Холандскиот министер за надворешни работи, чија земја претседава со ЕУ, Берт Кундерс, упати писмо до лидерите на политичките партии потписници на Договорот од Пржино, во кое се изразува сериозна загриженост за состојбата во Македонија и се бара итно наоѓање решение од политичката криза преку целосно спроведување на договореното.
„Како претседавач со Советот на Европската Унија и долгорочен поддржувач на вашата земја, Ви пишувам Вам и на другите потписници на Договорот од Пржино за да ја изразам мојата сериозна загриженост поради политичката ситуација. Меѓународната заедница останува цврсто посветена на тоа да им помага на партиите кои се инволвирани. Но, целосната и безусловна имплементација на Договорот, кој заедно го потпишавте, и итните реформски приоритети се фундаментални за евроатланската иднина на вашата земја. Не постојат алтернативи и скратени патишта во врска со тоа. Затоа од витално значење за стабилноста на вашата земја и за просперитетот на вашите граѓани и на Вашите колеги, политичките лидери, да најдете излез од тековната криза“, вели шефот на холандската дипломатија.
Во писмото се наведува дека целосно ја поддржува изјавата на еврокомесарот Јоханес Хан дека прекршувањето на Договорот од Пржино ќе има сериозни последици, но и за евроинтеграциските процеси на Македонија.
Холандскиот министер вели дека политичките лидери се одговорни за справувањето со сегашната криза и додава дека постојат два елемента кои мора веднаш да бидат адресирани.
„Прво, минималните услови за веродостојни избори, кои во јануари-февруари ги утврдија ЕУ и САД, не се исполнети: 1. прочистување на избирачкиот список; 2. реформи во медиумите кои ќе обезбедат балансираност; 3. одвојување на партијата од државата и ставање крај на заплашувањето на гласачите. Слободните, фер и инклузивни избори се круцијални за Договорот од Пржино и се неопходни за демократската иднина на земјата. Овие критериуми мора да се исполнат, без понатамошно одложување.
Второ, мора веднаш да се повлече одлуката на претседателот за аболиција за да му се овозможи на Специјалното јавно обвинителство без пречки да си ја врши работата“, стои во писмото на Кундерс.
Во него се повикуваат „сите страни да работат на отповикување на одлуката за аболиција бидејќи гонењето на наводни престапи и на криминал е основен принцип на отчетноста и на владеењето на правото“.
