!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Според „Еуробарометар“, Македонија се движи во лоша насока, а влезот во ЕУ е добра работа


Брисел, 12 септември, 2017 - 12:36 (META) 

Граѓаните на Македонија сметаат дека државата се движи во лоша насока, дека членството во ЕУ ќе биде добра работа, се чувствуваат приврзани за државата и многу ретко посетуваат земји од ЕУ, покажува најновото истражување на „Еуробарометар“.

На прашањето „Дали мислите дека државата се движи во добра насока или во лоша насока?“, 34 отсто од испитаниците одговориле дека таа се движи во добра насокаа, а 48 отсто – во лоша насока. Според истражувањето, 34 отсто сметаат дека економската состојба во следните 12 месеци ќе биде подбра, полоша сметаат 25 отсто, а дека ќе остане иста сметаат 33 отсто.

Многу задоволни од животот што го водат се само 10 отсто од граѓаните, доволно задоволни се 50 отсто, не многу задоволни 22 отсто и 16 отсто се целосно незадоволни.

Дека имаат многу добра работа сметаат ниски 7 отсто од анкетираните, поприлично добра имаат 38 отсто, поприлично лоша 23 отсто и многу лоша работа имаат 20 отсто од граѓаните.  Само 6 отсто имаат многу добра финансиска состојба во нивниот дом, 51 отсто имаат добра, 28 отсто се изјасниле дека се во лоша финансиска состојба, а 14 отсто имаат многу лоша финансиска состојба.

Јавните услуги се многу добри само за 3 отсто од граѓаните, за 31 отсто се добри, а ист е бројот и на тие што сметаат дека се лоши. За 29 отсто од испитаниците јавните услуги се многу лоши.

Членството на Македонија во ЕУ е добра работа мислат 57 отсто од граѓаните, за 15 отсто тоа е лоша работа, а за 26 отсто – ни добра ни лоша. Висок процент на граѓани, 69 отсто, сметаат дека Македонија ќе има придобивки од влезот во ЕУ. Македонците мислат дека ЕУ се движи во добра насока, за што се одлучиле 58 отсто од испитаниците, а дека САД се движи во вистинска насока мислат 50 отсто.

На прашањето „Дали сметате дека вашиот глас важи во вашата држава?“, 32 отсто целосно се согласуваат, 26 отсто се согласуваат, не се согласуваат 16 отсто, а целосно не се согласуваат 20 отсто.

Македонците се чувствуваат многу приврзани за својата држава. Ваков одговор дале 60 отсто од испитаниците, додека воопшто неповрзани со државата се чувствуваат ниски 3 проценти.

Високи 54 отсто од граѓаните во последните 12 месеци воопшто не посетиле друга земја од ЕУ, 23 отсто посетиле ЕУ-земја неколкупати, 23 отсто посетиле еднаш или двапати.

Истражувањето е спроведено во мај оваа година, односно пред формирањето на новата влада, а објавено е минатиот месец. Анкетите се однесуваат на перцепцијата на грѓаните во 28 земји членки на ЕУ, како и во петте земји кандидатки за членство – Македонија, Србија, Албанија, Црна Гора и Турција.


„Еуробарометар“: Македонските граѓани не им веруваат на судството, полицијата и на партиите


Брисел, 12 септември, 2017 - 11:57 (META) 

Македонските граѓани имаат најмала доверба во правосудниот систем, полицијата, јавната администрација, владата, парламентот и во политичките партии, покажува најновото истражување на јавното мислење на „Еуробарометар“.

Единствено, повеќе од 50 отсто од граѓаните имаат доверба во Армијата (51 отсто) и во Европската Унија (53 отсто).

Истражувањето е спроведено во мај оваа година, односно пред формирањето на новата влада, а е објавено минатиот месец. Анкетите се однесуваат на перцепцијата на грѓаните во 28 земји членки на ЕУ, како и во петте земји кандидатки за членство – Македонија, Србија, Албанија, Црна Гора и Турција.

