Во тек се консултации за избор на нови министри од редовите на Демократската унија за интеграција (ДУИ), а засега нема најави од ВМРО-ДПМНЕ за промени на министерскиот состав од оваа партија, соопштиле од кабинетот на техничкиот премиер Емил Димитриев за „Телма“.
„Премиерот Емил Димитриев ги прифати оставките на министрите од ДУИ и согласно процедурата тие се испратени до Собранието. Право на политичката партија ДУИ е кои лица ќе ги повлече од позициите за министри и кои лица ќе ги определи и достави како предлози за избор на министри и за овој процес се во тек консултации. Од страна на ВМРО-ДПМНЕ до Владата нема пристигнато најави или информација за промени на министрите од редовите на партијата и коалицијата „За подобра Македонија“ која ја предводи“, стои во дописот од кабинетот на Димитриев.
Претседателот на ВМРО-ДПМНЕ, Никола Груевски, кој денеска беше во посета на Струмица, потврдил дека нема да има промени во министерскиот состав од неговата партија, бидејќи времето било кусо, но нагласил дека ќе има промени во идната Влада.
Во врска со смената на министрите на ДУИ, генералниот секретар на СДСМ и министер за внатрешни работи, Оливер Спасовски смета дека станува збор за политичка игра на ВМРО-ДПМНЕ и ДУИ.
– Тоа е работа која што заедно ја договараат ДУИ и ВМРО-ДПМНЕ и тоа е прашање кое треба да го одговорат овие две политички партии. Не очекувам ништо спектакуларно, односно очекувам замена на одредени имиња со кои што ќе пратат привидна порака до јавноста дека се менуваат – изјави денеска Спасовски во Штип.
Оставките на министрите и замениците-министри на ДУИ утре се очекува да бидат на дневен ред на седница на Собранието.
