Дојава за поставена бомба утрово добило Собранието на Црна Гора и неколку училишта низ земјата, јавува црногорскиот весник Побједа. Собраниската зграда е евакуирана, исто како и учениците во школите, информираат од црногорската полиција. Прегледите на сите објекти во моментов се во тек, а дојавите за поставени експлозивни направи биле испратени преку електронска пошта.
Според информациите кои ги објави Побједа, дојави за бомби пристигнале во основни училишта и градинки во Никшиќ, Херцег Нови, Бар, Петровац, Тиват и други градови во Црна Гора. Управите на образовните установи ги повикале родителите да ги земат децата, додека во некои градинки и училишта било одлучено да нема настава и во попладневните часови.
Она што е многу важно е дека новиот наплив на дојави за бомби во Црна Гора доаѓа пред одржувањето на парламентарните избори, кои се закажани за во недела (11 јуни). Изминативе недели лажни дојави за бомби во училиштата повторно имаше и во Србија, а интересен е податокот дека ваквата форма на хибридни закани се случуваше и во Бугарија пред одржувањето на тамошните парламентарни избори во март годинава.
