!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Двајца загинати и 55 повредени во експлозија во ресторан во Кина


Пекинг, 21 јули, 2017 - 11:17 (META) 

Најмалку две лица загинаа, а 55 се повредени во експлозија во ресторан во прометна улица во кинескиот град Хангџоу.

Според наводите на градската канцеларија за информации, повредените се хоспитализирани, а од нив 12 лица биле со тешки повреди.

По експлозијата избил пожар во една од соседните продавници, кој набргу бил изгаснат.

Истрагата за инцидентот е во тек, а властите се сомневаат дека до експлозијата дошло поради протекување на гас.

Во Кина често се случуваат експлозии поради непочитување на безбедносните правила.


Почина кинескиот нобеловец и дисидент Лју Сјаобо


Пекинг, 13 јули, 2017 - 20:26 (META) 

Кинескиот добитник на Нобеловата награда за мир и дисидент, Лју Сјаобо, почина на 61-годишна возраст, соопштија денеска властите во кинеската провинција Лиаонинг, каде Сјаобо беше хоспитализиран поради рак на црниот дроб.

Како што пренесуваат светските агенции, кинеската правосудна канцеларија соопштила дека нобеловецот починал три дена откако бил префрлен на интензивна нега поради откажување на повеќе органи.

Сјаобо кон крајот на мај оваа година беше префрлен од затвор во болница, откако му беше дијагностициран рак на црниот дроб во терминална фаза.

Кинеските власти, како што наведуваат странските агенции, ги одбиле бројните повици на групите за човекови права и на странски влади, да овозможат негово лекување во странство, наведувајќи дека Сјаобо го лечат најдобрите кинески лекари.

Лју Сјаобо, кој беше најпознатиот политички затвореник во Кина, беше уапсен во 2009 година поради наводна вмешаност во активности за уривање на кинеската влада. Тој беше осуден на затворска казна од 11 години.

Нобеловиот комитет на 8 октомври 2010 година го објави неговото име како добитник на Нобеловата награда за мир за 2010 година, со образложение дека наградата му се доделува за „долгата и ненасилна борба за основните човекови права во Кина“.


Кинескиот нобеловец и дисидент Лју Сјаобо ослободен од затвор


Пекинг, 26 јуни, 2017 - 12:33 (META) 

Кинескиот добитник на Нобеловата награда за мир и дисидент Лју Сјаобо е ослободен од затвор, откако на 23 мај му бил дијагностициран рак на црниот дроб во терминална фаза, соопштил неговиот адвокат Мо Шаопинг, јавуваат светските агенции.

Сјаобо се наоѓа на лечење во градот Шенгјанг, на североистокот на Кина и се наоѓа во стабилна состојба, соопштил адвокатот.

Лју Сјаобо, кој е најпознатиот политички затвореник во Кина, познат по своите заложби за заштита на човековите права и на демократија, беше уапсен во 2009 година поради наводна вмешаност во активности за уривање на кинеската влада. Тој е осуден на затворска казна од 11 години.

Нобеловиот комитет на 8 октомври 2010 година го објави неговото име како добитник на Нобеловата награда за мир за 2010 година, со образложение дека наградата му се доделува за „долгата и ненасилна борба за основните човекови права во Кина“.


Свлечиште во Кина зтрупа 40 куќи, 141 лице се водат за исчезнати


Пекинг, 24 јуни, 2017 - 12:18 (META) 

Најмалку 141 лице се водат како исчезнати откако поројни дождови предизвикаа лизгање на земјиштето во Југозападна Кина, објавија локалните власти.

Свлечиште утрово затрупа околу 40 куќи во селото Синмо, во провинцијата Сечуан. Два километри од течението на река се блокирани, наведува агенција „Ксинхуа“. Во тек е спасувачка операција.


ОН: До 2050 година на Земјата ќе има повеќе од 9 милијарди жители


Њујорк, 22 јуни, 2017 - 11:59 (META) 

Индија за седум години ќе ја надмине Кина по бројот на жители, а се очекува Нигерија пред 2050 година да стане трета најнаселена земја во светот и да ги претекне САД, се наведува во извештајот на Обединетите нации.

Според извештајот на Економскиот и социјалниот комитет на ОН, светската популација од сегашните речиси 7,6 милијарди луѓе ќе достигне 8,6 милијарди до 2030 година, 9,8 милијари до 2050 г. и на 11,2 милијарди до 2100 година.

Бројот на жители на Земјата секоја година се зголемува за 83 милиони луѓе. Ваквиот тренд, според ОН, ќе продолжи и покрај фактот што од 1960-тите фертилитетот континуирано се намалува.

Директорот на секторот за популација, Џон Вилмонт, изјавил дека вклучува иноформации за популацијата на 233 земји во светот. Вилмонт вели дека бројот на жители во Африка брзо се зголемува, додавајќи оти се очекува до 2050 година половина од светската популација да живее во овој дел од светот.

Според него, може да се очекува намалување на бројот на жители во Европа. Половина од светската популација до 2050 година ќе биде сконцентрирана во само девет земји – Индија, Нигерија, Конго, Пакистан, Етиопија, Танзанија, САД, Уганда и Индонезија.


