Затворен белградскиот аеродром поради инцидент со египетски авион


Белград, 12 септември, 2018 - 10:26 (META) 

Аеродромот „Никола Тесла” во Белград е привремено затворен за полетување и слетување поради инцидент на авион на египетскиот авиопревозник „Иџипт Ер“. Воздушниот сообраќај се пренасочува на соседните аеродроми, а не се знае кога најголемиот аеродром во Србија ќе биде повторно во функција.

На авионот Боинг 737-800 додека слетувал празен му се блокирале тркалата, по што се запалиле пневматиците и останатл на пистата.


Заев го осуди вчерашниот инцидент на Водно, МЕР побара дисциплинска одговорност


Скопје, 30 август, 2018 - 17:04 (META) 

Премиерот Зоран Заев денеска го осуди вчерашниот инцидент на Водно, кога еден од работниците побарал багерите да одат кон активистите од иницијативата „Го сакам Водно“ што со жив штит ја спречуваа работата.

– Прво да изразам жалење за ваквиот начин на однесување на багеристи и кои било други претставници на изведувачите, работници и наши граѓани коишто работат. Апсолутно осуда е ваков настан макар и преку закана дека некој ќе нападне човечки живот или не знам што ќе направи за да ја извршува својата работа – рече Заев одговарајќи на новинарско прашање.

Тој вели дека се работи за проект којшто ќе биде од огромна еколошка, но и економска вредност за граѓаните.

– Секоја цевка заштедува илјадници дрвја пред се и на Водно, а и на Шар Планина заради тоа што гасоводот води кон Тетово и Гостивар. Јас се надевам дека сите заедно внимателно и будно ќе продолжиме да го следиме проектот на реализација на гасификацијата која што поминува во подножјето на Водно заради тоа што дефинитивно која било друга алтернатива може да направи само поголеми штети од ова што сега го имаме – истакна премиерот.

Од државното претпријатие Македонски енергетски ресурси пак соопштија дека е побарано од фирмата што го предводи конзорциумот кој го гради гасоводот работникот што нареди багерите да тргнат кон активистите да не се појавува веќе на градилиштето, а против него да се преземат дисциплински мерки.

Тоа денеска преку соопштение го побараа активистите од иницијативата „Го сакам Водно“.


„Го сакам Водно“ побара дисциплинска постапка против насилникот и јавна дебата


Скопје, 30 август, 2018 - 14:36 (META) 

Иницијативата „Го сакам Водно“ по вчерашниот инцидент на Водно, кога еден од луѓето што работеа на изградбата на гасоводот даде наредба на багерите да ги прегазат активистите, побара виновникот да биде отстранет и веднаш да се почне дисциплинска постапка против него. Истовремено, екологистите побараа дебата со директорот на МЕР, градоначалникот на Скопје и заменик министерот на Министерство за животна средина и просторно планирање (МЖСПП).

„Бараме ревизија на проектот, бараме постапување на институциите по доставените претставки, нивна меѓусебна соработка, а не изземање од надлежности и неделување,
бараме одговорноста за сите наведени пропусти и прекршени законски обврски, казнивост. Нулта толеранција за изигрување на законот и нерегуларно спроведување на целата постапка“ се вели во соопштението.

Екологистите обвинуваат дека на изградбата на гасоводот на Водно се работи речиси „на диво“.

„Се работи без почитување на цела листа на прописи, законски обврски – нема ознаки, нема обележан заштитен појас околу градежните работи, нема знак за предупредување дека работи тешка машинерија, нема документација на терен, работниците се без адекватна униформа и заштитна облека, нема мобилни тоалети, нема соодветен надзор, нема полнење бензин на строго определени места кои се водонепропусни, а се отстрануваат грмушки во период кога не смеат, пред 30 септември“, се вели во дописот од „Го сакам Водно“.

Активистите велат дека не се врши строго и прецизно набљудување од страна на МЖСПП.

