Кривична пријава од Левица за Заев „затоа што прифатил промена на уставното име“


Скопје, 21 мај, 2018 - 11:45 (META) 

Во Основно јавно обвинителство Скопје денеска партијата Левица поднесе кривична пријава против премиерот Зоран Заев, кого го обвинува за нарушување на уставниот поредок на државата „затоа што прифатил промена на уставното име“.

Како што рече Димитар Апасиев, со изјавите во четвртокот, 17 мај, со кои прифаќа решение ерга омнес со Грција, Заев како премиер ги загрозил преговарачките позиции на Македонија и ја довел државата во зависна положба од друга држава.

– Со јавното ветување на Заев пред грчкиот премиер Ципрас, за прифаќање промена на уставното име за севкупна употреба – „ ерга омнес“ и ветувањето дека тој ќе се заложи да се промени името на државата за внатрешна и надворешна употреба, Заев го загрози уставниот поредок на Македонија – рече Апасиев.

Левица размислува да ја прошири кривичната пријава и со министерот за надворешни работи Никола Димитров, за кого велат дека со јавното признавање дека стои зад предлогот на Заев, станува соучесник.


Левица му го замрзна членството на Бранимир Јовановиќ во партијата


Скопје, 28 јануари, 2018 - 20:41 (META) 

Президиумот на политичката партија Левица, на седница одржана во петокот, оваа недела, донел одлука да му го замрзне членството во партијата на Бранимир Јовановиќ, актуелен советник на министерот за финансии Драган Тевдовски, соопшти денеска партијата.

Јовановиќ минатата година поднесе неотповиклива оставка од сите партиски функции во Левица (координатор на програмски сектор економија и член на Централниот комитет на партијата), и ја прифати понудената функција советник во кабинетот на Тевдовски.

„По ова, ЦК на Левица едногласно ја прифати неговата оставка и пасивизацијата на неговото членство и реши да не го сакционира на никаков начин, туку само да ја следи неговата работа во новата Влада. Но, по последниот развој на настаните, поврзани со носењето на серија крајно штетни економски одлуки кои не беа предвидени ниту во предизборната програма на владејачката коалиција – Президиумот одлучи привремено да го замрзне членството на Бранимир Јовановиќ во Левица, поради јавно застапување политики и ставови кои се суштински спротивни на нашата идеологија и на најважните основачки акти на партијата“, стои во соопштението.

Левица бара од министерот Тевдовски и од неговите советници, „доколку себеси сè уште се декларираат за социјалдемократи“, да престанат да ги празнат џебовите на работниците, за сметка на невоведувањето прогресивен данок со кој би ги опфатиле енормно високите приходи на олигарсите и на богатите.


Пред Собранието протести против НАТО и бандера кутната од ветрот


Скопје, 18 јануари, 2018 - 12:12 (META) 

Припадниците на Левица и поранешната пратеничка Солза Грчева одржаа протест пред Собранието на Република Македонија пред пристигнувањето на Генералниот секретар на НАТО, Јенс Столтенбер, кој треба да се обрати пред пратениците.

Покрај демонстрантите, кои извикуваат анти-НАТО пароли, се наоѓа падната бандера, која била кутната од ветрот.


Савески: Ќе има ли еден аршин за Богоевски, друг аршин за обвинетите од Левицa


Скопје, 18 јануари, 2018 - 11:53 (META) 

Познатиот активист д-р Здравко Савески ја поздрави одлуката на Обвинителството да не го гони Павле Богоевски, но порача дека треба да се има еднаков пристап и кон членовите на Левица, кои се исто така обвинети поради активностите во Шарената револуција. Во пост на неговиот Фејсбук-профил рече дека ако членовите на Левица, чиј основач е тој, не бидат еднакво третирани како Богоевски, тоа ќе значи дека со критичарите на власта се постапува по друг аршин.

„Обвинителството нема да го гони Павле Богоевски. Правилен потег. Немаше основа за кривично гонење. Но, во контекст на тоа што кривичната постапка против нас, членовите на Левица, поради нашето учество во протестите во 2016 година, се уште трае – да се повлече обвинението против Павле Боговски, а да не се повлече против нас – ќе да тоа посочува на двојни аршини. За тој што е во власта еден аршин, а за тој што критикува друг аршин“, напиша Савески.

Поранешниот универзитетски професор реагира и дека судскиот процес против него се развлекува безмалку две години, а како што вели, може да продолжи и до 10 години постојано малтретирање со влечкање по судови.

