!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ДИК: Излезноста до 17 часот e 43,83 отсто, гласањето се одвива непрекинато


Скопје, 29 октомври, 2017 - 18:19 (META) 

Според 99,21 отсто од обработените податоци, излезноста на гласачите до 17 часот на ниво на Македонија е 43,83 отсто, соопшти портпаролката на Државната изборна комисија, Љупка Гугучевска.

Таа информираше дека гласањето течело непрекинато освен на две избирачки места, во општините Бутел и Шуто Оризари, каде што имало прекини поради неисправност на УВ-ламбите. Прекинувањето на гласањето не било подолго од половина час и таму гласањето ќе заврши во 19 часот.

До ДИК биле доставени четири приговори од граѓани кои не биле запишани во избирачкиот список, но Комисијата ги одбила зашто граѓаните личните документи ги извадиле по завршувањето на јавниот увид.


„Мост“ регистрирала нефункционирање на УВ-ламбата на неколку избирачки места


Скопје, 29 октомври, 2017 - 17:44 (META) 

Семејно гласање во општина Шуто Оризари, нефункционирање на УВ-ламбата на неколку избирачки места, како и фотографирање на избирачките ливчиња, забележале набљудувачите на граѓанската асицијација „Мост“ до 17 часот.

Во општина Шуто Оризари имало три случаи во кои членовите на избирачките одбори им помагале на лица да гласаат и им укажувале за кого да гласаат.

„На гласачкото место 0440, село Неготино, општина Врапчиште, УВ-ламбата не функционира од 13 часот. Општинската изборна комисија не била известена за ова, а гласањето не било прекинато. На гласачкото место 2960, во општина Шуто Оризари, гласањето било прекинато во период од половина час поради тоа што УВ-ламбата не функционирала. Направен бил записник, а гласањето продолжило. Прекин на гласањето имало и на гласачкото место 2949 во општина Бутел поради нефункционирање на УВ-ламбата“, велат од „Мост“.

На гласачкото место 2928, во општина Чаир, гласач го фотографирал глсачкото ливче, повикана била полиција и гласањето било на кратко прекинато. Избирачкиот одбор направил записник за случајот.


„Цивил“: Регистрирано е семејно гласање, кршење на молкот и закани по набљудувачите


Скопје, 29 октомври, 2017 - 15:59 (META) 

Невладината организација „Цивил“ нотирала три случаи на притисок врз нивните надзорни тимови и тоа во општините Штип, Кавадарци и Сарај, информираат од таму.

Поради, како што велат, крајно сериозните закани, „Цивил“ ги повлече набљудувачите од село Ласкарци, општина Сарај. Заканите дошле од член на избирачкиот одбор, кој било револтиран од присуството на набљудувачите на „Цивил“, односно од извештаите на „Цивил“ од првиот круг на изборите.

– Не веруваме дека во Ласкарци ќе се одржат слободни избори. Ги повикуваме институциите, особено ДИК, да ја провери кондицијата на лицата ангажирани во своите тела. Препорачуваме МВР да ја засили својата контрола во овој дел од општина Сарај и да помогне изборниот процес да се одвива непречено – изјави Џабир Дерала од „Цивил“.

Набљудувачките тимови на „Цивил“ регистрирале 29 нерегуларности како фотографирање  гласачки ливчиња, семејно и групно гласање и кршење на изборен молк.

– Изборниот молк се крши како воопшто да не постои забрана за партиска активност во текот на изборниот ден. Семејно гласање е често и вообичаено во Студеничани и во Шуто Оризари, без реакција од избирачките одбори – додаде Дерала.

Од „Цивил“ апелираат до политичките партии веднаш да престанат со притисоците врз граѓаните и да престанат со кршењето на изборниот молк.


Излезноста на гласачите до 13 часот изнесува 24,38 отсто, информира ДИК


Скопје, 29 октомври, 2017 - 14:42 (META) 

Излезноста на гласачите до 13 часот на сите 1.517 избирачки места изнесува 24,38 отсто, информираше Државната изборна комисија.

Портпаролката на ДИК, Љупка Гугучевска, рече дека највиоска е излезноста во Демир Капија – 48,91 отсто, а најмала во Јегуновце – 12,77 проценти.

Таа информираше дека до ДИК не се доставени официјални известувања во врска со нерегуларности за кои известија одредени набљудувачи.

– ДИК ќе се обрати до наведените избирачки одбори и уште еднаш ќе ги провери наводите изнесени во јавноста. До ДИК до 14 часот не е поднесен ниту еден приговор за заштита на избирачко право од страна на граѓаните – изјави Гугучевска.


Едмонд Темелко доби уште 30 дена притвор


Скопје, 27 октомври, 2017 - 17:34 (META) 

Основниот Суд Скопје 1 го продолжи притворот за уште 30 дена на градоначалникот на Пустец, Едмонд Темелко, кој беше уапсен кон крајот на минатиот месец.

Темелко, обвинет за изборни малверзации во случајот „Титаник“ на СЈО, и понатаму  ќе остане во Истражниот затвор „Скопје“.

Тој е во притвор од 26 септември, а во „Титаник“, освен него, обвинети се и Никола Груевски, Гордана Јанкулоска и Миле Јанакиески.


„Цивил“: Нема потврда за наводите на ВМРО-ДПМНЕ за поткуп на гласачи


Скопје, 27 октомври, 2017 - 13:11 (META) 

Набљудувачите на „Цивил“ не откриле ниту еден случај што би ги потврдил како основани наводите на ВМРО-ДПМНЕ за поткуп на гласачи, изнесени пред првиот круг од локалните избори, што се одржа на 15 октомври.

