fbpx

Стејт департмент: Разочарани сме што две санкционирани лица беа предложени за функции во Владата на Србија

Мандатарот Вучевиќ за иден вицепремиер го предложи Александар Вулин, а за министер без ресор Ненад Поповиќ, двајцата познати по своите силни врски со Русија

-

„Ние сме разочарани што гледаме две санкционирани лица номинирани за позиции во новата влада“, вели портпаролот на Стејт департментот во писмена изјава за Гласот на Америка на српски јазик.

Според најавите на мандатарот Милош Вучевиќ, новата Влада на Србија ќе има и двајца членови кои се под санкции на САД: Александар Вулин, кој е предложен за вицепремиер и Ненад Поповиќ, кој е предложен за министер без ресор.

„Нашиот став за г-дин Вулин е добро познат. Тој останува под санкции на САД“, се вели во соопштението на портпаролот на Стејт департментот. Исто така, се нагласува дека САД не играат никаква улога во кадровските решенија на српската влада, објави Гласот на Америка.

Мандатарот за состав на новата Влада на Србија и претседател на Српската напредна партија (СНС), Милош Вучевиќ вчера ги соопшти имињата на министрите што ќе ги предложи за новиот состав на Владата. Читајќи ги имињата на членовите на идниот кабинет, Вучевиќ меѓу другото го спомена како иден вицепремиер Александар Вулин – еден од најконтроверзните актери на српската политичка сцена – кој се смета за човек со силни руски врски и кој од 11 јули минатата година е на листата на санкции на Министерството за финансии на САД за „коруптивни и дестабилизирачки акти“, заради унапредување на сопствените политички агенди и лични интереси, а на штета на мирот и стабилноста на Западен Балкан.

„Санкционирањето на Александар Вулин ја покажува решеноста на САД да ги повикаат на одговорност оние кои се впуштаат во коруптивни активности кои ги унапредуваат нивните сопствени политички агенди и лични интереси на штета на мирот и стабилноста на Западен Балкан. Тие коруптивни зделки го олеснуваат ширењето на руските злонамерни активности во Србија и регионот“, се вели во соопштението на Канцеларијата за контрола на странски средства на Министерството за финансии на САД (OFAC) објавено при воведувањето на санкциите во јули 2023 година.

Брајан Нелсон, потсекретарот за тероризам и финансиско разузнавање, тогаш рече дека американските власти нема да се двоумат да ги санкционираат службениците кои ја злоупотребуваат функцијата за лична корист – истовремено поткопувајќи ја демократијата на Западен Балкан.

Во соопштението се наведува дека Вулин, висок функционер во кабинети на Владата на Србија (ја вршел функцијата министер за одбрана и внатрешни работи), бил вклучен во транснационален организиран криминал, нелегални операции поврзани со наркотици и злоупотреба на јавна функција.

„Вулин имаше користољубив однос со трговецот со оружје Слободан Тешиќ – помагајќи илегалните пратки на оружје на Тешиќ да се движат слободно преку границите на Србија. Дејствијата на Вулин промовираа корупција во владините институции во Србија. Овие дела вклучуваат користење на неговиот авторитет за лична корист, вклучително и вмешаност во синџир за шверц на дрога. Тој ја искористи својата позиција за да ја поддржи Русија, олеснувајќи ги злонамерните активности на Русија кои ја деградираат безбедноста и стабилноста на Западен Балкан и обезбедувајќи ѝ на Русија платформа за натамошно влијание во регионот“, се вели во соопштението. Беше посочено дека институциите на кои тој беше на чело во минатото не се цел на санкции.

Во ноември 2023 година, американскиот Стејт департмент воведе санкции против Ненад Поповиќ, поранешен министер без ресор во Владата на Србија, и компаниите поврзани со него.

„Поповиќ одржува блиски врски со Кремљ и ја користи својата мрежа за коруптивни шеми за лично да се збогати“, рече портпаролот на Стејт департментот Метју Милер во соопштението.

Поповиќ е поранешен потпретседател на Народното собрание на Република Србија и претседател на парламентарната група за пријателство со Руската Федерација. Тој е поранешен потпретседател на Демократската партија на Србија.

„Ненад Поповиќ беше министер во Владата на Србија од 2017 до 2022 година, а ја основаше националистичката Српска народна партија во 2014 година. Поповиќ поседува бројни компании и холдинзи во Србија и Русија. Од 1990-тите, Поповиќ ги користи своите деловни зделки во Русија за да се збогати и да стекне блиски врски со високите лидери на Кремљ. Поповиќ продолжува да ги користи своите врски со Кремљ за да обезбеди бизнис за своите холдинг компании, од кои повеќето работат во консултантски, недвижности и електроника во руската економија, за да го изгради своето лично богатство преку проневера и даночни шеми. Стејт департментот го назначува Ненад Поповиќ како некој кој работи за електронскиот сектор на Руската Федерација. Главните холдинг компании на Поповиќ со седиште во Русија ги вклучуваат „Asset Electro LLC“ и „Asset Automation LLC“. „Mosen Asset Management LLC управува со секојдневното работење на холдинзите на Поповиќ во Русија“, соопштија американските власти.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

Владимир Путин во посета на Виетнам

Рускиот претседател Владимир Путин пристигна во Виетнам, каде ќе се сретне со лидерите на владејачката Комунистичка партија. Со оваа посета, рускиот претседател ја завршува својата кратка тура на официјални...