!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Арачиновец уапсен пред Врховниот суд, околу појасот носел прачки налик на експлозив


Скопје, 2 ноември, 2017 - 17:39 (META) 

Припадниците на полицијата што денеска го обезбедуваа судскиот комплекс додека траеше изрекувањето на пресудите за случајот „Диво Насеље“, уапсија педесет и седумгодишен жител на Арачиново со иницијали И.И., кој околу појасот имал четири прачки кои личеле на експлозив.

Како што потврдуваат од МВР, осомничениот е одведен во полициската станица во Центaр, каде со него се разговара.

Прачките ќе бидат предадени на вештачење за да се утврди за што точно станува збор.

На видеоснимка од инцидентот што ја објави „А1 он“ се гледа машко лице со тобра како му приоѓа на полицаец пред судот, кратко му се обраќа, по што веднаш следи интервениција на полицаецот и на повеќемина негови колеги кои го приведуваат лицето.


Тројца повредени во тепачка меѓу две групи кај Бит-пазар


Скопје, 20 октомври, 2017 - 0:01 (META) 

Две групи вечерва предизвикале инцидент кај Бит-пазар, во кој, според полициски информации, повредени се три лица, а оштетени се и два автобуси.

Од МВР не ги соопштуваат причините за инцидентот, а дел од медиумите објавија дека тој бил предизвикан од навивачи кои се враќале од фудбалскиот натпревар меѓу Вардар и Реал Сосиедад (0:6).

Како што соопшти МВР, вечерва околу 21 часот било пријавено дека на булеварот Крсте Мисирков на автобуска постојка во автобус со број 50 на Јавното сообраќајно претпријатие „Скопје“, од страна на повеќе лица бил нарушен јавниот ред и мир, а биле нападнати и патници кои биле внатре во автобусот.

Инцидентот почнал на горниот кат од автобусот, каде што настанала тепачка, која потоа продолжила и на долниот кат. Едно од лицата што учествувало во тепачката го фатило воланот на возачот, по што автобусот удрил во друг автобус со број 20.

Откако биле отворени вратите од автобусот, физичката пресметка продолжиле на постојката, а по интервенцијата на полицијата, лицата се разбегале во различни правци.

Во инцидентот повредени се три лица, кои со возила на итна медицинска помош се префрлени во Ургентниот центар.

Засега, како што информира МВР, е приведено едно лице со иницијали Р.Б. и се преземаат мерки за целосно расчистување на случајот и за идентификување на сите учесници во насилството.


СДСМ Карпош го осуди инцидентот пред штабот на ГРОМ


Скопје, 16 октомври, 2017 - 16:57 (META) 

Општинската организација на СДСМ од Карпош преку соопштение го осуди насилството и синоќешниот инцидент што се случи пред штабот на политичката партија ГРОМ, каде едно лице излезе од автомобил, извади лисици и нож и им се закануваше на присутните.

„Очекуваме надлежните институции во најкус рок да го расчистат случајот докрај и сите виновници да бидат изнесени пред лицето на правдата во согласност со законите. Насилството е недозволиво и секој насилен чин, без разлика од кого е сторен, треба да биде соодветно санкциониран од надлежните институции“, велат од партијата.

Лидерот на ГРОМ, Стевчо Јакимовски, денеска на прес-конференција побара кривично да биде гонет напаѓачот и запраша како може СДСМ да не се огради и да не го осуди овој настан.

– Тие што дојдоа да се тепаат се хулигани, поранешни затвореници и членови на подземјето. Како може СДСМ да не се огради и да не го осуди ваквиот настан? Уште помага делото да биде прекршочно, а не кривично. Ова кажува дека политиката и криминалот се заедно, дека СДСМ и криминалот се заедно и дека и понатаму ќе продолжат да вршат насилство – изјави Јакимовски кој го повика Основното јавно обвинителство да реагира.

Инцидентот е забележан и во денешниот полициски билтен, во кој се вели дека возило „мерцедес“ застанало пред штабот на ГРОМ, по што од автомобилот излегол С.Р. кој извадил нож и лисици, упатил закани на присутните и заминал со возилото.


Прекршочни пријави за Елвис Бајрам и за уште 7 лица за тепачката во Шуто Оризари


Скопје, 4 октомври, 2017 - 15:47 (META) 

Министерството за внатрешни работи поднесе прекршочни пријави против актуелниот градоначалник на Шуто Оризари и кандидат на претстојните локални избори, Елвис Бајрам, и уште седум лица за тепачката што се случи во понеделникот во Шуто Оризари.