Како што пишува „Цивил медиа“, ваквите наводи на ВМРО-ДПМНЕ, со навестувања за поткуп на гласачи, биле дел од документ што лидерот на партијата, Никола Груевски, им го доставил на претставници на меѓународната заедница, во деновите пред првиот круг од локалните избори.

„Цивил“, поради тоа, го доставил документот и до своите набљудувачи, од кои било побарано да посветат особено внимание на овие наводи и да побараат потврда за каков било случај што би можел да ја потврди вистинитоста на овој документ.

„Заклучокот од оваа активност на набљудувачите е дека тие не открија ниедна потврда за наводите на ВМРО-ДПМНЕ за поткуп на гласачите“, пишува „Цивил медиа“.

Според документот на ВМРО-ДПМНЕ, станувало збор за поткуп на гласачи во повеќе градови во земјава, а во него биле наведени и лица кои, наводно, ги вршеле незаконските активности.

Многу од наведените случаи на поткуп на гласачи во документот на ВМРО-ДПМНЕ, според извештаите на набљудувачите на „Цивил“, се неосновани бидејќи дел од споменатите лица не постојат, а за другите се утврдило дека се далеку од тоа да ги извршат изборните нерегуларности за кои се говори во документот.

Според извештаите на „Цивил“ од локалните избори на 15 октомври, а во пресрет на вториот круг на 29 октомври, регистрирани се четири обиди за поткуп на гласачи. Ниеден од тие случаи не е во релација со локациите или лицата наведени во документот на ВМРО-ДПМНЕ.


Влада: Граѓаните извојуваа уште една победа за демократијата


Скопје, 16 октомври, 2017 - 11:28 (META) 

„Граѓаните на Република Македонија извојуваа уште една победа за демократијата. Слободно, врз основа на слободното политичко убедување и на сопствената волја, излегоа на гласање на локалните избори и го остварија своето уставно загарантирано право“, порача Владата на Република Македонија во освртот за изборите, на кои СДСМ и ДУИ, кои се главниот дел на владината коалиција, остварија убедлива победа.

Владата оценува дека сите институции одговорни за изборите ги исполниле своите обврски.

„Во исто време, сите институции одговорни за спроведување регуларни избори, беа на висината на нивните професионални задолженија и обврски и ги реализираа сите неопходни активности за спроведување на изборите“, се вели во владиното соопштение.


ДИК: Излезноста до 13 часот е 27,11 отсто


Скопје, 15 октомври, 2017 - 14:14 (META) 

Државната изборна комисија на втората прес-конференција информираше дека на локалните избори излезноста до 13 часот е 27,11 отсто на ниво на цела Македонија.

Излезноста на ниво на Град Скопје е 29,17 отсто.

Во Аеродром излегле да гласаат 35,6 отсто од гласачите, во Битола – 28,85 отсто, во Бутел – 28,44 проценти, во Велес одзивот е 30,72 отсто, во Гази Баба – 29,34 отсто, во Карпош излегле 34,64 отсто од гласачите, во Кисела Вода – 32,45 отсто, во Куманово – 23,07 отсто, во Охрид – 28,08 проценти, во Струмица излезноста е 26,74 отсто, во Тетово – 18,76 отсто, во скопски Центар – 33,53 отсто, во Чаир – 21,88 проценти, а во Штип до 13 часот излегле да гласаат 36,83 отсто од запишаните гласачи.

На прашањето дали се регистрирани неправилности во текот на изборниот процес, портпаролката на Државната изборна комисија, Љупка Гугучевска, изјави дека ДИК во моментов е во постојано заседание, односно има седница на која сите предизвици кои се појавуваат во текот на гласањето се решаваат.

– Сите неправилности се отстранети и гласањето тече без прекин – рече Гугучевска.


ДИК: Излезноста на гласачите до 10 часот е 8,98 проценти


Скопје, 15 октомври, 2017 - 11:46 (META) 

Државната изборна комисија соопшти дека излезноста на гласачите до 10 часот на територијата на Република Македонија изнесува 8,98 проценти.

На 3.480 избирачки места гласањето е без поголеми неправилности, а портпаролката на Државната изборна комисија, Љупка Гугучевска, информираше дека на некои места имало доцнење од најмногу 30 минути поради отстранување пропаганден материјал.

Според заклучениот избирачки список на Државната изборна комисија, право на глас на локалните избори имаат 1.814.644 гласачи во Македонија.


Хелсиншки комитет ќе има дежурна служба за пријавување нерегуларности


Скопје, 13 октомври, 2017 - 14:00 (META) 

Хелсиншкиот комитет за човекови права на Република Македонија извести дека в недела, 15 октомври, канцеларијата на Комитетот ќе биде отворена во текот на целиот ден за да им овозможи на граѓаните да пријават повреда на избирачкото право за време на локалните избори.

Сите што сметаат дека нивното избирачко право е повредено, може да го пријават случајот во канцеларијата на Комитетот на улицата Наум Наумовски Борче, бр. 83, во Скопје или на телефонскиот број 02/3119-073. Пријава може да се поднесе и преку електронско писмо на адресата helkom@mhc.org.mk, а во него треба да се напише кратко образложение за настанатата повреда, локација (изборна единица и број на гласачко место) и време на инцидентот.

Граѓаните може да поднесуваат пријави идентификувајќи се или анонимно, но Хелсиншки ќе врши дополнителни истраги за секој случај поединечно.

„Сите пријави до Комитетот ќе бидат дополнително истражени за да се верификува нивната веродостојност. Тајноста и неповредливоста на личните податоци се загарантирани од страна на Хелсиншкиот комитет и тие нема да бидат објавени без претходна дозвола од граѓаните што ја пријавиле повредата“, соопшти Комитетот.