Според анкетата на „Еуробарометар“, само 23 отсто од македонските граѓани се изјасниле дека имаат доверба во судството, 70 отсто немаат доверба, а 7 отсто рекле дека не знаат. Слични проценти на доверба, односно недоверба во правосудните системи на своите земји, покрај Македонија, имаат уште Бугарија и Словенија. Најмногу доверба во националното судство имаат граѓаните на Данска и Финска (по 88 отсто), Холандија и Австрија (80 отсто) и на Шведска (78 отсто).

Во полицијата, според истражувањето, доверба имаат 34 отсто од македонските граѓани, 61 отсто немаат доверба, а 5 отсто не знаат. Ова воедно е и најнискиот процент на доверба во полицијата од сите земји опфатени во истражувањето. Најмногу доверба во полицијата имаат граѓаните на Данска (93 отсто).

Кога станува збор за јавната администрација, 30 отсто од граѓаните рекле дека ѝ веруваат, 62 отсто дека не ѝ веруваат и 8 отсто – не знаат. Помалку доверба во јавната администрацина од Македонија имаат само граѓаните на Грција (78 отсто), на Италија (67 отсто) и на Летонија (65 отсто).

Само 15 отсто од граѓаните на земјава, според „Еуробарометар“, им веруваат на политичките партии, а дури 76 отсто немаат доверба во нив.

Доверба во Владата имаат 23 отсто од испитаниците, а на извршната власт во земјава не ѝ веруваат 64 отсто од граѓаните.

Идентичен е распоредот на проценти и кога станува збор за довербата на граѓаните во парламентот.

„Еуробарометар“ е сервис за истражувањето на јавното мислење за потребите на Европската комисија, основан во 1973 година.


План за намалување на институционалната затвореност во Македонија и во регионот


Скопје, 11 август, 2017 - 13:30 (META) 

„Сеопфатен план за добро владеење за државните институции во Република Македонија“ е најновото издание изработено врз основа на истражувањето за степенот на отвореност на институциите во шест земји од регионот во рамки на проектот АКТИОН СЕЕ – Одговорност, технологија и мрежа на институционална отвореност во Југоисточна Европа, кој го спроведува Фондацијата за интернет и општество „Метаморфозис“.

За да се измери степенот на институционалната отвореност, партнерите од АКТИОН СЕЕ, ги оценуваа институциите врз основа на: пристап до информации на официјалните веб-страници на институциите, квалитет на правната рамка за одделни прашања, други извори на информирање на јавноста, како и прашалници доделени на институциите.

Резултатите од истражувањето спроведено од октомври до крајот на декември 2016 година покажуваат дека просечната отвореност на извршната власт, вклучувајќи ги Владата, министерствата и другите извршни органи, во Македонија изнесува 36 отсто, a во регионот – 47 отсто. Македонското Собрание, пак, исполнува 59 проценти од индикаторите на отвореност, што е исто под просекот од 63 отсто отвореност на парламентите во регионот.

Судовите кај нас исполнуваат 52 проценти од индикаторите на отвореност, додека Судскиот совет е незначително подобар и исполнува 58 отсто од индикаторите на отвореност. Општините исполнуваат само 34 проценти од индексот на отвореност.

Врз основа на следењето на податоците и на наодите, се создаде сет на практични предлози за подобрување на степенот на отвореност на државните институции во Македонија, но и во Србија, Црна Гора, Албанија, Косово и во Босна и Херцеговина.


„Брима“: Мнозинството граѓани сметаат дека била потребна промена на власта


Скопје, 28 јуни, 2017 - 14:37 (META) 

Доверба во новата влада имаат 57 проценти од граѓаните, а 37 отсто гледаат со недоверба на идното работење на владата. Најголема доверба на владата ѝ даваат етничките Албанци, односно 71 отсто, а најмалку доверба имаат етничките Македонци, односно 51 процент, покажува новата анкета на „Брима Галуп“, спроведена од 2 до 12 јуни.

