Сенатот на САД, односно горниот дом на Конгресот, изгласа предлог-закон кој вклучува хуманитарна и воена помош за Украина, Израел, Газа и Тајван во вредност од 95 милијарди долари, но и го принудува сопственикот на ТикТок да ја продаде социјалната мрежа поради безбедносни причини, пренесува Би-би-си.
Долниот дом на Конгресот, односно претставничкиот дом, изминатиот викенд го изгласа предлог-законот, а се очекува дека претседателот Џо Бајден ќе го потпише истиот.
Мерката вклучува 61 милијарда долари воена помош за Украина, 26 милијарди долари помош за Израел (во која спаѓа и хуманитарна помош за Газа) и 8 милијарди долари помош за земји во југоисточна Азија, вклучувајќи го Тајван, за да се спротивстават на „комунистичката Кина“.
Украинскиот претседател Володимир Зеленски неколкупати во последните недели изјави дека помошта од САД е „клучна“ и дека без неа Украина би ја изгубила војната против Русија. Тој им се заблагодари на САД откако Претставничкиот дом го изгласа предлог-законот.
Тајванскиот претседател и израелскиот министер за надворешни работи исто така се заблагодарија на САД, но претставник од кинеската влада изјавил дека предлог-законот „може да ја прати погрешната порака на силите кои се залагаат за независност во Тајван“.
Но, можеби и поконтреверзниот дел од предлог-законот се мерките против ТикТок.
ТикТок се противи на предлог-законот, велејќи дека истиот „ги прекршува правата на слободата на говорот на 170 милиони Американци и би затворил платформа која придонесува 24 милијарди долари за американската економија годишно“.
Американските конгресмени тврдат дека апликацијата им овозможува на кинеските власти да ги шпионираат американските корисници на апликацијата.
ТикТок тврди дека никогаш нема споделено податоци со кинеската влада и дека не би сторило тоа доколку кинеската влада им побара.
Други противници на предлог-законот велат дека доколку кинеската влада сака да има пристап до податоците на американски граѓани, таа може да стигне до нив преку комерцијални брокери на податоци.