„Сите неправилности кои ние ги предочивме, се игнорираат како да не постојат. Ниту еден
механизам кој институциите, државата, ги има на располагање,  не е покренат. Проектот наместо да претрпи сериозна ревизија, се тера на сила, на диво. Кога институциите остануваат глуви, што преостанува освен жив штит?“, велат активистите.


МЕР: Работникот што почнал расправија со активистите ја пречекорил границата


Скопје, 29 август, 2018 - 15:41 (META) 

Државното претпријатие Македонски енергетски ресурси се огласи со реакција на денешниот инцидент на Водно, порачувајќи дека работникот што почнал расправија со активистите не постапил согласно политиката на фирмата и може да биде ставен на дисциплинска постапка.

„Денеска продолжија градежните активности за гасификација на Република Македонија, на трасата преку Водно. Активностите се на потег на кој не е предвидена измена на траса, потегот за кој е добиено одобрението за градба и на кој нема дрвна маса. Се работи во согласост со новите мерки и мерките дефинирани во студијата за животна средина. Откако беа почнати активностите, се појавиле неколку граѓани кои на мирен начин застанале во близина на механизацијата. Градежните машини веднаш ги запреле активностите, после што еден од работниците започнал вербална расправа со активистите. Напоменуваме дека вербалниот инцидент кој го предизвикал работникот не е политика на однесување на МЕР и се коси со протоколите за работа. Варбалниот инцидент силно го осудуваме, а однесувањето на работникот ќе биде предмет на проверка и потенцијална дисциплинска постапка“, се вели во соопштението.


Владата жали што поради безбедносни постапки имало непријатности за фоторепортерите


Скопје, 19 јули, 2018 - 13:32 (META) 

Владата соопшти дека со внимание ги прифатила и анализирала реакциите по инцидентот со фоторепортерите вчера при лидерската средба во Клубот на пратениците и нагласува дека се спроведувале безбедносните насоки, изразувајќи жалење што поради тоа фоторепортери биле оневозможени да работат.

„Водена од врвниот принцип да го почитува и да го овозможува правото на медиумите за непречено, одговорно и професионално известување од настаните од посебен интерес за јавноста и граѓаните, претставниците на Владата на вчерашниот настан обезбедија услови за работа на новинарите и новинарските екипи, соодветно на стандардите за вакви настани и насоките кои ги има добиено од безбедносните институции“, стои во соопштението испратено до медиумите по брифингот што се одржа пред почетокот на денешната лидерска средба.

Во него се изразува жалење што не можеле да се направат исклучоци.

„Поведени од начелото дека треба да бидат обезбедени еднакви услови за сите претставници на медиумите без исклучок, како и заради безбедносни проценки направени од професионалните безбедносни служби, жалиме што не постоеше можност да се направат исклучоци од однапред утврдените и обезбедени услови за работа на сите медиумски екипи. Исто така, Владата изразува жалење за непријатната ситуација до која е дојдено при спроведување на безбедносните насоки и се заложува решенијата да се бараат низ дијалог и соработка“, порачуваат од Владата, нагласувајќи дека остануваат посветени на принципот за еднаков третман на сите.


ААВМУ и СЕММ бараат да престане арогантното и недолично однесување кон медиумските работници


Скопје, 19 јули, 2018 - 11:53 (META) 

По вчерашниот инцидент со тројца фоторепортери на лидерската средба во Клубот на пратениците, со осуда се огласија и Агенцијата за аудио и аудиовизуелни медиумски услуги (ААВМУ) и  Советот за етика во медиумите на Македонија (СЕММ).

Двете тела побараа да се стори сè да им се овозможи на медиумските професионалци да ја извршуваат својата работа и да се сопре со арогантното и недолично однесување од претставниците на власта.

„Агенцијата апелира дека треба да се најде соодветен начин, на медиумските работници да им се овозможи слободен пристап до сите настани што се од јавен интерес дури и во услови кога се воспоставени посебни безбедносни мерки. Зачувувањето на достоинството на новинарската професија е особено важно и од тие причини е неприфатливо арогантно и недолично однесување кон претставниците на медиумите“, се вели во реакцијата од ААВМУ.

Од СЕММ бараат Владата да спроведе истрага за вчерашниот инцидент.