Истражувањето покажува дека на Македонија ѝ била потребна промена на власта. Така сметаат 69 отсто од анкетираните граѓани, а само 24 отсто сметаат дека било добро и со минатата власт.

Најголема недоверба во Владата има кај поддржувачите на ВМРО-ДПМНЕ и кај тие што изјавиле дека нема да гласаат на следните избори, додека најголема доверба има кај поддржувачите на СДСМ, потоа се поддржувачите на ДУИ и на Движење за реформи на ДПА.

Шеесет и два отсто од анкетираните граѓани сметаат дека изборот на Зоран Заев за премиер е добро решение, додека 29 проценти сметаат дека тоа е лошо решение. И тука најголема е поддршката кај етничките Албанци, потоа кај припадниците од другите етнички заедници и кај етничките Македонци.

Високи 66 отсто сметаат дека влегувањето на граѓаните во Собранието на Република Македонија на 27 април било со однапред испланирано сценарио, а 21 отсто сметаат дека тоа било спонтано.

Поддршката за изборот на Талат Џафери за претседател на Собранието во вкупната јавност е 43 проценти, а 47 отсто се изјасниле дека дека не го поддржуваат.

Со истражувањето биле опфатени 1.193 граѓани во осум региони, а интервјуата биле направени лице в лице во домот на испитаникот.


Презентирано истражувањето „Кој им ги врзува рацете на новинарите и како да се одврзат?“


Скопје, 15 јуни, 2017 - 15:45 (META) 

Затвореноста на институциите кога од нив ќе се побараат информации е еден од најгорливите проблеми со кои се соочуваат новинарите од земјава, а особено истражувачките новинари, и е директно прекршување на правото на слобода на информирање. Иако од 2006 година на сила е Законот за пристап до информации од јавен карактер, тој честопати се изигрува од институциите кои сакаат да сокријат одредени информации.

Ова беше посочено на презентацијата на трите дела на видеосторијата од истражувањето „Кој им ги врзува рацете на новинарите и како да се одврзат?“, спроведено од Фондацијата „Метаморфозис“ во рамки на проектот „Истражувачко новинарство, чувар на демократијата и на човековите права“ на Центарот за управување со промени и на Институтот за човекови права.

Во рамките на проектот е извршено и истражување за примената на мерката притвор, при што се побарани информации од Основното јавно обвинителство – Скопје, од Основното јавно обвинителство за гонење организиран криминал и корупција, од Специјалното јавно обвинителство и од Основниот суд Скопје 1. Како што беше посочено на презентацијата, одговор на едно од барањата за пристап до информации од јавен карактер стигнал дури по околу 10 седмици.

– Направиме компаративна анализа на тоа колку мерки на притвор, домашен притвор, мерки на претпазливост се побарани и се изречени во 2016 година од обвинителствата и од скопскиот суд, но излезе дека и тоа е преголем залак. Одговор од судот побаран првпат на 14 февруари, а го добивме дури на 27 април. Исто така, затвореноста на институциите се виде и во тоа што обидите да контактираме со актуелни судии и обвинители, заврши со „ѕид на тишина“. За разлика од нив, поранешни обвинители, судии и истражувачки новинари зборуваа за проблемите што излегуваат при доаѓањето до информации и затвореноста на институциите – посочи Виолета Глигороска, координатор на проектот.

Потребна е итна и квалитативна промена на Законот за пристап до информации од јавен карактер, бидејќи во него има и многу нејаснотии и нелогични решенија, ако се сака да се постигне вистинска отвореност на институциите кон новинарите, посочи воведничарот Теофил Блажевски, новинар и член на Советот за етика во медиумите.

– Неопходна е драстична промена на отвореноста на институциите, дури и без новинарите да прашуваат, па како што на веб-страницата на Собранието на Република Македонија се објавуваат стенограми од седниците, исто би требало да биде и со седниците на Владата, а сите институции треба навремено и јасно и транспарентно да ги објавуваат информациите за нивното работење – рече тој.

