fbpx

Ѓоргиевска: Телесната автономија е основно човеково право, а сепак неостварливо за многу жени

Овде сме да слушаме, да учиме и да трасираме пат напред кој ќе ја почитува и кој ќе ја поддржува автономијата, достоинството и правата на жените и девојките, рече Ѓоргиевска на отворањето на конференцијата на која присуствуваат околу 100 претставници од државата и од регионот на Источна Европа и Централна Азија, ООН, меѓународната заедница

-

Сопругата на претседателот, г-а Елизабета Ѓоргиевска е домаќин на регионалната конференција на високо ниво „Моќта на изборот: Остварувајќи телесна автономија кај жени и девојки“, што се одржува во Кабинетот на претседателот.

Конференцијата, чиј домаќин е Ѓоргиевска, се одржува во соработка со Фондот за население на Обединетите нации – УНФПА, а под покровителство на претседателот Стево Пендаровски.

Во своето обраќање, Ѓоргиевска истакна дека телесната автономија е основно човеково право, а сепак како такво останува неостварливо за премногу жени и девојки ширум светот, потенцирајќи дека собирот има за цел да ги засили гласовите на оние кои долго време се маргинализирани.

Фото: Кабинет на претседател на РСМ

„Овде сме да слушаме, да учиме и да трасираме пат напред кој ќе ја почитува и кој ќе ја поддржува автономијата, достоинството и правата на жените и девојките“, рече Ѓоргиевска на отворањето на конференцијата.

На воведната сесија се обратија и Јована Тренчевска, министерка за труд и социјална политика, Флоренс Бауер, регионална директорка на УНФПА за Источна Европа и Централна Азија, Росана Дуџак, постојана координаторка на Обединетите Нации во Северна Македонија и Диене Кеита, заменик-директорка (програма) на УНФПА.

Фото: Кабинет на претседател на РСМ

„Оваа Влада чии темели на работа се еднаквоста, праведноста и солидарноста еден од првите чекори кои ги направи беше промената на Законот за прекин на бременоста, овозможувајќи и го правото на жената да одлучува за своето тело. Жал ми е што вакво основно човеково право треба да го наведеме како успех, жал ми е што е потребна законска измена за да и гарантираме на една жена дека има право и дека заслужува да одлучи за себе. Меѓутоа со раководство кое препознава и работи на измени кои гарантираат слободно живеење во сопствената држава не се плашам за прашањето за имплементирање на еднаквите можности и на жените и на мажите“, рече Тренчевска.

Преку 4 панели на различни теми, говорниците на конференцијата ќе дадат преглед на остварувањето на телесната автономија, ќе дебатираат за бариерите за пристап до здравствена заштита, образование и економски можности.

На Конференцијата присуствуваат околу 100 претставници од државата и од регионот на Источна Европа и Централна Азија, ООН, меѓународната заедница, креатори на политики, жени лидери, претставници/чки на граѓанското општество, на младите, експерти и други засегнати страни.

Од Кабинетот на претседателот потсетуваат дека телесната автономија и сексуалното и репродуктивното здравје и права се клучни за напредокот кон родовата еднаквост, постигнувањето на Целите за одржлив развој на ОН и целите на Програмата за акција на Меѓународната конференција за население и развој (ICPD) што се одржа во Каиро, Египет, во 1994 година.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

Еквалис: Омраза, смртни закани и повици за линч за летната школа за ЛГБТИ+ млади и сојузници

Со омраза, закани по живот, повици за линч и истерување од град се соочило Здружението за едукативен развој Еквалис по објавениот повик за учество на Летната школа за ЛГБТИ+...