Новите количини на лекот „Трикафта“ се веќе на Универзитетската клиника за детски болести. Лекот, како што беше најавено пред шест дена, ќе го добијат 12 пациенти. Кои ќе бидат тие, ќе одлучува стручна комисија од клиниката која претходно ќе направи медицински прегледи на пациентите.
Денеска министерот за здравство Фатмир Меџити кажа дека за оваа намена, биле потрошени 100 милиони денари, а за идната година, како и за 2025, ќе бидат одвоени 854 милиони денари за лекот.
„Пациентите со цистична фиброза, етапно се вклучуваат на терапија, согласно Протоколот и прецизни критериуми на евалуација, се одлучува за добивањето терапија. Листата на пациенти е направена од страна на стручна комисија, по направени медицински прегледи на сите пациенти со цистична фиброза, според бодирање. Лекот Трикафта е безбеден лек, одобрен од Европската медицинска агенција. Тоа што е многу важно, ефектот од терапијата е брз, значителен и одржлив. Лекот во Европа е стандардна терапија за третман на пациенти со цистична фиброза“, рече Меџити.
Лани, пред Нова година, болните од цистична фиброза беа на протест пред Министерството за здравство и побараа модуларна терапија. Дури на 2 февруари годинава, Владата најави дека ќе го набави лекот „Трикафта“ за 30 пациенти, односно дека набавката ќе се одвива во неколку фази. Првите количини на лекот, стасаа на 9 март. Додека лекот се чекаше, на 8 февруари почина Благојче Илиевски кој боледуваше од цистична фиброза.
Кога тоа се случи, поранешниот министер за здравство Беким Сали, на својот Фејсбук профил напиша дека се обезбедени 140 милиони денари за набавка на лекот. Родители на деца со цистична фиброза и нивни роднини, по смртта на Благојче му оддадоа почит и протестираа пред Владата, барајќи лекот да се набави итно.
Во земјава, со цистична фиброза живеат околу 130 лица. Како што прогресира болеста низ годините, така расте и смртноста. Лек има од новата генерација на т.н. модуларна терапија, која е скапа. Кај нас се дава постара терапија која ги ублажува симптомите, но не ја лекува болеста.