Во истражувачката сторија во видеоформат, за затвореноста на институциите и за нееднаквиот пристап на скопскиот Основен суд 1, говорат универзитетската професорка Гордана Бужаровска, поранешната судијка во Врховен суд и во Европскиот суд за човекови права во Стразбур, Маргарита Цаца – Николовска, поранешниот заменик-јавен обвинител Бардил Кука, Уранија Пировска од Хелсиншки комитет за човекови права, како и новинарите Сашка Цветковска, Жаклина Хаџи-Зафирова и Џелал Незири.

За проблемите обработени во истражувањето по презентацијата на триделната приказна дискутираа и дел од новинарите вклучени во проектот, при што беше повторена генералната констатација за досегашната екстремна затвореност на институциите.

Трите дела од сторијата што произлезе од истражувањето спроведено од Фондацијата „Метаморфозис“, се подготвени во рамките на проектот „Истражувачкото новинарство, чувар на демократијата и на човековите права“ со финансиска поддршка од ЕУ и од Амбасадата на Британијуа во Скопје, а имплементиран од Центар за управување со промени и од Институт за човекови права.


Укажувачите на корупција на Балканот ги сакаат малку, а во Македонија – најмалку


Сараево, 18 април, 2017 - 13:25 (META) 

Укажувачите на криминал и на корупција (whistleblowers) не се популарни, односно ја немаат поддршката ниту од граѓаните во земјите од Западен Балкан, а најмалку во Македонија, покажува истражувањето спроведено во седум земји, врз 7.000 испитаници, поддржано од Регионалниот совет за соработка (РСС) со седиште во Сараево.

Истражувањето, кое е прво од ваков вид, е спроведено во Албанија, Босна и Херцеговина, Косово, Македонија, Србија, Хрватска и во Црна Гора. Резултатите покажуваат дека само нешто повеќе од половина од граѓаните ги подржуваат укажувачите.

Во просек, секој шести граѓанин од земјите од регионот мисли дека укажувачите треба да се казнат, а во Македонија дури секој трет испитаник смета дека укажувањето на корупција и на криминал е неприфатливо и таквите лица заслужуваат казна.

Македонија, иако има еден од најсеопфатните закони за заштита на укажувачитево  споредба со земјите од регионот, има најмала поддршка за нив. Само 41,4 отсто од граѓаните сметаат дека укажувањето на корупција и на криминал е прифатливо, додека 30,4 отсто сметаат дека тие лица треба да бидат казнети, дури и ако откриваат сериозни неправилности. Нешто повеќе од 28 отсто не знаеле или не сакале да одговорат на прашањето.

На ниво на компании или организации и институции, поддршката е уште помала. Само 36 отсто сметаат дека се чувствуваат повикани да пријават ако увидат криминал или корупција, што е далеку под просекот во регионот, покажало истражувањето.

Од РСС нотираат дека анализата покажува дискрепанца помеѓу високата загриженост за состојбите со криминалот и со корупцијата во земјите од Западен Балкан и релативно слабата поддршка за укажувачите на ваквите појави.

– Корупцијата и неефикасноста за нејзиното решавање и понатаму се причина за голема загрижност во општествата во Југоисточна Европа, но, како што покажа истражувањето, тоа сè уште не се трансформирало во поддршка на јавноста кон укажувачите – вели експертот за реформа на јавната администрација и борба против корупција при РСС, Раду Котику.

Тој вели дека укажувањето се смета за една од најефикасните алатки за борба против корупцијата. Организациите како што се Советот на Европа или Канцеларијата на Обединетите нации за борба против наркотици и криминал имаат подготвено меѓународни стандарди за оваа област, додека повеќето од земјите од Југоисточна Европа веќе имаат донесени и закони за заштита на укажувачите.