Министерот за внатрешни работи, Оливер Спасовски, денеска на прес-конференција соопшти дека МВР го расчистило инцидентот.

Целокупниот материјал, како што рече Спасовски, е доставен до Основното јавно обвинителство Скопје.

Сега надлежното обвинителство треба да се произнесе околу понатамошното постапување по овој случај.

„Независно кој од која политичка партија доаѓа, кој чиј симпатизер е, во ваквите и слични случаи за МВР единствено примарно ќе биде почитувањето на законите, што мора и ќе важи за сите еднакво – рече Спасовски.

Тој нагласи дека секаков обид, од кого било, да се злоупотреби полицијата како „наша“ или „ваша“ ќе биде законски санкциониран.

– Ја користам можноста да ја изразам нашата категорична осуда на чинот од 2 септември, како и на сите обиди изборниот процес да се компромитира, а кај граѓаните да се создаде претстава за несигурност. Затоа МВР уште еднаш апелира до сите актери на претстојните избори да ги почитуваат демократските и нормативни стандарди. Македонската полиција нема да дозволи какво било загрозување на правото на граѓаните да го дадат својот глас на мирни, фер и демократски избори – рече Спасовски.


Пет лица повикани во полиција за нападот на Елвис Бајрам


Скопје, 3 октомври, 2017 - 15:05 (META) 

Пет лица се идентификувани и се повикани на разговор во полиција поради учество во вчерашната тепачка во општина Шуто Оризари, во која беше повреден Елвис Бајрам, актуелен градоначалник на општината и кандидат за градоначалник од коалицијата предводена од ВМРО-ДПМНЕ за претстојните локални избори.

Од Министерството за внатрешни работи додаваат дека во тек е прибирањето на доказите за понатамошна постапка.

Оттаму ги осудуваат сите облици на насилство, особено за време на изборната кампања.

„Изборниот процес е наменет за претставување на кандидатите и на нивните програми и Министерството смета дека тоа е единствениот начин преку кој граѓаните треба да бидат запознаени со учесниците во изборниот процес. Секаков обид за нарушување на демократскиот изборен процес и за загрозување на безбедноста на граѓаните ќе биде соодветно санкциониран“, стои во соопштението на МВР.

Инцидентот се случи вчера, околу 18 часот, кога Елвис Бајрам и Аднан Мемет, кој е дел од неговиот изборен штаб, првин биле соборени на земја со тупаници, а потоа биле удирани со клоци и со метални и дрвени прачки.

Бајрам беше хоспитализиран во болницата „8 Септември“, каде му беа санирани повредите.


Собранието не расправаше за законот за јазиците, пауза до утре поради локалните избори


Скопје, 13 септември, 2017 - 15:57 (META) 

По подолга пауза, Собранието попладнево ја прекина 15. седница, на која требаше, меѓу другото, да расправа за Законот за употреба на јазиците, со образложение дека сите парламентарни партии имале обврски поради пријавувањето на кандидати за локалните избори.

Претходно експресно беше изгласана одлуката за објавување јавен оглас за избор на член на Државната изборна комисија (ДИК), која беше уфрлена како дополнителна точка.

Денешната седница мина со две гласања за симнување на законот за јазиците од дневниот ред и со две барања за пауза, кои претседателот на Собранието, Талат Џафери, ги одобри, а последната потраја многу подолго од предвиденото.

Пред давањето пауза во 13.40 часот во Собранието се случуваше жестока расправа за дневниот ред на седницата, кога пратениците од ВМРО-ДПМНЕ излегоа на собраниската говорница. Опозициската партија бараше пауза откако нејзините претставници не успеаја нивните обиди законот за јазиците да се симне од дневниот ред.

Речиси сите координатори на пратеничките групи на ВМРО-ДПМНЕ во расправата бараа да се симне законот од дневниот ред. Тие велеа дека законот не може да има европско знаменце оти не е наведено со кој пропис на ЕУ се усогласува, како и дека е прекршен деловникот, оти не бил даден во Комисијата за политички систем како матична комисија, туку на Комисијата за европски прашања.

Седницата ќе продолжи утре во 11 часот.


МВР поднесе кривична пријава против полицаецот што пукаше во малолетниците


Скопје, 13 август, 2017 - 14:57 (META) 

Министерството за внатрешни работи поднесе кривична пријава и поведе дисциплинска постапка против полицаецот кој застрела и рани двајца малолетници во Струмица.

