!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

По САД, и Израел најави повлекување од УНЕСКО


Ерусалим, 12 октомври, 2017 - 21:03 (META) 

Премиерот на Израел, Бенјамин Нетанјаху, денеска дал инструкции на министерството за надворешни работи да го подготви повлекувањето на земјата од УНЕСКО, јавуваат светските медиуми.

Ова го соопштила израелската влада неколку часа откако САД најавија дека се повлекуваат од УНЕСКО поради „состојбата во организацијата, потребата за реформа и особено поради антиизраелскиот однос на организацијата“.

Нетанјаху ја поздрави одлуката на претседателот на САД, Доналд Трамп, за повлекувањето, оценувајќи ја како храбра и морална.

„Тоа е храбра и морална одлука бидејќи УНЕСКО стана театар на апсурдот. Наместо да ја чува историјата, таа ја искривува“, рекол Нетанјаху, пренесуваат израелските медиуми.

Нетанјаху претходно оваа година ја критикуваше УНЕСКО поради прогласувањето на стариот град во Хеброн на Западниот Брег за палестинско светско наследство.


САД се повлекуваат од УНЕСКО


Вашингтон, 12 октомври, 2017 - 15:47 (META) 

САД донеле одлука да се повлечат од УНЕСКО, соопшти американскиот Стејт департмент.

Како што јавуваат американските медиуми, за одлуката на официјален Вашингтон е известена и генералната директорка на УНЕСКО, Ирина Богова.

„Одлуката не беше лесно донесена и ја изразува загриженоста на САД за состојбата во организацијата, за потребата за реформа, особено на антиизраелскиот однос на организацијата“, стои во соопштението.

Одлуката е донесена поради тензиите околу Палестина, поточно поради резолуцијата што ја донесе УНЕСКО, а која Вашингтон ја смета за антиизраелска.

САД ќе ја напушти светската организација за заштита на историското и на културното наследство на 31 декември.


Заев – Нетанјаху: Македонија и Израел заедно стојат на страната на мирот во светот


Ерусалим, 4 септември, 2017 - 16:03 (META) 

Владина делегација предводена од премиерот Зоран Заев денеска се сретна со премиерот на Израел, Бенјамин Нетанјаху. Двајцата лидери испратиле порака дека стојат заедно на страната на мирот во светот.

– Гледаме заедно кон подобра иднина. Ги разгледуваме начините и полињата каде што можеме да соработуваме во интерес на луѓето и на нашите земји. Научивме од минатото како да ја обезбедиме иднината. Израел е технолошки развиена земја и ќе ѝ помогне на Република Македонија – вели Нетанјаху.

Заев соопштил дека новата Влада ќе ги употреби израелските искуства за квалитетен живот на граѓаните на Македонија.

– Со Израел немаме отворени прашања, пријателски земји сме. Нашата соработка со Израел се надеваме дека ќе биде на две нивоа, безбедноста и светскиот мир, она за што е Израел добар пример во светот. Се надеваме дека низ организациите како што е НАТО – целиме да бидеме членка на НАТО – ќе продолжиме да соработуваме, бидејќи заканите од радикализмот и од екстремизмот се присутни овде, во Израел, и во овој регион, но исто така и во Македонија и во регионот на Западен Балкан. Соработувавме на полето на безбедноста и на одбраната досега и знам дека ќе ја зголемиме соработката, бидејќи е интерес на сите граѓани и нации – рече Заев.

Во изјавата за медиумите Заев нагласил дека Македонија со голема почит го негува културното богатство на Евреите.

Двајцата лидери се договориле за продлабочување на економската соработка, разговарале за израелски инвестиции во Македонија и за директна авионска линија на релација Скопје – Тел Авив.


Заев во Израел доби признание за придонес во развојот на демократијата


Ерусалим, 3 септември, 2017 - 16:56 (META) 

Светскиот еврејски конгрес и Израелскиот совет за меѓународни односи на премиерот Зоран Заев му доделија признание со благодарност за неговиот личен придонес во развојот на демократијата, пријателствата во светот, европските вредности, економската соработка помеѓу Македонија и Израел, како и за почитта и за заштитата на еврејското историско и културно наследство во Македонија.

– Радикализмот и екстремизмот се проблеми кои се на прагот на Израел веќе многу години, но денес се во фокусот на интересот на сите земји во светот. Нелегалната имиграција, која го отвора патот за зацврстување на екстремистите и за ширење радикални идеи, треба да претставува црвен аларм за сите, да најдеме начин за решавање на овие предизвици и да ги заштитиме животите на нашите граѓани. Постојат можности за тоа. Политичката волја е силна. Ни треба поинтензивна соработка меѓу државите повеќе од кога и да е, ако сакаме да обезбедиме светски мир – рече Заев во своето обраќање пред Израелскиот совет за меѓународни односи.

Премиерот нагласил дека Македонија, заедно со другите земји од Балканскиот Регион, работи на зајакнување на регионалните врски и дека преку евроатланските интеграција гледа можност за зајакнување на столбовите на заедничка стабилност и безбедност.

Владината делегација претходно, во чест на жртвите од Холокаустот, положи венец, присуствуваше на молитва и засади дрвце на мирот во Шумата на нациите во Ерусалим со порака „Никогаш да не се повтори, просперитет за сите“.


Заев – Ривлин: Можност за интензивирање на безбедносната и на економската соработка


Тел Авив, 3 септември, 2017 - 14:10 (META) 

Владината делегација предводена од премиерот Зоран Заев денеска, за време на официјалната посета во Израел, се сретна со израелскиот претседател Руевен Ривлин. На средбата се разговарало за можностите за интензивирање на соработката, соопшти владината прес-служба.

