Со сведочење на Љубе Бошкоски, денеска продолжува судењето за „Тортура“


Скопје, 3 септември, 2018 - 9:53 (META) 

Судењето за предметот „Тортура“ на СЈО продолжува денеска со сведочење на оштетениот Љубе Бошкоски.

Во воведните зборови, обвинителот Љубомир Лапе денеска рече дека СЈО ќе докаже дека по основ на политичка определба првообвинетиот Сашо Мијалков ги навел останатите обвинетите при апсењето на Бошкоски тој душевно да страда, а сето тоа поради политичка одмазда за упатени пораки за време на изборна кампања.

Според Лапе, полицајците, спротивно на уредбата за средства за присилба, употребиле прекумерна сила.

Полицајците, рече тој, ја послушале наредбата и ги пренеле заканите од Мијалков, а еден од обвинетите му ставил пиштол на глава и му рекол „бел ден нема да видиш“.

Како докази, обвинителот Лапе рече дека ќе бидат приложени снимки од неколку телевизии и видео снимки од МВР од денот на апсењето, како и писмените докази поткрепени од т.н. „бомби“.

Во „Тортура“ обвинети поранешниот директор на УБК Сашо Мијалков, поранешниот прв човек на единицата „Алфи” Ивица Антевски – Пуки и уште петмина припадници на единицата и сите пред судот се изјаснија за невини.


Пентагон ја поздрави репатриацијата на 7 македонски борци од ИСИС


Скопје, 8 август, 2018 - 10:41 (META) 

Пентагон ја поздрави одлуката на Македонија да ја прифати групата нејзини државјани, кои како странски платеници се заробени во Сирија. МВР вчера соопшти во заедничка акција со Командата на Глобалната антитерористичка коалиција и Сириските Демократски Сили приведе седуммина македонски државјани, кои се бореле на боиштата во Сирија и Ирак.

Портпаролот на Пентагон, Шон Робертсон, за Си-Ен-Ен изјави дека Сириските Демократски Сили до јули имаат заробено 600 странски платеници од повеќе од 40 земји. Меѓу нив, според овој американски морнарички командир, имало околу 40 платеници од Русија, 10 од Германија и помал број од Франција. Не е прецизирано дали меѓу нив освен седуммината има и други македонски државјани.

Репатрираните борци биле уапсени од единици од Сириските демократски сили.

Портпаролот Ерик Пахон, пак, за „Вашингтон тајмс“ изјави дека, Македонија покажа пример за сите членови на Глобалната коалиција како да се порази ИСИС и нагласи дека странските терористички борци не се само проблем за Сирија или за регионот, туку, како што објасни, тие се глобален проблем што бара глобална соработка.

Станува збор за македонските државјани С.Р. 1990, Џ.А. 1993, Б.Ф. 1994, О.Ж. 1987, Е.О 1994, И.Ш. 1977, А.М. 1995, за кои е распишана меѓународна потерница и за кои според член 322а и 394а од Кривичниот законик на Република Македонија се поднесени кривични пријави во рамки на полициските акции „Ќелија 1“ (август 2015) и „Ќелија 2“ (јули 2016), соопшти МВР.


Приведен градоначалникот на Ново Село поради шверц со цигари


Струмица, 11 јули, 2018 - 11:30 (META) 

Приведен е градоначалникот на општина Ново Село, Боро Стојчев, кој се сомничи за шверц со цигари. Стојчев бил приведен синоќа додека бил заедно со неговата сопруга, синот и уште еден соучесник. За време на полициската акција имало и вооружена престрелка.

Приведувањето го потврдија од СВР Струмица со соопштение во кое се наведува дека синоќа во близина на село Бадилен, од страна на полициски службеници, се запрени две моторни возила натоварени со картонски кутии со цигари.

„Во едното возило имало 29 кутии со по 50 штеки и една кутија со 49 штеки цигари, а било управувано од страна на Б.С. (54), со сопатник Ј.С. од село Ново Коњарево. Во другото возило управувано од Г.С. (24) со совозач С.В (26) од село Ново Коњарево,биле натоварени 35 штеки цигари и една кутија со 49 штеки цигари и една штека со девет кутии. При преземање на потребните мерки и дејствија лишено од слобода е и лицето М.Т (52) од село Самоилово, кој управувал моторцикл „Хамачи“ без регистарски таблици“ информираат од СВР Струмица.

Во соопштението се додава дека при обид за бегство на второто возило, од страна на полициски службеници биле испукани два предупредувачки куршуми.

На местото на настанот е извршен увид од страна на СВР Струмица во присуство на јавен обвинител. Лицата се лишени од слобода и се задржани во полицијата, а пронајдените кутии со цигари се одземени.