Како што соопштија денеска од МВР, одделот за внатрешна контрола, криминалистички истраги и професионални стандарди по извршените проверки утврдил дека „полицаецот неосновано, неоправдано и неправило употребил огнено оружје врз лицата Д.Т. и А.Г., односно постапил спротивно на одредбите од Законот за полиција“.

„Против полицискиот службеник е поведена дисциплинска постапка пред надлежната комисија во МВР и со решение на министерот Оливер Спасовски полицискиот службеник ќе биде отстранет од работното место до завршувањето на дисциплинската постапка. До надлежниот јавен обвинител во Струмица е поднесена и кривична пријава поради основано сомнение дека полицискиот службеник сторил кривично дело убиство во обид, предвидено и казниво по член 123 и член 19 од Кривичниот закон на Република Македонија“, стои во соопштението на МВР.

Оттаму додаваат дека ги осудуваат обидите за манипулација со овој настан од страна на одредени политички субјекти.


Полицаец застрелал двајца малолетници во Струмица, обвинителството врши увид


Струмица, 12 август, 2017 - 12:01 (META) 

Полицаец синоќа со службениот пиштол застрелал двајца малолетници во Струмица, од кои едниот со тешки повреди бил хоспитализиран на Клиниката за анестезија, реанимација и интензивно лекување во Скопје (КАРИЛ), а на другиот му бил извршен оперативен зафат во струмичката болница.

Од Јавното обвинителство соопштија дека денеска надлежен јавен обвинител од ОЈО Струмица ќе продолжи со увидот во близина на Градската капела во Струмица, каде се случил инцидентот.

Според првичните информации, што ги соопшти обвинителството, до инцидентот дошло кога екипи од СВР Струмица се обиделе да го сопрат возилото во кое биле двајцата малолетници, а за кои претходно било пријавено дека се обиделе да извршат кражба на чамец во близина на браната Мантово.

Малолетниците на два пати ја избегнале полициската патрола и не застанале, а потоа биле пресретнати од друго полициско возило на споредниот пат кај Градската капела. Од обвинителството велат дека и понатаму се работи на расветлување на начинот на кој дошло до пукањето.

„Едното малолетно лице со посериозни повреди и прострелна рана во градниот кош уште синоќа беше префрлено на Клиниката за анестезија, реанимација и интензивно лекување во Скопје, додека над вториот малолетник е извршен оперативен зафат во болницата во Струмица и тој се наоѓа во добра општа состојба“, стои во соопштението на Јавното обвинителство.

Во увидот се вклучени екипи од Одделот за криминалистичко-технички испитувања и вештачења при Министерството за внатрешни работи од Скопје, а издадени биле и наредби за анализа на биолошки траги, балистичко вештачење, како и вештачење на папиларните линии (отисоци од прсти) подигнати на местото.

Од сите инволвирани во инцидентот биле земени примероци од крв и урина и парафински ракавици, а полицаецот од чие оружје било пукано е задржан во полициската станица во Струмица.

Во текот на денот, во Основното јавно обвинителство Струмица ќе бидат сослушани сведоци на настанот.


Собранието на раб на инцидент со опозициски турканици пред говорницата


Скопје, 11 август, 2017 - 20:41 (META) 

Во собраниската сала страстите се вжештија по 19 часот, кога пратеници на ВМРО-ДПМНЕ се собраа околу говорницата спорејќи со претседателот на Собранието, при што во надвикување и метеж, Илија Димовски од ВМРО-ДПМНЕ ја извлекол картичката на претседателот на Собранието, па тој повика обезбедување, а речиси сите присутни пратеници од опозициската партија беа насобрани околу говорницата.

Целата драма, освен десетминутната пауза, потраја до 20 часот, кога пратениците на ВМРО-ДПМНЕ вревеа и дофрлаа. По некое време ситуацијата се смири и претседателот Талат Џафери го повика обезбедувањето да излезе од салата, по што и пратениците се вратија на своите места. Потоа уследи расправија и докажување меѓу Илија Димовски и Талат Џафери, во кои Димовски го вмеша и координаторот на пратеничката група на СДСМ Петре Шилегов, кој не беше присутен, велејќи дека и Шилегов му кажал дека не може да се разбере со Џафери. Џафери пак кажа и дека се во салата се случува според истиот правилник за редот и дисциплината во Собранието кој бил на сила и на 24 декември 2012 година.

