!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Џафери на конференција на претседатели на парламенти од Западен Балкан


Будимпешта, 27 октомври, 2017 - 9:57 (META) 

Претседателот на Собранието, Талат Џафери, на покана од претседателот на унгарското национално собрание, Ласло Ковер, ќе се обрати на осмата конференција на претседатели на парламенти од земјите на Западен Балкан, што се одржува во Будимпешта.

Учесниците на конференцијата ќе се осврнат на темите „ЕУ интеграции: резултати и аспирации“ и „Безбедносната димензија на соработката во Западен Балкан: придонес кон стабилноста на Европа“, a Џафери ќе се обрати на темата „ЕУ-интеграции: резултати и аспирации“.

Во рамки на конференцијата, претседателот на македонското Собрание ќе оствари и неколку билатерални средби со претседателите на парламентите од регионот.


Иванов во дводневна работна посета на Брисел


Скопје, 24 октомври, 2017 - 12:42 (META) 

Претседателот на државата, Ѓорге Иванов, од утре ќе претстојува во дводневна работна посета на Брисел, соопштија денеска од неговиот кабинет.

Утре, како што информираат од кабинетот, Иванов ќе има средба со претседателот на Европскиот совет, Доналд Туск.

В четврток, македонскиот претседател ќе учествува на 19. годишна сесија на Форумот за домашна и глобална безбедност, во рамки на Форумот „Кран Монтана“. Предвидено е Иванов да се обрати на официјалната сесија на отворањето на форумот, како и на пленарната сесија посветена на соседската политика на Европската Унија, со посебен фокус на иницијативата „Три мориња“.

„За време на работната посета на Брисел, претседателот Иванов ќе оствари средба со заменик-претседателот на владата и министер за надворешни работи и европски прашања на Кралството Белгија, Дидие Реиндерс“, стои во соопштението.


Заев со кратовци ја прослави историската победа на изборите и повика на единство


Кратово, 18 октомври, 2017 - 14:29 (META) 

„Новиот градоначалник и новиот Совет на Општина Кратово да работат во интерес на граѓаните, да бидат нивен сервис и внимателно да ги слушаат граѓаните, бидејќи нема пoголема вредност од среќни и задоволни граѓани“, порача лидерот на СДСМ, Зоран Заев, на синоќешното обраќање на граѓанскиот собир во Кратово, по повод победата на локалните избори што се одржаа во неделата.

Заев, пред граѓаните на Кратово, ја повика новата локална власт да работи неселективно и во интерес на сите граѓани, бидејќи, како што рече, само така може да се очекува развој и напредок на градот.

– Оставам аманет кај локалната власт, до претставниците на централната власт, тука во Кратово, но и до вас граѓаните. Ја донесовте слободата, ја заслуживте и радувајте ѝ се, но истовремено ја донесовте слободата и за тие што не гласаа за нас. Имајте разбирање и за тие ваши и наши сограѓани бидејќи и ним не им беше лесно. Наша должност е да отвориме нови страници овде, во Кратово. Го имате мојот и зборот на извршната власт, ќе ве поддржиме, за сите ние да се гордееме со Кратово. Но, не заборавајте, поделени, можеме да се мачиме во решавање на постојано исти проблеми, сплотени и здружени можеме да се радуваме на многу нови предизвици секој ден, секој месец, секоја година – порача Заев.

Новиот градоначалник на Кратово, Љупчо Бојаџиев, кој на гласачкото ливче беше кандидат на СДСМ, на изборите во неделата однесе убедлива победа над кандидидатот на Социјалистичката партија и на коалицијата предводена од ВМРО-ДПМНЕ, Мите Андоновски.

Инаку, ова е првпат од осамостојувањето на Македонија, победникот на локалните избори во Кратово да не е кандидат на Социјалистичката партија на Љубисав Иванов – Ѕинго, која во досегашните изборни циклуси настапуваше во коалиција со повеќе партии.