Мијалков и во „Тортура“ се повика на амнестијата од Иванов


Скопје, 9 јули, 2018 - 11:56 (META) 

Поранешниот директор на УБК Сашо Мијалков, првообвинет во предметот на СЈО „Тортура“ за апсењето на Љубе Бошкоски, како и останатите пет обвинети полициски „алфи“, се повикаа денеска на амнестијата што им ја даде претседателот Ѓорге Иванов.

Со амнестијата не е опфатен само обвинетиот Јован Боцевски, кого Иванов не го ставил списокот за спасување на осомничени за криминал од тогашната владејачка ВМРО-ДПМНЕ. На 19 јуни, Мијалков се повика на амнестијата на Иванов на судењето за предметот на СЈО „Тврдина-Таргет“.

По година дена од поднесувањето на обвинение, почна судењето на ексдиректорот на УБК Сашо Мијалков, на бившиот командант на полициските „Алфи“ Ивица Антевски – Пуки и на уште петмина припадници за оваа единица за мачење и изживување врз Љубе Бошкоски.

На 6 јуни 2011 година, ден по парламентарните избори, Бошкоски беше апсен во Скопје од обвинетите Антевски, Новица Станковски, Филип Атанасов, Петар Милошевски, Јован Боцевски и Метуш Шабани, под сомнение дека злоупотребил финансиски средства за изборна кампања. СЈО вели во обвинението дека апсењето со кое му е нанесена душевна и физичка болка, страдање, срам и понижување било по нарачка на Мијалков поради дискриминација по основ на поинаква политичка определба.

Во „Тортура“ сите се обвинети за „мачење и друго сурово, нечовечко или понижувачко постапување и казнување“.


Димитров му се извинил на Ел Масри за незаконското апсење


Скопје, 4 април, 2018 - 16:37 (META) 

Министерот за надворешни работи, Никола Димитров се извини за несоодветното однесување на властите во случајот на Калид Ел Масри, кој во 2004 година незаконски беше уапсен во Македонија, и неправедно задржан и испрашуван, објави Гласот на Америка.

Во писмо испратено до Ел Масри, Димитров изразил „длабоко извинување и искрено жалење“ за несоодветното однесување на властите, како резултат на што претрпел „неизмерливи и болни искуства, тешки физички и психички повреди и болки“, соопштија Отворено општество – Иницијатива за правда и Американското здружение за заштита на човековите слободи.

„Го поздравуваме извинувањето до Ел Масри на Владата на поранешна Југословенска Република Македонија, и нејзиното признание дека безбедносните служби ја прекршиле Европската конвенција за човекови права. Од друга страна, САД и натаму продолжуваат да одбиваат одговорност на кој било во ЦИА за овој случај“, изјави Џејмс Голдстон, извршен директор на Отворено општество – Иницијатива за правда, нагласувајќи дека Македонија допрва ќе отвори криминална истрага за тоа што се случило, со цел да се утврди одговорност.

Џејмс Голдстон, адвокат кој брани луѓе во случаи за повреда на човековите права и го застапуваше Ел Масри во судскиот процес во Европскиот суд за човекови права во 2012 година, вели дека извинувањето е добредојдено, но не е едоволно.
– Македонија треба да отвори формална кривична истрага за тоа што се случило и да побара одговорност од вклучените – вели Голдстон.

И Џамил Деквор, директор на Американското здружение за заштита на човековите слободи, го поздрави официјалното извинување на Македонија, велејќи дека ова е прв чекор кон откривање на целата вистина за нелегалното киднапирање и тортура на Ел Масри.

Во 2012 година, македонската Влада плати отштета од 60.000 евра поради прекршување на Европската конвенција за човекови права, според пресудата од Европскиот суд за човекови права.

На 31 декември 2003а година, Ел Масри беше уапсен од македонските власти на граничниот премин Табановце, по што три недели беше задржан и испрашуван во хотел во Скопје.

Во 2004 година македонските власти им го предаваат на американски агенти, кои го носат во таен истражен центар на ЦИА во Авганистан. По неколку месеци истрага и тортура, тој е ослободен без обвинение.


Давидовиќ: Повторното апсење на обвинетите од 27 април е непочитување на Врховниот суд


Скопје, 28 март, 2018 - 11:05 (META) 

Основниот суд се прави попаметен од Врховниот кога е во прашање повторениот притвор за дел од учесниците во насилниот упад во Собранието, смета адвокатот на еден од обвинетите Ѕвонко Давидовиќ. Според него, Обвинителството е привилегирано во постапката, бидејќи додека бранителите спијат, судот преку ноќ, во црни темници заседава и носи нови решенија и не остава можност за одбрана на обвинетите.

