Најавените законски измени ќе треба да се донесат со консензус меѓу сите политички партии во Собранието, најави денеска министерот за правда Кренар Лога во однос на можноста со законските преодни одредби да се овозможи распуштање на Судскиот совет и престанок на мандатот на сегашните членови на Судскиот совет.
Министерот Лога рече дека ги осудува случувањата во Судскиот совет, додавајќи дека едно од можните решенија, за кои тој разговара со политичките партии, е со законски преодни одредби да има престанок на мандатот на сегашниот состав на ова тело.
„Ако има вакви законски измени, тоа ќе биде со консензус во Собранието со сите политички партии. Затоа, ова е една од опциите коишто може ние да ги имаме како решение“, изјави министерот за правда Лога.
Како одговор на новинарско прашање, министерот за правда Лога информираше дека сè уште не ги добил сите записници од седниците на Судскиот совет, кои тој ги побара по случувањата со разрешувањето на претходната претседателка Весна Дамева. Како што рече, не добиле записник од таа седница, а нема ниту објаснување зошто.
Министерот за правда го коментираше и последното истражување на ОБСЕ кое покажа поразителни резултати за правосудството, при што рече дека е загрижен за бројките и податоците не само од овој туку и од извештаите на сите други институции во државата и меѓународната заедница.
