Годинава која изминува во медиумите и на социјалните мрежи се пласираа неколку теории на заговор. Дел од нив стари и познати, овојпат се поврзуваа со пандемијата на коронавирусот, сугерирајќи дека таа е лажна и планска со цел воспоставување на некаков нов светски поредок во кој ќе се контролираат луѓето преку чипови од вакцините. Во тој дух на социјалните мрежи со огромна брзина се рашири конспиративната теорија, според која Бил Гејтс има за цел да го збрише населението ширум светот со помош на вакцинацијата против ковид-19, пишува „Вистиномер“ во својата анализа.
Текстот подолу го пренесуваме во целост:
Кои беа најзастапените заговорнички теории кај нас?
Кемтрејлс
Таканареченото „запрашување“ на населението или „кемтрејлс“ е теорија на заговор која е постара од две децении. Всушност, почетоците се во САД во 1996 година, откако воено-воздушните сили на САД објавиле извештај за можна модификација на времето. Застапниците на оваа теорија на заговор веруваат во повеќе цели на „запрашувањето“. Од психолошко влијание врз населението, до тоа дека крајната цел е депопулација на земјината топка. Покрај ваквите теории на заговор често се објавуват фотографии кои се земени од различни тестови на патнички авиони изведувани за да се утврди балансот на авионите при полетување, слетување или во текот на летот. Оваа теорија на заговор изминатата година повторно се актуелизираше во контекст на пандемијата со коронавирусот. Оние кои ја пласираа, ја убедуваа јавноста дека со авиони се запрашува од небо и луѓето се трујат преку воздухот, а потоа ги лажат дека станувало збор за коронавирусот!
Белите траги кои авионите ги оставаат на небото се всушност „контрејлс“ и има научно објаснување зошто некогаш тие траги се подолготрајни, а некогаш брзо исчезнуваат од хоризонтот.
Во врска со оваа тема „Форбс“ објави студија, според која панел од 76 хемичари и научници од Универзитетот Ирвин, Калифорнија, изјавиле дека никогаш не дошле до докази оти постојат големи програми за хемиско прскање од авиони, со цел да се наштети на здравјето на граѓаните и со цел да се влијае на атмосферата.
Според ова истражување, причината поради која трагите од авионите остануваат видливи е зашто тие летаат на поголеми височини отколку порано, што резултира со кондензациски траги, кои траат подолго време. Тоа што трагите од авионите се вкрстуваат е само и единствено доказ дека има зголемена фреквентност на авиосообраќајот, односно дека има многу повеќе авиони, кои учествуваат во авиосообраќајот, што е и примарната причина некои од нив да мораат да летаат и на поголеми височини.
Чипови во вакцините
Една од најраспространетите теории на заговор годинава беше и таа дека со вакцините против ковид-19 се вградува чип во човечкото тело преку кој „сатанистите“ ќе управуваат со луѓето. Нема ниту еден научен факт кој ја поткрепува оваа теорија.
Вакцините не содржат микрочипови. Целата драма со наводни микрочипови, преку кои, наводно, населението ќе биде следено, нема врска со реалноста. Оваа теорија на заговор почна да се шири откако компанијата „АпиЏект“ од САД, почна да рзамислува да воведе „опционален микрочип“ на етикетата од шприцот на вакцините. Овој микрочип е засега наменет само за САД, а неговата намена, како што за Ројтерс потврдил портпаролот на фирмата, Стив Хофман, е да му овозможи на здравствениот работник да верификува дека вакцината и шприцот не се со истечен рок, не се фалсификат и да потврди дека вакцината во шприцот е искористена. Здравствениот работник би користел апликација на мобилниот телефон за да ја види оваа информација или да ја внесе во системот. Сето тоа ќе се прави без никакво навлегување во личните податоци за пациентот. Информациите во оваа апликација ќе се однесуваат само на дозите и на шприцевите односно на вакцината, а не на човекот.
Чипот нема да собира лични податоци ниту податоци за тоа кој ја примил дозата, како што сугерираат теоретичарите на заговор.
Тврдењето дека во вакцините има микрочипови преку кои ќе се следат луѓето е апсурдна. Експертите велат дека не постои никаква можност во содржината на вакцината да се вметне технолошки материјал. Доктор Вилбур Чен, експерт за инфективни болести во Центарот за развој на вакцини и јавно здравје во Универзитетот во Мериленд, за Политифакт изјави:
И најмалата верзија на микрочипови е преголема за да може да помине низ иглата на вакцината. Микрочиповите кои обично се употребуваат за лоцирање на домашните миленичиња се со големина на едно зрно ориз. Ниту една од иглите кои се употребуваат за вакцинација нема толкав дијаметар за да овозможи внесување во телото на еден чип, макар и со големина на зрно ориз.