-Синоќешната акција покажува конфузија и хаос, не се знае чија одлука треба да се почитува. Евидентно е непочитување на одлуката од Врховниот суд, која е сменета за еден ден. Тука имаме и селективна примена на законот. Обвинителството побарало притвор за сите лица на кои мерката притвор им е заменета за куќен притвор, а од Судот одобрено е во повторен притвор да заминат само припадниците на МВР. Ние правниците учиме дека треба да се почитува одлуката на Врховен суд, кој ја проценил состојбата и утврдил дека треба куќен притвор. Трипати понизок суд вели Врховниот суд нема поим, ние знаеме повеќе- рече адвокатот Давидовиќ.

Според адвокатот, судот си игра со човечките судбини постапувајќи со двојни аршини.

-Обвинителството е една од странките. Имате ситуација во која судот постапува по барање на Обвинителството, а бранителите спијат. Тука немаме правен механизам. Што ако сакавме да дадеме гаранција или, пак, некој човек е смртно болен? Немате еднакви права. ОЈО e привилегирано во конкретниот случај, но и во сите постапки – додава Давидовиќ.


Пуџдемон денеска пред суд, нови протести во Каталонија


Берлин, 26 март, 2018 - 11:29 (META) 

Поранешниот каталонски лидер Карлес Пуџдемон денеска треба да се појави пред суд во Германија по неговото апсењето викендов, јавуваат светските медиуми. На денешното рочиште само ќе се утврди неговиот идентитет, а потоа ќе биде отворена процедура за испорачување, која може да потрае и до два месеци.

Пуџдемон во неделата беше уапсен откако се обиде од Данска да влезе во Германија. Шпанските медиуми јавуваат дека повеќе од 50.000 лица во неделата демонстрираа против негово апсење. Во судири на сепаратистите со полицијата, најмалку 89 лица се повредени, а четворица се уапсени.

Каталонија минатата година се обиде да прогласи независност, но владата во Мадрид го спречи тој обид и воведе централна власт.


Уапсени близнаци кои планирале бомбашки напад во Њујорк


Њујорк, 16 февруари, 2018 - 10:13 (META) 

Браќа близнаци се уапсени во нивниот стан во њујоршкиот квартот Бронкс со повеќе од десет килограми материјал за составување бомба во текот на претрес од страна на припадниците на Федералното биро за истраги и њујоршката полиција.

Дваесет и седумгодишните Кристијан и Тајлер Торо се уапсен со материјалот, од кој дел потекнува од производи за огномет за деца, изјави заменикот началник за разузнавачки и антиерористички операции, Џон Милер.

Полицијата, исто така, пронашла и дневник во кој се зборува за операцијата „Флеш“ и белешки, вклучително и онаа во којашто се истакнува дека браќата имаат намера да убиваат деца.

-Под полната Месечина, малечките ќе почувствуваат терор – изјави Милер цитирајќи ја белешката.
Истрагата започна по наводна закана со бомба од 4-ти декември во училиште во Харлем, додаде Милер.


Во Турција уапсени 29 лица кои подготвувале напади за Нова година


Анкара, 29 декември, 2017 - 10:05 (META) 

Полицијата во Анкара привела 29 осомничени припадници на Исламска држава кои подготвувале напади за Нова година.

Како што пренесуваат турските медиуми, во симултаните рации учествувале околу 500 полицајци, а многу од приведените се странски државјани. Полицијата има налози за приведување на уште 17 осомничени.

Во материјалот, кој полицијата го запленила има документи кои укажуваат на тоа дека некои од осомничените надгледувале локации и подготвувале можни напади во текот на новогодишната ноќ.

Минатата година Исламска држава изврши напад за време на новогодишната ноќ во Истанбул, убивајќи 39 лица. Токму затоа турските власти годинава ангажираа 275.000 полицајци кои ќе бидат на должност за време на прославата.


Во Турција уапсени 38 осомничени припадници на ИД


Анкара, 28 декември, 2017 - 9:44 (META) 

Турската полиција уапсила 38 лица, меѓу кои има и државјани на Сирија, поради сомнение дека се поврзани со Исламска држава.

Операцијата на североистокот на земјата, бо провинцијата Бурса ја спровела полициската единица за борба против корупцијата, а претресени се куќи на повеќе локации во пробинцијата.

Припадниците на ИД извршија повеќе напади во Турција, а изминатите години многу странци минаа низ Турција да се и се приклучат на терористичката организација во Сирија и Ирак.