Жбогар: Политичките лидери и партиите да ги спроведат изборите без заплашувања и насилство


Скопје, 12 октомври, 2017 - 19:01 (META) 

Амбасадорот на Европската Унија во земјава, Самуел Жбогар, денеска преку видео-обраќање по повод локалните избори в недела ги повика граѓаните да го исполнат своето право на глас, а политичките лидери и партиите да ги спроведат изборите без „заплашувања и насилство“.

Жбогар порака ја испрати на македонски јазик.

– Локалните избори на 15 октовмри се можност за вас граѓаните да ги изразите вашите гледишта за правецот по кој вашите општини треба да се движат во иднина. Ги повикуваме политичките лидери и членовите на партиите да ги спроведат изборите без заплашување и насилство. Потсетуваме на важноста да се направи јасна поделба меѓу државните и партиските активности пред, за време и по изборите. Ние сметаме на државните институциите како што е полицијата, независните институциите, како што е Државната изборна комисија, како и граѓанското општество да го исполнат својот дел од одговорноста за одржување на демократски, слободни и фер избори. И, на крајот, секој глас е важен. Ги повикуваме сите граѓани да го исполнат своето демократско право на глас и на тој начин да ја обликуваат иднината на своите општини – рече Жбогар во обраќањето.

Претходно денеска и Амбасадата на Соединетите Американски Држави во Македонија преку соопштение порача дека претстојните локални избори се важни за иднината на Македонија како просперитетна, стабилна демократија, целосно интегрирана во евроатлантските институции и ги повика граѓаните да излезат и да гласаат.


Димитров во ОБСЕ ги претстави реформите и ја нагласи важноста на слободните медиуми


Виена, 12 октомври, 2017 - 18:39 (META) 

Шефот на македонската дипломатија, Никола Димитров, денеска имаше обраќање пред Постојаниот совет на ОБСЕ во Виена, во кое, говорејќи за реформите на Владата, поврзани со владеењето на правото, изборниот систем, силни и професионални институции, развој на здрави механизми на контрола, независно судство и слободата на медиумите, се повика на цитатот од американскиот дипломат Адлај Стивенсон – „Слободните медиуми се мајка на сите слободи и на нашиот слободен напредок“.

Димитров, како што соопшти Министерството за надворешни работи, го претставил „оптимизмот кој завладеа во македонското општество по долгата криза“, но и зголемените очекувања на граѓаните како од новата Влада, така и од меѓународната заедница.

Тој ја нагласил важноста од искреното соочување со предизвиците кои постојат во едно општество, елаборирајќи ја реформската агенда содржана во планот „3-6-9“ на Владата.

Димитров за време на посетата на ОБСЕ имал средба со генералниот секретар на организацијата, Томас Гремингер, како и кратка средба со специјалниот претставник на ОБСЕ за слобода на медиумите, Харлем Дезир.

Тој, како што информираат од МНР, се сретнал и со генералниот секретар во Министерството за наворешни работи на Австрија, Михаел Линхарт, со кого разговарал за одличните билатерални односи меѓу двете земји, економската соработка, за соработката во текот на мигрантската и бегалската криза во изминатите две години, а станало збор и за Берлинскиот процес и приоритетите и плановите на австриското претседавање со Советот на ЕУ во втората половина на 2018 година.


Димитров ќе информира за реформите пред Комитетот за надворешни работи на ЕП


Брисел, 10 октомври, 2017 - 10:13 (META) 

Шефот на македонската диломатија, Никола Димитров, денеска ќе има редовно обраќање пред Комитетот за надворешни работи во Европскиот парламент (АФЕТ), соопшти Министерството за надворешни работи.

На состанокот, Димитров пред членовите на Комитетот ќе информира за текот на имплементацијата на клучните реформи во земјава, чија цел е да се отвори патот за обновување на препораката за почеток на пристапните преговори со Европската Унија.

Димитров, како што информираат од МНР, ќе има и средби со пратеници на Европскиот парламент.

Комитетот за надворешни работи e работно тело на Европскиот парламент во кое членуваат претставници од различни парламентарни групи застапени во парламентот.


