Премиерот на Косово, Албин Курти, појасни дека денеска на меѓународните претставници им предал свој предлог од пет точки за решавање на ситуацијата на северот на Косово, меѓу кои и распишување вонредни локални избори таму, како што бараше ЕУ и меѓународната заедница, јавуваат српските медиуми.
Сепак, како прва точка, односно услов, тој наведува спроведување на законот во четирите општини со српско мнозинство на северот на Косово, како и идентификување и кривично гонење на оние што ги нападнаа полицијата, припадниците на КФОР и новинарите во немирите.
ЕУ ги повика Косово и Србија на деескалација, се закани со решителни мерки
Во меѓувреме, стана тензично во Косовска Митровица, каде по апсењето на еден Србин, засвиреа сирените во северниот, српски дел на градот и граѓани почнаа да излегуваат на улиците, јави Радио телевизија Србија. Според информациите, уапсен е еден од учесниците во нападот на припадниците на КФОР во Звечан.
Следната од точките на „предлогот“ на Курти, соопштени на прес-конференција е „криминалните групи да се повлечат од северот на Косово и да се запрат нивните криминални активности.
Косовскиот премиер предлага и косовската полиција, КФОР и ЕУЛЕКС на секои 15 дена да вршат заеднички безбедносни проценки.
Четвртата точка подразбира да се распишат вонредни локални избори во сите четири општини на северот, во „слободна и демократска атмосфера“.
Курти предлага и Приштина и Белград „веднаш да се вратат на дијалогот“.
Ескобар: Тензиите на Косово се резултат на несоработката на Приштина со меѓународната заедница
Во однос на предлогот на албанскиот премиер Еди Рама, кој излезе со нацрт-статут на Заедница на српските општини на Косово, Курти денеска му порача дека наместо тоа требало да излезе со предлог за албанското малцинство во Србија.
