Светска банка јасно и недвосмислено посочи дека забавувањето на економскиот пораст, странските инвестиции, а со тоа и зголемувањето на буџетскиот дефицит за да се задржи порастот, се директна последица на политичката криза, која во Македонија ја создадоа аболираниот криминалец Зоран Заев и СДСМ, се вели во соопштението на ВМРО-ДПМНЕ, како реакција на соопштението на дополнителниот-заменик министер за финансии, Кире Наумов.

Според партијата на власт, „срамно и лицемерно е пулените на Заев да ги користат за дневно-политичка пропаганда последиците од политичкото заложништво во кое СДСМ ја држи Македонија долго време.“

– Наумов и СДСМ добро знаат дека половина од државниот долг е направен во време на СДСМ, со таа разлика што тие немаат ниту еден единствен проект со кој може да го оправдаат овој долг. Дополнително, ден-денес има околу 40 активни кредити од времето на СДСМ, кои земјава сè уште ги отплаќа, пари кои испарија во воздух, односно во џебовите на функционерите на СДСМ – се вели во реакцијата на ВМРО-ДПМНЕ.

Во соопштението, исто така, се додава дека Македонија е меѓу најниско задолжените земји во Европа и дека нејзинот долг е речиси двојно помал од европскиот просек.