„На 25 јануари повторно ќе се појавам на суд. Судскиот процес трае без малку 2 години, а постапката е буквално на самиот почеток. Ќе дочекам пресуда за помалку од 10 години или во мојот случај на тој начин ме казнуваат за критиките кон претходната и кон сегашната власт – со влечкање по судови што е можно подолго?“, прашува Савески.


Управниот суд одби 16 тужби против одлуките на ДИК


Скопје, 23 октомври, 2017 - 19:10 (META) 

Судечкиот совет на Управниот суд ги разгледал и донел одлуки за сите 28 тужби што политичките партии ги поднеле против решенијата на Државната изборна комисија по приговорите за првиот круг од локалните избори, одржани на 15 октомври.

На интернет-страницата на судот се објавени одлуките за 16 тужби кои, како што се наведува, се одбиени како неосновани. Четиринаесет од објавените одлуки се однесуваат на тужби поднесени од ВМРО-ДПМНЕ, а другите две се поднесени од ТМРО и од Левица.

Судечки совет составен од пет судии, избрани по пат на жрепка, одлучува по поднесените тужби, а нивната одлука е конечна.

Останува да бидат објавени уште 12 одлуки, односно 10 за тужби поднесени од ВМРО-ДПМНЕ, една за тужба од ТМРО и една од Алијанса за Албанците.

Од Управниот суд соопштуваат дека одлуките за поднесени тужби од партиите ќе се објавуваат постепено, преку АКМИС на веб-страницата на судот.

На 29 октомври во 35 општини во Македонија ќе се одржи втор круг од локалните избори.


Поднесени 27 жалби до Управниот суд за одбиените приговори од ДИК


Скопје, 22 октомври, 2017 - 10:18 (META) 

Вкупно 27 жалби се поднесени до Управниот суд од партиите ноќеска против решенијата на Државната изборна комисија (ДИК) за приговорите за првиот круг од локалните избори, што се одржа на 15 октомври, соопшти судот.

Инаку, рокот за за поднесување жалби за одбиените приговори од ДИК истекува денеска во 11 часот.

Најмногу тужби поднела ВМРО-ДПМНЕ, вкупно 24, две жалби се од ТМРО и една од Левица.

Управниот суд има рок од 48 часа во кој треба да донесе одлука по жалбите.

По тужбите ќе одлучуваат пет судечки совети, составени од петмина судии од Управниот суд, избрани со жрепка. Тужбите електронски им се распоредуваат на судиите, а одлучувањето ќе биде на јавни седници.

Управниот суд вчера ја отфрлил тужбата од Ѓорѓи Шарковски против „државната администрација во Кривогаштани“ поради оневозможување на собирање потписи за градоначалник и за членови на совет во Општина Кривогаштани.

Во меѓувреме тече кампањата за вториот круг од локалните изборите. Ноќеска на полноќ заврши рокот за поднесување барања за гласање на болни и изнемоштени лица.

Вториот круг од локалните избори ќе се одржи на 29 октомври.


ВМРО-ДПМНЕ со 43 приговори до ДИК, Левица, Алијанса за Албаниците и ТМРО по еден


Скопје, 18 октомври, 2017 - 12:38 (META) 

До Државната изборна комисија пристигнале вкупно 46 приговори за постапката за гласање, сумирање и за утврдување на резултатите од локалните избори, кои се одржаа во неделата, на 15 октомври.
Најмногу приговори – 43 поднела опозициската ВМРО-ДПМНЕ, а по еден приговор поднеле ТМРО, Алијансата за Албанците и Левица.

Рокот за поднесување приговори за постапката за гласање истече вчера во 19 часот, а рокот за постапката за сумирање и за утврдување на резултатите од гласовите истече синоќа во 2 часот по полноќ.

Денеска се очекува претседателот на комисијата, Александар Чичаковски, да свика седница на која ќе бидат разгледани приговорите за изборите.

ДИК е должна да реши по приговорите на кандидатите за постапката за гласање, сумирање и за утврдување на резултати од гласањето, во рок од 48 часа по приемот.

Против одлуката на ДИК, може да се поднесе тужба до Управниот суд, во рок од 24 часа од приемот на решението. Управниот суд на Република Македонија, пак, по жалбата е должен да донесе одлука во рок од 48 часа по нејзиниот прием.

Вториот круг на локалните избори ќе се одржи на 29 октомври.