Пред целата врева, Собранието беше еден час на пауза, која ја побара Драган Данев, координатор на една од пратеничките групи на ВМРО-ДПМНЕ. Откако работата продолжи кратко по 19 часот, по една реплика со процедурална забелешка се вклучи Зоран Илиоски кој побара еден час пауза, затоа што како што рече, не знаат како Џафери планира да ја води седницата. Џафери наместо тоа ја повикуваше пратеничката Павлинче Честојнова да излезе да зборува, а Илиоски и Димовски пред неговата маса се расправаа со него, при што Димовски ја извлекол картичката на Џафери. Потоа тој повика и тогаш кај говорницата се собраа и пратениците на ВМРО-ДПМНЕ, барајќи пауза, при што најгласен беше Влатко Ѓорчев. Секоја од страните стоеше на своето уште неколку минути, по што Џафери даде 10 минути пауза.

Веднаш по неа работите продолжија како и претходно, со обезбедувањето и пратениците околу говорницата, при што повторно се бараше пауза и пратениците, посебно Ѓорчев му дофрлаа на Џафери дека неправилно ја води седницата и дека е првиот претседател на Собранието во 70 годишнан историја што пет пати повикал полиција во салата. По помалку од десет минути потоа сепак Џафери го повика обезбедувањето да ја напушти салата а пратениците да се вратат во фотелјите.

Потоа уследи долга расправија со Илија Димовски за тоа како се води седница, при што Димовски приговараше дека пратениците од ВМРО-ДПМНЕ сакаат да знаат каков е планот за работа и рече дека Џафери мора да ја смири нервозата. Притоа беа споменати и насилствата од 24 декември 2012 година.

Полемиката како и кога да се дава пауза и како се работело претходно и како се договара работењето прекина во 20 часот, кога Илиоски го повтори барањето за пауза, порачувајќи дека од побараните час, Џафери дал 10 минути пауза и остануваат 50 минути за пратениците да се координираат.

Веднаш Џафери прогласи пауза до 21 часот.


Советот за етика во медиумите и ЗНМ го осудија инцидентот во Општина Ново Село


Скопје, 26 јули, 2017 - 12:41 (META) 

Советот за етика во медиумите на Македонија (СЕММ) го осуди вчерашниот инцидент во кој екипа на струмичката телевизија „Канал Вис“ била спречена да ја следи јавната седница на Советот на Општина Ново Село од градоначалникот и од советник во општината и ѝ биле упатени навреди и недолични зборови.

Советот за етика повикува да се преземат неопходни мерки за расчистување на ваквите настани, особено кога новинарот е спречен да информира за теми од широк јавен интерес, како што било случај на вчерашната седница, на која се расправало за одлука за референдум за отворање рудници.

„Затвореноста на институциите, организациите или функционерите не може да биде метод со кој ќе се спречува известувањето за теми и за прашања од интерес на јавноста. Од друга страна, новинарите мора да бидат ослободени од какви било закани и притисоци, а државата, во согласност со член 10 од Европската конвенција за човекови права, е одговорна за преземање на сите активни мерки за да се создаде и да се одржува поволна клима за слобода на изразување“, се вели во реакцијата.

Инцидентот го осуди и Здружението на новинарите на Македонија (ЗНМ).

„Колешката Стојне Митева и снимателот Кире Пиличев биле навредувани со најгрди зборови и спречени да известуваат од седницата на Советот на Општина Ново Село одржана вчера, а на која се расправало за распишување референдум за или против работата на рудникот Иловица. За ЗНМ е недозволиво градоначалник на една општина, во случајов Блажо Велков, да спречува новинари во професионално работење, иако станува збор за јавна седница, какви што треба да бидат сите седници на еден општински совет. Уште понедолично е колегите да бидат навредувани од советници избрани од граѓаните. Тие наместо да се залагаат за отчетност и за транспарентност пред избирачите, а тоа најдобро се прави преку медиумско пренесување на нивната работа, се обидуваат да ги спречат новинарите во исполнување на своите обврски“, се вели во соопштението од ЗНМ, кое побара одговорност од градоначалникот и од советникот.

Градоначалникот на општина Ново Село, Блажо Велков, не дозволил на новинарската екипа на „Канал Вис“ да го снима неговото излагање за референдум за рудникот Иловица. На вчерашната јавна седница на Советот, тој го натерал снимателот да ја исклучи камерата, а советникот на ВМРО-ДПМНЕ, Божин Јованов, ги пцуел и ги навредувал медиумските работници на телевизијата, информираат од „Канал Вис“.