„Служењето на претставници на власта со непримерен речник и дрскост во односот со медиумските работници е недозволиво, што е, исто така, во спротивност со одредбите во Етичкиот кодекс за државниците службеници. Работата на новинарите, фоторепортерите и другите медиумски работници мора да биде ослободена од какви било закани и притисоци, а државата во согласност со член 10 од Европската конвенција за човекови права е одговорна за преземање на сите активни мерки со цел да се создаде и одржува поволна клима за слобода на изразување“, реагираат од СЕММ.

Владата, инаку, пред денешната лидерска средба во 12 часот, закажа брифинг со фоторепортери и сниматели.


ССНМ и ВМРО-ДПМНЕ реагираат за инцидентот со фоторепортерите, Забрчанец со друга верзија


Скопје, 19 јули, 2018 - 10:08 (META) 

Самостојниот синдикат на новинарите и медиумските работници (ССНМ) и ВМРО-ДПМНЕ остро реагираа на, како што велат, „спречувањето на тројца фоторепортери да си ја извршуваат својата работа“ на лидерската средба во Клубот на пратениците, нарекувајќи го однесувањето на претставниците на власта „непримерно и израз на ароганција“. Од владата пак одговорија дека станува збор за несоработка од страна на тројцата фоторепортери.

Фоторепортерите по инцидентот кратко ги оставија своите фотоапарати и друга опрема пред објектот.

„ССНМ бара итно Владата да ја испита ситуацијата во која тројца фото-репортери биле оневозможени да работат и при тоа биле изложени на ароганција и непримерно однесување од страна на преставници на власта, а под изговор на „безбедносни проценки“ на почетокот на денешната лидерска средба. Во изминативе години многу неправди, притисоци и злосторства врз медиуми и медиумски работници се извршени под максимата „согласно Уставот, законите и процедурите“ поради што најостро отфрламе секаков обид ароганцијата, затвореноста и третирањето на новинарската фела со потценување да бидат објаснети со безбедносни или каков било друг вид “проценки“, порача новинарскиот синдикат.

Од ВМРО-ДПМНЕ велат дека станува збор за немање демократски капацитет во власта и побараа Заев да се извини и да го смени својот советник за медиуми.

„ВМРО ДПМНЕ најостро го осудува односот на власта кон медиумите и попречувањето на фоторепортерите професионално да ги извршуваат службените задачи. Заканите и навредите кон медиумите се закани кон јавноста и го покажуваат немањето демократски капацитет на владејачката гарнитура. Премиерот Зоран Заев мора веднаш да се извини на медиумите за недоличното однесување кон професионалците кои само ја вршеа својата работа информирајќи ја јавноста. Премиерот Зоран Заев мора веднаш да го смени својот советник за медиуми кои со закани и потценувачки однос се обиде да ги замолкне и заплаши новинарите“, порача ВМРО-ДПМНЕ.

Марјан Забрчанец, советникот за односи со јавност во Владата, пак, преку својот Фејсбук-профил порача дека тројца фоторепортери одбиле да се упатат во зградата каде што биле сите останати претставници на медиумите.

„Не е точно дека на фотографите и снимателите им било забрането да ја проследат лидерската средба. На сите претставници на медиумите им е овозможен пристап и за фотографирање и за снимање, сала за работа и сите неопходни услови. Повеќе од 20 сниматели и повеќе од 10 фотографи се внатре и непречено работат.

На самиот влез, безбедносните служби проценија дека просторот кај влезот треба да се ослободи, но тројца фотографии одбија да се упатат во зградата каде што се сите останати претставници на медиумите. Реагираа бурно со напад дека “сме се изживувале”, на што јас одговорив дека станува збор за безбедносна проценка, а не за мој личен став и дека ние не се изжувуваме со новинарите како што тоа се случуваше во изминатите 11 години“, напиша Забрчанец.


