Политичката криза во Македонија била една од темите за кои кусо зборувале шефот на грчката дипломатија, Никос Коѕиас, и неговиот американски колега, Рекс Тилерсон. Коѕиас и Тилерсон се сретнаа вчера во Стејт департментот и главно разговарале за улогата на Грција на Медитеранот и во Балканскиот Регион, продолжувањето на соработката со САД и за енергетските проекти.
По првата официјална средба со Тилерсон во Вашингтон, во изјава за грчките новинари Коѕиас нагласи дека не разговарале конкретно за Македонија, но тој пред американскиот колега ја споменал македонската политичка криза за време на разговорот за стабилноста и за ситуацијата на Балканот. Тилерсон, според Коѕиас, бил заинтересиран да слушне што мисли Грција кои се силите кои го дестабилизираат Балканскиот Регион.
„Кога ги образложував темите за стабилноста во регионот, ја спомнав и нестабилноста што владее кај северните соседи и нашиот обид да ги стабилизираме“, изјави доста воопштено Коѕиас.
Според Коѕиас, тој на оваа средба се обидел да ја покаже волјата на грчката влада да ја продолжи соработката со САД и да покаже колку е важна улогата и позицијата на Грција регионот. Според грчките медиуми, Коѕиас на Тилерсон му извадил и мапа, посочувајќи дека Грција е единствената стабилна држава во нестабилен регион.
Шефот на грчката дипломатија за време на посетата на Вашингтон ќе се сретне и со новиот советник за безбедност на администрацијата на Доналд Трамп, генерал-полковник Херберт Р. Мекмастер.