– Владата е насочена да обезбеди квалитетен живот на граѓаните и мотивација младите да останат да работат и да живеат во родната земја. Интеграциите во ЕУ и во НАТО и продлабочувањето на односите со пријателските држави, како со Израел, многу ќе придонесат за тоа – рекол Заев.

Премиерот додал дека Владата ќе ги земе предвид искуствата на Израел на безбедносен и на економски план, а двајцата соговорници договориле чекори за економско поврзување на двете земји.

Во владиното соопштение се вели дека израелскиот претседател Ривлин ги поздравил демократските промени во Македонија и реформските определби на новата влада, кои отвораат можности за односите меѓу двете земји.


Владина делегација од 2 до 4 септември во официјална посета на Израел


Тел Авив, 2 септември, 2017 - 17:48 (META) 

Премиерот Зоран Заев, заедно со вицепремиерите Кочо Анѓушев и Оливер Спасовски и со министрите за економија и за земјоделство, Крешник Бекташи и Љупчо Николовски, од 2 до 4 септември ќе престојува во официјална посета на Израел на покана на израелскиот премиер Бенјамин Нетанјаху.

На 3 септември Заев ќе има средба со израелскиот претседател Рувен Ривлин, ќе положи венец на меморијалниот споменик на жртвите од холокаустот Јед Вашем, по што ќе следува работен ручек со членовите на израелскиот Совет за надворешни работи, на кој ќе се обрати македонскиот премиер.

Владината делегација ќе присуствува и на Македонско-израелски бизнис-форум, кој ќе се одржи на тема „Интензивирање на бизнис и економската соработка меѓу Израел и Македонија“.

В понеделник, на 4 септември, Заев ќе има работен ручек со премиерот Нетанјаху, а ќе се сретне и со лидерот на опозицијата, Исак Херцог.

Одделни средби со нивните колеги од Израел, ќе имаат и министрите за внатрешни работи, за економија и за земјоделство, шумарство и водостопанство.

Владината делегација денеска, по пристигнувањето во Израел, ќе присуствува и на фудбалскиот натпревар Израел – Македонија.


Истополови парови во Израел ќе можат да посвојуваат деца


Еурсалим, 30 август, 2017 - 11:07 (META) 

Израелското Министерство за социјални прашања веќе не се противи двојки од исти пол да посвојуваат деца, јавуваат израелските медиуми.

Министерството го информиралo Врховниот суд дека не постои проблем со таквото посвојување, откако беше потпишана петиција против Министерството и Обвинителството што ја поднесе Здружението на родители хомосексуалци.

Промената на ставот, наводно, дошла на барање на министерот Хаим Каца, кој барал професионално мислење, наведува Израелската телеграфска агенција.

Посвојувањето деца од парови од исти пол е легално во Израел од 2008 година, но во практика било речиси невозможно затоа што на двојките од различен пол им се давал приоритет.

Од 2008 година досега само три двојки од ист пол посвоиле деца од вкупно 550 подносители на барање. Спротивно на тоа, повеќе од 1.000 хетеросексуални парови посвоиле деца во последните девет години.


Сопственикот на „ФЕНИ Индустрис“ уапсен во Израел поради перење пари


Тел Авив, 17 август, 2017 - 13:51 (META) 

Милијардерот Бенјамин Штајнмец кој е сопственик на низа компании на Балканот и за кого романските власти имаа распишано потерница е уапсен во понеделникот во Тел Авив за наводно перење пари.

Штајнмец е сопственик на компанијата „Кјунико Рисорсис“ која работи на производство на феро-никел и која е активна во Македонија и во Косово, односно е сопственик на „Фени Индастрис“ во Кавадарци.

Како што пренесуваат израелските медиуми Штајнмец, заедно со уште тројца бизнисмени бил приведен за испрашување поради потпишување на лажни договори преку кои се переле пари поврзани со копање руда во африканската држава Гвинеја.

Сите уапсени се товарат за корупција во која се инволвирани високи романски претставници, а во моментов им се суди во отсуство во Романија.


Сослушана сопругата на Нетанјаху поради трошење јавни пари за приватни цели


Тел Авив, 3 август, 2017 - 16:18 (META) 

Израелската полицијата два часа ја испитувала сопругата на премиерот Бенјамин Нетанјаху поради сомнеж дека користела јавни пари за приватни трошоци.

Како што пренесува израелското јавно радио, таа е испитана вчера во седиштето на Националната единица за разоткривање проневери во Тел Авив, поради обвинението дека користела јавни пари за лични трошоци за водење на домаќинството во официјалните и во приватните резиденции.

Како и во претходните кругови од испитувањето на премиерот и на неговата сопруга, полицијата не издала никакво соопштение за сослушувањето на Сара Нетанјаху.


Отстранети сите дополнителни безбедносни мерки во Ерусалим


Ерусалим, 27 јули, 2017 - 11:45 (META) 

Израелската полиција соопшти дека се отстранети сите неодамна воведени безбедносни мерки на влезот на светото место во Стариот град во Ерусалим.

– Полицијата ги врати безбедносните мерки на нивото на кое беа пред нападите на Харам ел-шариф, извршен на 14 јули – соопшти портпаролката на израелската полиција, Луба Самри.

Израелската влада пред три дена одлучи да ги отстрани детекторите за метал кои се поставени на влезот на светото место во Стариот град во Ерусалим.

Израелскиот кабинет за безбедност ги прифати препораките на сите органи за безбедност да се смени проверката со помош на детектори за метал со напредни технологии и други средства, соопшти канцеларијата на израелскиот премиер Бенјамин Нетанјаху.

Израел постави детектори за метал по нападот од 14 јули, во кој беа убиени двајца полицајци. Ваквата одлука на официјален Тел Авив ги разбесни Палестинците.