Заев: Наша цел е да ја вратиме демократијата и да ја забрзаме интеграцијата во НАТО и во ЕУ


Њујорј, 23 септември, 2017 - 10:31 (META) 

Владата на Република Македонија ја потврдува својата посветеност на основните демократски вредности, добро владеење, владеење на правото и почитување на човековите права, рече премиерот Зоран Заев на обраќањето на 72. Генерално собрание на Обединетите нациии во Њујорк.

Заев оцени дека освен прилагодувањата на глобално ниво, потребно е секоја земја да се посвети на решавање и на домашните прашања.

„Ние надминавме длабока политичка и институционална криза преку нашиот решителен став во одбрана на овие основи. Нашето разбирање е дека демократијата треба да биде управувана со граѓански ангажман. Нашата цел е да ја вратиме демократијата, да изградиме професионални и независни институции и да го подобриме животниот стандард за секој граѓанин. Нашата цел е да ја забрзаме интеграцијата на Македонија во ЕУ и во НАТО“, рече Заев.

Тој додаде дека Македонија активно придонесува за регионалната стабилност и соработка.

„Привремената спогодба од 1995 година ги постави темелите за нормализирање на односите помеѓу Македонија и Грција. Во моментов двете земји спроведуваат мерки за градење доверба. Ова е многу позитивен развој. Имаме нов поттик за надминување на долготрајниот билатерален спор“, рече Заев.

Премиерот додаде дека главна цел е да се затвори проблемот.

„Јас цврсто верувам дека мораме да го искористиме моментот, да разговараме во вистинска смисла и да го решиме проблемот за наша заедничка иднина. Високо ги цениме континуираните напори на личниот претставник на генералниот секретар на ОН, Метју Нимиц. Цврсто верувам дека постои начин да се надмине проблемот што Грција го има со нашето уставно име. За промена, да се обидеме да му пријдеме од позитивна гледна точка“, додаде премиерот Заев.

На крајот од обраќањето, Заев рече дека Македонија ќе продолжи да работи со сите земји-членки на ОН за заедничко зајакнување на светскиот мир и безбедност и за унапредување на човековите права.


Заев ќе се обрати пред Генералното собрание на ОН


Њујорк, 22 септември, 2017 - 10:21 (META) 

Премиерот Зоран Заев денеска ќе се обрати пред Генералното собрание на Обединетите нации во Њујорк и ќе се сретне со генералниот секретар на ОН, Антонио Гутереш, соопшти владината прес-служба.

На денешната агенда на македонскиот премиер е предвидена средба со вицепремиерот и министер за надворешни работи на Виетнам, Фан Бин Мин, како и кратка средба со премиерот на Непал, Шер Бахадур Деуба, на приемот по повод националниот ден на оваа земја.

Заев денеска ќе има и обраќање на конференцијата „Нов старт на Балканот“, во организација на УНДП.

Претседателот на македонската влада вчера имал средба со премиерот на Кралството Холандија, Марк Руте, кој дал поддршка на реформскиот процес што го почна Владата и ги поздравил чекорите што ги презема државата за градење на добрососедски односи и регионална соработка.

Руте истакнал дека Холандија останува силен поддржувач на Македонија во заложбите на нашата држава за постигнување на стратешките цели, членство во Европската Унија и во НАТО.

Заев на средбата посочил дека очекува есенва да се тргне условеноста на препораката за членство на Македонија во ЕУ, а следен чекор да биде датум за почеток на преговори.


Заев од Њујорк: Подготвени сме да ги слушаме нашите граѓани


Њујорк, 20 септември, 2017 - 15:32 (META) 

Воспоставувањето доверба меѓу владите, граѓаните и организациите од различни видови е од клучно значење за воспоставувањето транспарентни и енергични демократии, порача премиерот Зоран Заев во своето обраќање на панел-сесијата „Отворено владино партнерство – Враќање на довербата во владата“, во рамките на дебатите на 72. Генерално собрание на Обединетите Нации во Њујорк.

Тој се осврна на искуствата на Македонија, кои, како што рече, покажаа дека кризата може да се надмине само низ заедничка соработка со сите граѓани, организации и политички субјекти и со силна политичка волја да се одделат институциите од партиските влијанија, за тие да бидат независни и да работат исклучиво за граѓанските интереси.