Експлозија во градинка во Кина – седум загинати и 59 повредени


Пекинг, 15 јуни, 2017 - 15:01 (META) 

Седум лица загинаа во експлозија во градинка во Фенгксиан во источната кинеска провинција Џиангсу, јавуваат кинеските медиуми.

Полицијата сè уште нема официјално потврдено колку лице загинаа, но кинеските медиуми јавуваат дека освен седумте загинати, во експлозијата има и 59 повредени лица.

Кинеската држвна телевизија „Си-си-ти-ви“ јави дека две лица загинале при самата експлозија, додека другите починале во болница.

Агенцијата „Ксинхуа“ јави дека експлозијата се случила во време кога родителите доаѓаат да си ги земат децата од градинка. Засега не се знае што ја предизвикало експлозијата.


Кинески авион безбедно слета по проблеми со моторот


Сиднеј, 12 јуни, 2017 - 13:25 (META) 

Патнички авион на кинеската компанија „Чајна истерн“, кој летал за Шангај, безбедно се врати во Сиднеј поради проблеми во текот на летот, предизвикани од отворена дупка во куќиштето на моторот.

Кинеската компанија соопшти дека екипажот на летот 736, по полетувањето забележал оштетување на приклучокот за воздух на левиот мотор, поради што капетанот одлучил да се врати.

Компанијата наведува дека авионот безбедно слетал и дека патниците се згрижени.


Осуммина загинати во експлозија во хемиска фабрика во Кина


Пекинг, 5 јуни, 2017 - 15:58 (META) 

Осум лица загинаа, а девет се повредени при експлозија и пожар што се случија во фабрика за хемикалии во источната кинеска провинција Шандонг.

Несреќата била предизвикана од експлозија на танкер со течен гас на терминал за полнење во фабриката.

Експлозијата запалила неколку цистерни со гориво во економската зона Линји. Околното подрачје е евакуирано.

Сопственикот на фабриката е повреден и веднаш пренесен во локалната болница.

Пожарот го локализираат повеќе од 900 пожарникари.


Северна Кореја е непосредна воена закана, смета министерот за одбрана на САД


Сингапур, 3 јуни, 2017 - 12:01 (META) 

Северна Кореја забрзано развива ракета со нуклеарна боева глава која може да претставува закана за Соединетите Американски Држави и за други земји, изјави денеска американскиот министер за одбрана, Џејмс Матис, говорејќи на меѓународна конференција во Сингапур.

Министерот за одбрана на САД ја нарекол Северна Кореја „непосредна воена закана“, јавуваат светските агенции. Матис истакнал дека администрацијата на американскиот претседател Доналд Трамп е охрабрена од тоа што Кина повторно покажала посветеност на соработката со САД и со другите земји што би влијаело на тоа Пјонгјанг да ја напушти програмата за нуклеарно оружје.

Советот за безбедност на Обединетите нации (ОН) вчера усвои резолуција со која се воведуваат санкции против четири институции и 14 севернокорејски функционери, вклучувајќи го и функционерот за кого се верува дека е на чело на разузнавачките служби на земјата.

Текстот на документот што го предложија САД е усвоен едногласно, а резолуцијата ја поддржа и Кина.


ЕУ и Кина ќе го бранат Парискиот договор за климата


Брисел, 1 јуни, 2017 - 12:16 (META) 

ЕУ и Кина се подготвени на дводневниот самит во Брисел, кој почнува денеска, да го бранат Парискиот светски договор за климата и целосно да го поддржат и покрај најавената одлука на американскиот претседател, Доналд Трамп, да се откаже од спогодбата.

За време на поранешниот претседател на САД, Барак Обама, Вашингтон и Пекинг имаа исти ставови и беа главни столбови на договорот, кој беше постигнат во декември 2015 година. Со договорот, 196 земји, под покровителство на Обединетите нации, се обврзаа да го ограничат загадувањето на воздухот за да се намали климатското затоплување.

Трамп најави дека денеска, во 21 часот по централноевропско време, ќе ја објави одлуката за спогодбата. Американските медиуми јавуваат дека Трамп, најверојатно, ќе соопшти дека САД се повлекуваат од Парискиот договор. Кина и ЕУ утре, по самитот во Брисел, ќе објават заедничка декларација во која ќе ги „потврдат своите обврски преземени со историскиот договор од Париз и ќе ја забрзаат соработката со што ќе се подобри неговото спроведување“.

Повлекувањето на САД, кои се еден од најголемите светски загадувачи, би бил тежок удар против климатските промени и тоа само година по потпишувањето на спогодбата, која се смета за историска.

Брисел и Пекинг сметаат дека е „неповратен“ патот за намалување на емисијата на штетни гасови кои предизвикуваат климатски промени.

Претседателот на Европската комисија, Жан-Клод Јункер, вчера во Берлин предупреди дека Париската спогодба е меѓународен договор со правни обврски и дека за тоа ќе бидат потребни повеќе години ако САД сакаат да се откажат од него.

Претставниците на ЕУ наведуваат дека Европската Унија и Кина го задржале местото на лидери во светот во борбата за зачувување на климата и дека ќе го поддржат и ќе го одбранат Парискиот договор.

Пекинг и Брисел веќе една година работат на усогласување на заедничка декларација за климатските промени и за чиста енергија.