Во првиот круг од изборите, СДСМ освои 38 градоначалнички места, три места освои ВМРО-ДПМНЕ, двајца градоначалници се од редовите на ДУИ, двајца се независни, а еден градоначалник во следните четири години ќе биде од Демократската партија на Турците во Македонија.


ВМРО-ДПМНЕ засега има најскапа, а Левица најскромна изборна кампања


Скопје, 7 октомври, 2017 - 16:10 (META) 

Опозициската ВМРО-ДПМНЕ потрошила најмногу пари во првите 10 дена од кампањата за локалните избори, покажа финансискиот извештај на Државната изборна комисија.

Поранешната владејачка партија од членарина собрала околу 488.000 евра, додека од 207 донатори добила околу 47.000 евра. На листата на донатори се и кандидатите за градоначалници Иван Франгов. Коце Трајановски, Јохан Тарчуловски и Владо Мисајловски, кои донирале по 1.000 евра, додека Ивица Коневски за партијата дал 500 евра.

ВМРО-ДПМНЕ најмногу средства за рекламирање ќе потроши на ТВ „Сител“, каде досега дала 68.000 евра, а нешто помалку средства се планираат за „Канал 5“, „Телма“, „Телевизија 24“ и за „Алсат-М“. За реклама на „Фејсбук“, партијата одвоила 3.700 евра.

Владејачкиот СДСМ од членарина собрал околу 211.000 евра, додека од 76 донатори добил 36.000 евра. Партијата во првите 10 дена од кампањата се рекламирала само на „Алсат-М“ за околу 12.500 евра. Владејачката партија пријавила расходи за транспорт, изнајмување простор и за рекламен материјал.

Левица води скромна кампања со само 2.000 евра од донации.

ДУИ до ДИК ги пријавила само приходите од членарина, кои изнесуваат 6.500 евра, додека Беса во својот извештај навела дека шест лица донирале вкупно 5.800 евра, а од членарина собрале 13.300 евра. Алијанса за Албанците од донации собрала 19.200 евра.

Финансиските извештаи се однесуваат на периодот од отворањето на трансакциската сметка до крајот на десеттиот ден од изборната кампања.


МВР: Дисциплинска постапка за полицајците што ги приведоа членовите на Левица


Скопје, 1 август, 2017 - 16:33 (META) 

Одделот за внатрешна контрола на МВР утврдил дека четворица полициски службеници неосновано употребиле физичка сила врз членови на Левица, кои во саботата протестираа на плоштадот во Скопје додека се одржуваше презентација на воената опрема на САД и на АРМ.

– Утврдено е дека од страна на четворица полициски службеници врз четири лица неосновано била употребена физичка сила, а над тројца од нив без основа е употребено средство за присилба – врзување со лисици. Против полициските службеници што ги пречекориле службените овластувања и постапиле спротивно на член 83 и 85 од Законот за полиција, ќе бидат преземени дисциплински мерки во согласност со Колективниот договор на МВР и ќе биде известено надлежното јавно обвинителство во Скопје – изјави портпаролот на МВР, Тони Ангеловски.

Демонстрантите кога биле легитимирани од полицијата носеле транспарент на кој пишувало „Против војната за профити“.


Хелсиншки комитет бара одговорност за приведувањето на активистите


Скопје, 31 јули, 2017 - 18:37 (META) 

Хелсиншкиот комитет за човекови права денеска се огласи со осуда за задржувањето на четворицата граѓански активисти од страна на припадниците на полицијата за време на одржувањето на презентацијата на воена опрема на војската на САД и на АРМ во саботата, на 29 јули 2017 година, во центарот на Скопје. Од организацијата велат дека побарале одговорност за сторителите на присилното приведување.

„Хелсиншкиот комитет за човекови права поведе постапка за утврдување на околностите во случајот, при што препорача преземање на конкретни мерки од Одделот за внатрешна контрола, криминалистички истраги и за професионални стандарди за утврдување на одговорност на инволвираните полициски службеници, кои според мислењето на Хелсиншкиот комитет, без основа примениле средства за присилба. Дописот беше доставен и до министерот за внатрешни работи, Оливер Спасовски, како и до директорот на Бирото за јавна безбедност и до Одделот за внатрешна контрола, криминалистички истраги и за професионални стандарди“, се вели во соопштението.

Хелсиншкиот комитет изразува незадоволство „од продолжувањето на режимски практики на постапување од страна на полицијата во Република Македонија и по промената на власта, на начин кој е во целосна спротивност со вредностите и принципите што таа треба да ги застапува“.