Полицијата во Дизелдорф и Бад Хомбург уапси тројца германски државјани за шпионирање за кинеската тајна служба. Двајца мажи и една жена се во притвор, објави во понеделникот федералното обвинителство, пренесе германската новинска агенција ДПА.
Тие наводно ѝ предавале на Кина информации за технологијата што може да се користи за воени цели најдоцна од јуни 2022 година.
Двајца од осомничените се брачна двојка со компанија во Дизелдорф, а обвинителството другиот маж го опишува како соработник на агент на кинеското Министерство за државна безбедност.
Според обвинителството, тој „користел“ брачна двојка со компанијата како „посредник за контакти и соработка“ со луѓе од германските научни и истражувачки центри.
Компанијата потпишала договор за соработка со германски универзитет, кој подготвувал студија за кинески клиент за делови за моќни поморски мотори, какви што користат и воени бродови.
Во моментот на нивното апсење, обвинетите преговарале за истражувачки проекти кои би можеле особено да имаат корист за зајакнувањето на кинеската морнарица, се вели во соопштението.
