Владата на денешната седница донесе Одлука за давање согласност на Договорот за доделување на државна помош склучен помеѓу Владата на Република Северна Македонија, застапувана и претставувана од Дирекцијата за технолошки индустриски развојни зони и „НЕКСТ.Е.ГО МОБИЛЕ”.
Со мултимилионска инвестиција од НЕКСТ.Е.ГО МОБИЛЕ СЕ, Ахен, Германија во ТИРЗ Тетово е планирано да се произведуваат електричните возила e-go, со што ќе се отворат 3-4.000 нови работни места.
„Ова е за првпат во автомобилската индустрија кај нас да се продуцира целосен автомобил и се разбира за првпат ќе се произведуваат електрични автомобили“, истакнаа од Владата.
Според владините предвидувања, придобивките од оваа инвестиција се многукратни – од отворање на нови работни места, извоз на производи со голема додадена вредност, пренос на знаење и технологии, мапирање на земјава кај странските инвеститори во оваа фела, до договори и дополнителна работа за локални компании.
Артан Груби преку објава на неговата Фејсбук страница денеска најави дека на годишнината на Охридскиот рамковен договор, на 13 август, во ТИРЗ Тетово ќе биде поставен камен-темелник за идната автомобилска фабрика. Инвестицијата во првичната фаза ќе создаде 900 работни места.