5 Г
Теоријата на заговор за 5Г мрежата овојпат се поврза со непостоечките микрочипови во вакцините со цел да се шири паника дека се подготвува контрола на населението – каде се движи, што прави, што купува. Се отиде и чекор понатаму дека со наводните чипови луѓето ќе се претворат во робови и на тој начин ќе им се контролираат мислите на оние кои се вакцинирани. Се разбира, ваквите тези не се поткрепени со никакви факти. 5Г технологијата во комуникациите и вакцинацијата во здравството не се поврзани.
Оваа теорија на заговор особено се засили кога телекомуникацискиот оператор „А1 Македонија“ на 5 октомври 2021 година, постави 5Г мрежа во центарот на Скопје за финално тестирање и со тоа, како што соопшти, е чекор поблиску до комерцијално воведување на 5Г- технологијата за сите корисници.
Бил Гејтс ќе го збрише населението
Конспиративната теоријата според која Бил Гејтс има за цел да го збрише населението ширум светот со помош на вакцинацијата против ковид-19, со огромна брзина се рашири на социјалните мрежи.
Како почна се?
Во јуни 2011 година, ирски весник познат по пласирање конспиративни теории „The Sovereign Independent“, објави контроверзен напис за Бил Гејтс. Манипулативниот карактер на написот се гледа уште од самиот наслов: „Депопулација преку присилна вакцинација: решение за нулта емисии на јаглерод!“. Некои корисници на социјалните мрежи дури тврдеа дека написот објавен во овој весник пред многу години е доказ дека пандемијата е „испланирана“. Насловот и написот објавени во ирскиот весник во 2011 година, е лага. Текстот не е доказ за една испланирана пандемија.
Тој се однесува на една добро обработена конспиративна теорија која е заснована на едно многу едноставно недоразбирање. Поврзаноста на зборот „депопулација“ и Бил Гејтс авторот на написот ја наоѓа во неколку изјави на Гејтс, а кои се однесуваат на прашањата околу природниот раст на населението. Зголемувањето на бројот на населението во светот Гејтс го гледа како проблем, и тој е вистински фокусиран во неговите напори за забавување на растот на населението. Но, тој никогаш немал за цел убивање или елиминирање на луѓето. Всушност, Бил Гејтс открива дека растот на населението може да се забави ако луѓето живеат подолго.
Нов светски поредок
На социјалните мрежи се ширеше и уште една теорија на заговор поврзана со претходните, дека по пандемијата на светската сцена ќе настапи „нов светски поредок“ и дека, наводно, е претставена извесна „агенда на Обединетите Нации од 2021 до 2030 година“.
Кои се целите на Агенда 21 на Обединетите Нации, како и целите на Агенда 2030?
Агенда 21 е еден од документите кои произлегоа од конференцијата на ОН за животната средина и развој одржана во Рио Де Жанеиро. Во агендата има 31 ставка која ги адресира глобалните социјални и економски проблеми, зајакнување на улогите на жените, децата и работниците, како и предложени методи за имплементација.
Агендата за развој 2030, пак, е резолуција усвоена од ОН во 2015 година, фокусирана на 17 цели кои треба да се постигнат за 15 години.
Термини како „валута“, „војска“, „семејна единица“ „5 Г“, „приватен транспорт“, „авиопревоз“ и „синтетички дроги“, термини кои ги пласираат теоретичарите на заговор, не се споменати во Агенда 2030. Има референци за еднакви права и достап до земја и други форми на сопственост за сиромашни и ранливи жени и мажи, универзално здравствено покривање кое ќе осигура евтини вакцини за сите. Но, Агендата 2030 не претпоставува глобален суверенитет над овие прашања.
Нема докази дека ОН ќе етаблираат „една светска влада“ со една војска и валута. Даниел Грос, портпаролка на генералниот секретар на ОН, за „Ју Ес Еј Тудеј“ посочи дека тврдењето е фабрикувано.
Авторот на извештај за конспирациски теории поврзани со Агенда 21, Хајди Беирихм за АФП Австралија изјави дека ова е десничарска теорија на заговор.
Освен тоа, Агенда 21 и Агенда 2030 не се правно обврзувачки! Агенда 2030 е предмет на секоја посебна земја и нејзините индивидуални заложби, нејзините индивидуални развојни политики, програми и развој, анализира „Вистиномер“.
