВМРО-ДПМНЕ, ја даде следнава изјава што „Вистиномер“ ја оценува како спин:

Спин: „Ќе бидеме фокусирани да се намали јазот помеѓу граѓаните, политичкиот јаз. СДСМ во желба да нè победи внесе многу гнев, многу омраза, многу голем јаз се создаде помеѓу македонскиот народ и граѓаните на Македонија, а понекогаш во некои моменти и помеѓу различните етнички заедници. Тоа треба да престане. И јас лично и новата влада и ВМРО-ДПМНЕ ќе работиме на намалување на тој јаз и на едно обединување со кое  сите граѓани ќе ја градиме Македонија како земја со многу повеќе работни места, повисок стандард и земја која ќе се движи кон Европската Унија“.

Контраспин: Никола Груевски веднаш по прогласувањето на прелиминарните резултати со проекцијата на пратенички места од страна на Државната изборна комисија, даде изјава за јавноста во која со помош на извртување на фактите, ја извртува вистината и спинува дека ќе работел на намалување на поделбата на граѓаните.

Груевски во изјавата детектирал две работи – првата е дека јазот е политички, но и дека постоела омраза, понекогаш дури и меѓу етничките заедници. Втората е, дека сето тоа го направил политичкиот противник СДСМ во кампањата за да ѝ наштетел на ВМРО-ДПМНЕ. Двете работи се невистина и извртување на фактите.

(Целиот текст од „Вистиномер“ можете да го прочитате и да го преземете ТУКА)


Контраспин: Трајко Вељаноски со лицемерна дефиниција за тоа што е национален интерес


Скопје, 24 ноември, 2016 - 19:10 (META) 

Точно е, како што вели Вељаноски, дека ќе се избира помеѓу концепт кој обезбедува сигурност и заштита на највисоките национални интереси и концепт кој води кон разградување на државата. Само уште да дефинира точно што се највисоки национални интереси, а што е лицемерие кое се затскрива зад нив, пишува „Вистиномер“.

Контраспин: Трајко Вељаноски, висок функционер на ВМРО-ДПМНЕ и дел од кандидатските листи на партијата за изборите на 11 декември, со очигледно потценување на фактите, прес-конференцијата ја заврши со недвосмислен спин околу тоа за што ќе се гласало на претстојните избори.

Најпрво, за делот од изјавата дека на 11 декември ќе се гласало за унитарна или за двојазична, федерализирана Македонија. Трајко Вељаноски и врвот на неговата партија немаат ама баш од никаде доволно силни аргументи да го потврдат овој спин, на кој – тоа веќе посериозните аналитичари го оценија – ќе инсистираат до крај на кампањата за овие избори, како, безмалку, единствена карта на која ќе се обидат да ги анулираат другите сериозни теми. Ова е така, затоa што ниту настапите на Заев на кои се повикуваат (околу двојазичноста), ниту пак, политичката програма што ја објави СДСМ, не нудат цврсти аргументи за тврдење од овој тип на Вељаноски, особено, пак, не за федерализација на Македонија.

(Целиот текст од „Вистиномер“ можете да го прочитате и да го преземете ТУКА)


КОНТРАСПИН: Министерство за финансии? Која е разликата меѓу Европа и ЕУ?


Скопје, 25 јули, 2016 - 14:08 (META) 

„Македонија е умерено задолжена земја и доколку се пресметаат средствата од еврообврзницата, во согласност со податоците на Еуростат, Македонија е меѓу десетте најмалку задолжени земји во Европа со јавен долг помал од 50 отсто од домашниот бруто-производ.“ (Извор: Министерство за финансии, Датум: 20 јули 2016 г.)

Во горниот извадок од соопштението на Министерството за финансии се соочуваме повторно, по којзнае кој пат, со една стара манипулација за компарирање на нивото на јавниот долг на Македонија со ваквиот долг на други земји, пишува „Вистиномер“. Кога јавниот долг беше понизок од овој што е денес, нашироко се кажуваше како имаме „четврт најмал долг во Европа“ и како сме „ниско задолжена земја.“ Сега, пак, како што јавниот долг се зголемува, се вели „Македонија е меѓу десетте најмалку задолжени земји во Европа“ и се додава дека сме „умерено задолжена земја“.

Со горниот извадок има редица проблеми. Како прво, Еуростат нема врска со Европа. Еуростат е статистичко биро на Европската Унија, а не на Европа. Европа, како што е познато, нема заедничко статистичко биро. Следствено на тоа, Македонија не може да биде меѓу „десетте најмалку задолжени земји во Европа“, „согласно податоците на Еуростат“, зашто Еуростат ниту има, ниту објавува такви податоци.

Тврдење кое може да се каже, а притоа да се употребат податоците на Еуростат во овој контекст, би можело да гласи вака:

„Во согласност со податоците на Еуростат, Македонија е меѓу десетте најмалку задолжени земји споредено со членките на Европската Унија“.

(Целиот текст од „Вистиномер“ можете да го прочитате и да го преземете ТУКА)


КОНТРАСПИН: Одлуката на ЕУ е санкција, а прстот е вперен кон ВМРО-ДПМНЕ и кон ДУИ


Скопје, 6 јули, 2016 - 10:09 (META) 

Ако некој отвоено вели дека Владата е без политичка волја, Владата нема подготвеност, нема зрелост, нема политичка посветеност итн., и дека поради тоа се кратат 27 милиони евра, а дека помошта нема да биде продолжена со друг проект, спинување е да се крие дека тоа не биле санкции или казна од ЕУ за Македонија во целост, а уште поголемо извртување на вистината е за таквата одлука да ја обвините опозицијата, пишува „Вистиномер“.

Европската комисија пред три дена ја соопшти одлуката за кратење на 27,1 милиони евра од претпристапните ИПА-фондови за Македонија за 2016 година, што е блиску до 1 отсто од буџетот на РМ за годинава. По одлуката, Владата на Република Македонија и ВМРО-ДПМНЕ се обидоа да ги демантираат оценките во медиумите и на експертите дека станува збор за санкции, извртувајќи ја реалноста дека станувало збор за нормално кратење на средства, но и дека за лошите вести и одлуки, виновна била опозицијата.

(Целиот текст од „Вистиномер“ можете да го прочитате и да го преземете ТУКА)