По Брексит околу 12.000 лекари би можеле да ја напуштат Британија


Лондон, 23 февруари, 2017 - 10:20 (META) 

Околу 12.000 лекари, кои дипломирале во Европската економска зона, може да ја напуштат Велика Британија бидејќи чувствуваат помала сигурност за својата иднина по референдумот за Брексит, покажа истражувањето на „Британската медицинска асоцијација“.

Весникот „Гардијан“ пишува дека истражувањето, кое се темели на одговорите на 1.193 лекари, предизвика страв дека недостигот од специјалисти во британските болници може да се продлабочи.

Четириесет и два проценти од испитаниците изјавиле дека размислуваат да ја напуштат Велика Британија, 23 отсто не биле сигурни, додека 39 проценти се изјасниле дека немаат таква намера.

– Во момент кога националната здравствена каса веќе ја достигна својата граница и земјата се соочува со сериозен недостиг од персонал, тоа би било катастрофално – рече д-р Марк Потер, претседател на советот на асоцијацијата.

Во Велика Британија работат 280.932 лекари, од кои 11 отсто се квалифицирале во друга земја од Европската економска зона.


ИДСЦС: 77 отсто од граѓаните се за влез на Македонија во ЕУ


Скопје, 17 февруари, 2017 - 16:53 (META) 

Доколку следната недела се одржи референдум за влез на Македонија во Европската Унија, за влез би гласале 77 отсто од граѓаните, а против 17 отсто, покажува анкетата спроведена во ноември минатата година од Институтот за демократија „Социетас цивилис“ во рамки на проектот „Анализа на јавното мислење за македонскиот процес на пристапување кон Европската Унија (2014-2016)“

Според истражувањето, доколку се изземе спорот за името како пречка во пристапниот процес, поддршката за членство во ЕУ се ближи кон прагот од 90 отсто.

Наодите од другата анализа направена од ИДСЦС наречена „Кредибилитетот на Европската Унија во Македонија е доведен во прашање“ укажуваат дека најголемиот процент на испитаници односно 44,3 отсто не се задоволни од напорите кои ЕУ ги презема во улога на медијатор во политичката криза во Македонија.

Според ова истражување, мнозинството од испитаниците – 58,5 отсто воопшто не се запознаени со извештајот на Прибе. Анкетата покажува дека 26,2 отсто од испитаниците сметаат дека ЕУ би била најдобриот странски сојузник на Македонија, 25 отсто од населението сметаат дека тоа би била Русија, додека за 17,5 отсто од граѓаните, САД е претпочитан сојузник.

Највисокиот процент на етнички Албанците ја поддржуваат ЕУ и САД, соодветно со 32,2 и 28,3 отсто, додека најголем дел од етничките Македонци 29,9 отсто сметаат дека Русија би била најдобриот сојузник за Македонија.


Судиите некритички одредуваат притвор бидејќи е ефтин


Скопје, 15 февруари, 2017 - 16:24 (META) 

Македонските судови имаат унифицирана тарифа или сума за тоа колку чини еден ден поминат во притвор, а која се движи од 2.500 до 3.500 денари (40 – 50 евра), беше истакнато на денешната презентација на истражувањето на „Неосновано притворени – правни и буџетски импликации“, што се одржа во ЕУ-Инфоцентарот во Скопје.

„Сознанието дека ‘цената’ за ограничување на слободата во Република Македонија е многу ниска и дека судиите во граѓанските судови имаат етаблирана практика за досудување мали и незначителни износи за надомест на штета, негативно се одразува врз судиите во кривичната постапка некритички да определуваат мерка притвор“, е заклучок на професорите од Правниот факултет Јустинијан Први во Скопје, Гордана Бужаровска, Ванчо Узунов, Неда Здравева и Бобан Мисоски кои се автори на истражувањето, кое финансиски е поддржано од холандската амбасада во земјава.

Истражувањето се однесува на периодот 2011 – 2015 година и според податоците во овој период 138 македонски граѓани биле неосновано притворени, а подоцна против нив не било покренато обвинение или биле ослободени по жалби во судските постапки.

