По вчерашното признавање вина на поранешни високи функционери од ВМРО-ДПМНЕ во судскиот процес за случајот „Титаник“, од владејачкиот Социјалдемократски сојуз на Македонија (СДСМ) денеска побараа од Христијан Мицкоски и сите високи функционери кои во минатото биле инволвирани во изборни измами и притисоци врз граѓаните да си поднесат оставка од ВМРО-ДПМНЕ.
„Во Извршниот комитет на Мицкоски и во пратеничката група на ВМРО-ДПМНЕ се уште има лица за кои има повеќе обвиненија. Таков е Антонио Милошоски, кој е член и на Извршниот комитет, таков е Игор Јанушев. Поголем проблем е што останатите инволвирани во овој случај се уште не ја признаваат вината а очигледно е дека се длабоко инкриминирани. Како Илија Димовски кој секојдневно настапува во име на партијата. Христијан Мицкоски, кој беше советник на Груевски и негов генерален секретар треба да излезе пред граѓаните и јавно да им се извини“, изјави денеска Костадин Ацевски, член на Извршниот одбор на СДСМ.
Од СДСМ бараат итно мора да поднесат оставки сите функционери од ВМРО-ДПМНЕ кои се на било кој начин поврзани со овие веќе осудени лица кои сами признаваат вина.
„Го повикуваме Христијан Мицкоски, заедно со раководството да си поднесат оставки и да се повлечат“, изјави Ацевски.
Од ВМРО-ДПМНЕ излегоа со реакција на прес-конференцијата на СДСМ, во која велат дека владејачката партија ја дефокусира јавноста и дека СДСМ се легитимира зад политичкиот прогон на ВМРО-ДПМНЕ и нарачките во судството.
„Тоа е и дефокусирање од фактот дека киднапираа пратеник и го држеа во владината вила само за да ја спасат владата од паѓање. Тоа е и дефокусирање од тоа што Ден Дончев е на слобода пуштен да избега во Австралија, што Вице и Зоран Заеви се на слобода, тоа што во СДС се уште владее аболициран криминалец преку неговиот пиун Ковачевски“, се вели во реакцијата од ВМРО-ДПМНЕ.
Инаку, барањето на СДСМ за оставки доаѓа откако вчера поранешната министерка за внатрешни работи Гордана Јанкулоска, поранешниот министер за транспорт и врски Миле Јанакиески, поранешниот шеф на кабинетот на пребеганиот Никола Груевски, Мартин Протуѓер, како и пет други обвинети лица, признаа вина во судскиот процес за случајот „Титаник“.