– Како новоизбрана влада, еден од нашите највисоки приоритети е да покажеме подготвеност да слушаме. Ние сакаме да ги слушаме нашите граѓани. Работиме во насока на воспоставување механизми за континуирана консултација со Владата, нашите министерства и агенции. Сакаме да ја смениме културата на комуникација во Македонија – рече Заев.

Премиерот потсети дека Македонија во 2011 година стана 35. членка на Партнерството за отворена влада и соопшти дека досега има направено три акциски планови. Тој истакна дека особено внимание се посветува на транспаретноста околу буџетот и одговорноста на владините институции, стандардизираните информации за јавните набавки и извештаите за здравствените програми.

– Исто така, сметаме дека е важно целите на партнерството за отворени влади да се комплементарни со целите на одржливиот развој, што се однесуваат на сиромаштијата, родовата еднаквост, целно партнерство, климатски активности, мирот, правдата и силни институции – рече Заев, нагласувајќи дека ова е во согласност и со планот на Владата за демократски реформи, односно планот „3-6-9“.

Заев оцени дека собирот на оваа тема на светско ниво, покажува колку државите и раководствата се свесни за значењето на отвореноста на владите.

– Мојата порака денеска е да дадеме живот на транспарентноста и на граѓанското учество. Да ја изградиме довербата во владата и демократијата. Кога сите имаат еднакви шанси слободно да ги искажат своите грижи и кога тие се сфаќаат сериозно, тогаш ние сме во заедничка и одржлива конекција со нашите граѓани за повторно градење и преиспитување на демократијата заедно – рече премиерот.


Трамп се закани дека САД би можеле целосно да ја уништат Северна Кореја


Њујорк, 19 септември, 2017 - 19:12 (META) 

Претседателот на САД, Доналд Трамп, во своето прво обраќање пред Генералното собрание на Обединети нации во седиштето на организацијата во Њујорк, изјави дека доколку Америка биде во ситуација да мора да се брани себеси или нејзините сојузници, би немала друг избор освен целосно да ја уништи Северна Кореја.

Тој ја нападна земјата и нејзиниот лидер Ким Јонг-ун, велејќи дека Северна Кореја „се заканува на целиот свет со незамисливи загуби на животи“ со својата нуклеарна програма.

– Ако праведното мнозинство не се спротивстави на злобното малцинство, злото ќе триумфира – порача Трамп, говорејќи на отворањето на 72. Генерално собрание на светската организација.

Тој порача дека против интересите на целиот свет е Северна Кореја, која ја нарече „банда криминалци“, да има ракети и нуклеарно оружје.

– Ракетарот е на самоубиствена мисија – рече Трамп, мислејќи на севернокорејскиот лидер. Тој го обвини Ким Јонг-ун дека води режим кој го изгладнува сопствениот народ и го убил братот на лидерот со отровни хемикалии.

Иако се заблагодари на Русија и на Кина за поддршката на неодамнешните санкции од ОН против Северна Кореја, тој индиректно ги нападна поради продолжувањето на соработката со севернокорејскиот лидер.

– Сега е време сите заедно да работиме и да го изолираме Ким сè додека тој не престане со непријателското однесување. Суверените држави мора да бидат основа на светскиот поредок. Мораме да ги отфрлиме заканите по суверенитетот од Украина до Јужно Кинеско Море. Очекувам сите држави да ги почитуваат интересите на својот народ, како и правата на другите суверени држави – посочи Трамп.

Тој се осврна и на Иран и ја нарече „економска празна отпадничка држава, чиј единствен извозен производ е насилството“. Договорот за нуклеарната програма на Иран, Трамо го нарече „срамен“ и рече дека светските лидери не можат да се држат до договорот ако тој ја продолжува иранската нуклеарна програма.

Во врска со кризата во Венецуела, нарекувајќи ја „неприфатлива“, Трамо рече дека во земјата владее „социјалистичка диктатура“.

– САД не можат само да стојат на страна и да гледаат – рече Трамп.