Неопходно е внимание во научната соработка со Кина, изјави германската министерка за образование и истражувања Бетина Штарк-Вацингер, пренесува германската новинска агенција ДПА.
„Позади секој кинески истражувач може да се крие Комунистичката партија, тоа треба да ни биде јасно“, изјави министерката за весникот „Велт“.
Таа инсистира дека треба да се проверат сите облици на соработка, вклучувајќи ја и онаа помеѓу универзитетите, а посебно стипендистите на кинескиот државен совет (China Scholarship Council).
Кина, изјави Штарк-Вацингер, сè повеќе постанува системски ривал.
„Во глобалните предизвици како што се климатските промени и понатаму треба да се соработува. И економската соработка со Кина во основа е пожелна“, изјави таа.
Меѓутоа, поинаква е ситуацијата во оние области кои имаат воено значење или се однесуваат на човековите права, на пример, препознавањето на лица со помош на вештачката интелигенција.
„Со научниците почнавме разговори за безбедноста на истражувањата“, изјави Штарк-Вацингер. Универзитетите и истражувачките установи, рече таа, побарале поддршка.