Исражувањето покажува дека од буџетот на државата за материјална штета поради неосновано притворање судовите досудиле надомест од 3,8 милиони денари, што е само 45 отсто од вкупната сума што била баран од граѓаните. За нематеријална штета биле побарани 65,5 милиони денари, а досуден е износ за штета од 15,5 милиони денари, односно 23, 6 отсто од вкупната сума, додека за надоместоци за трошоци на постапките побарувањата изнесувале 2,1 милион денари, а вкупниот досуден износ за трошоци изнесувал 1,8 милиони денари.

„Податоците покажуваат дека вкупните трошоци за надомест на штета на неосновано притворените лица изнесувале 28.999.395 денари, односно околу 470.000 евра. Во таа смисла, ако тој износ се смета за апроксимативен и за периодот 2011-2015 година, во кој имало 138 неосновано притворени лица со вкупен број од 10.316 притворенички денови, произлегува дека просечниот вкупен надомест на штета по притворенички ден изнесува околу 2.800 денари. Или, просечно по неосновано притворено лице, вкупниот надомест на штета изнесува околу 210.000 денари“, беше истакнато на денешната презентација на истражувањето.

Професорката Бужаровска истакна дека податоците покажуваат дека судовите во 90 отсто од случаите ги прифаќале барањата на јавните обвинителства за одредување на мерката притвор. Обвинителствата пак кон предлозите најчесто ги доставувале доказите што ги добивале од МВР.

Според податоците од јавните обвинителства, во периодот 2011-2015 година, близу 6.700 обвинети лица не биле прогласени за виновни. Од нив за 1.700 обвинети лица судот донел ослободителни пресуди, а за близу 3.000 лица судот го одбил обвинението.

Амбасадорот на Холандија, Ваутер Пломп, кој ја отвори презентацијата, истакна дека заштитата на човековите права е приоритет на Холандија и дека таа како пријател на Македонија известира многу во овие сфери во земјава. Тој истакна дека еден од главните проблеми, кој е нотиран од Европскиот суд за човекови права во Стразбур, е должината на времетрањето на притворот, кој во Македонија е значително повисок во споредба со ЕУ и Холандија.

– Холандија е долгорочен пријател на Македонија и на македонската влада во процесот на сите реформи кои што се потребни за членството на земјата во Европската Унија – рече амбасадорот Пломп.


Анкета на „М-проспект“: Загадувањето на воздухот треба да го реши Владата


Скопје, 9 февруари, 2017 - 16:05 (META) 

Дури 82 отсто од граѓаните на Македонија сметаат дека загадувањето на воздухот е многу сериозен проблем и дека треба веднаш да се преземат мерки за решавање. Ова го покажува истражувањето на јавното мислење спроведено од агенцијата „М-проспект“.

Според анкетата, главен причинител за загадувањето на воздухот, за мнозинството граѓани, односно 31,5 отсто од испитаниците, е сообраќајот, на второ место е индустријата со 24,9 отсто, додека греењето на домаќинствата е на трето место со 11,5 отсто.

Речиси половина од граѓаните, односно 45,7 отсто сметаат дека Владата е одговорна за решавање на проблемот со загадувањето на воздухот, а секој четврти граѓанин смета дека општинските власти се тие што треба да преземат мерки за да се реши проблемот.

Одговорност кај граѓаните за решавање на проблемот со загадување на воздухот гледаат 11,8 отсто од испитаниците, додека 8,3 отсто сметаат дека бизнис-секторот е одговорен.

Решение на проблемот 21,8 отсто од испитаниците гледаат во зголемување на зелените површини во градските подрачја, 19,1 отсто во гасификацијата, а 18,8 отсто во затворање на фабриките што не ги исполнуваат еколошките стандарди.

Анкетата била спроведена теренски, во периодот од 16 до 27 јануари 2017 година, на национален репрезентативен примерок од 1.000 испитаници.