Антивоената активистка Аида Ќоровиќ во вторникот доби парична казна од 100.000 динари (речиси 52.600 македонски денари) од Прекршочниот суд Белград, поради фрлање јајца врз муралот со Ратко Младиќ, односно, според пресудата „за нарушување на јавниот ред и навредување полициски службеници“.
Таа за „Гласот на Америка“ на српски јазик оценува дека е „донесена целосно паушална пресуда, за [судиите] да не се замерат со властите“.
Ќоровиќ во ноември 2021, на денот на Борбата против фашизмот и антисемитизмот учествуваше во протестот пред муралот со Младиќ насликан на фасада на една зграда во центарот на Белград.
Откако активистките фрлиле неколку јајца на муралот што го чувале неидентификувани лица, дошла група цивили и ја привеле Ќоровиќ, при што таа давала отпор. Подоцна се покажало дека цивилите биле полицајци.
Ќоровиќ истиот ден е пуштена од притвор.
За „Гласот на Америка“ таа вели дека на едно рочиште кажала дека е „многу впечатливо“ што во повикот за рочиштето не е споменато името на Ратко Младиќ, туку е наведено дека ја вознемирувала јавноста, односно како што кажува Ќоровиќ „затоа што сум ја гаѓала зградата“.
Ратко Младиќ е воениот лидер на босанските Срби во текот на војната во БиХ, за што беше осуден за воени злосторства од Меѓународниот трибунал во Хаг.