Груевски: Немав намера да направам инцидент, Џафери да ѝ се извини на јавноста


Скопје, 16 март, 2018 - 14:54 (META) 

Пратеникот на ВМРО-ДПМНЕ и поранешен премиер, Никола Груевски, денеска изјави дека немал намера да предизвика инцидент во Собранието, кога се усвојуваше Законот за употреба на јазиците, туку само сакал да покаже дека не се согласува со начинот на кој бил донесен.

За време на паузата на судското рочиште за случајот на СЈО „ТНТ“, Груевски кажа дека тој само ја оттргнал раката на претседателот на Собранието, Талат Џафери во моментот кога тој го допрел и дека ништо повеќе од тоа не се случило.

Според него, Џафери треба да им се извини и на македонската и на албанската јавноста поради тоа што „на шверцерски начин донел закон кој што ги засега токму албанските граѓани“. Груевски уште додаде дека процедурата при носењето на законот е прекршена, а законот е противуставен.


МВР: Полицајката сама се удрила од пајакот, Асани само вербално ја нападнал


Скопје, 2 март, 2018 - 12:19 (META) 

Полицајката Јасмина Јаначковска која вчера имаше инцидент со функционерот на ДУИ и поранешен претседател на огранокот во Чаир, денеска била примена од министерот за внатрешни работи Оливер Спасовски, извести МВР.

Притоа, според соопштението, таа пред министерот кажала дека не била удрена од Асани, кого долго време медиумите го посочуваат како учесник во некои физички инциденти, туку дека самата се удрил од пајакот.

МВР вчера извести дека „со Б.А. е извршен разговор во полициската станица Бит Пазар и изготвен записник за констатиран прекршок по чл. 13 од Законот за прекршоците против јавниот ред и мир“.

Според денешното соопштение, Спасовски се сретнал со полициската службеничка Јасмина Јаначковска, за лично да се информира за вчерашниот настан, а полицајката рекла дека била вербално нападната од сопственикот на возилото Б.А.

„Пристапи едно непознато лице за кое подоцна разбрав дека станува збор за Б.А., и почна да вика. Веднаш повикав засилување и дојдоа поголем број полициски службеници“, рекла Јаначковска, пренесува МВР.

На прашањето од министерот  дали имало било каков физички контакт и зошто полициската службеничка побарала медицинска помош, Јаначковска објаснила дека со Б.А. „имала само вербална расправија, меѓутоа  при повлекување од местото на настанот таа се удрила со левата рака во специјалното возило „пајак“, но не се здобила со посериозна повреда, што било констатирано и при лекарскиот преглед во ГОБ Св. Наум Охридски“, тврди МВР.

Спасовски порачува дека ги охрабрува сите полициските службеници да постапуваат неселективно и професионално, согласно нивните  законските овластувања.

– Полициските службеници кои постапуваат професионално, од мене како министер и од целото раководство на МВР, ќе имаат целосна поддршка. Сите мора да бидат еднакви пред законот. Заврши времето кога некои беа поеднакви од другите – вели Спасовски.


ВМРО-ДПМНЕ го осуди обидот за замолкнување на медиумите


Скопје, 2 февруари, 2018 - 17:04 (META) 

ВМРО-ДПМНЕ преку соопштение „најостро го осуди однесувањето на МНР“ и „обидот за замолкнување на медиумите професионално да си ја вршат својата новинарска работа“ во врска со вчерашниот настан кога службеник од МНР се обидел да го спречи новинарот на „ТВ 21“ да постави прашање на прес-конференцијата со Метју Нимиц.

„Упатените закани за одземање на акредитација се несфатливи и недозволиви за една државна институција. Денешното извинување не е доволно. Одговорност мора да има, а ваквите постапки соодветно да се санкционираат за да не се повторуваат во иднина. Новинарите мораат да бидат ослободени од секакви закани и притисоци кои ќе влијаат врз нивната работа. Темите кои се од прашање од интерес на јавноста не смеат да бидат вака грубо замолчувани од страна на власта“, велат од опозициската партија.

Од ВМРО-ДПМНЕ апелираат во иднина да им биде дозволено на новинарите непречено да си ја извршуваат својата работа, а институциите да се стават во заштита на слободата на изразувањето.