Лидерите од еврозоната постигнаа договор за финансиска помош на Грција, која пет месеци се обидуваше да најде компромис со доверителите.
Претседателот на Советот на Европа, Доналд Туск, преку „Твитер“ објави дека „едногласно“ е постигнат договор со Грција.
„Сè е подготвено за Европскиот механизам за стабилност да обезбеди финансиска помош за Грција во замена за сериозни реформи“, напиша Туск.
EuroSummit has unanimously reached agreement. All ready to go for ESM programme for #Greece with serious reforms & financial support
— Donald Tusk (@eucopresident) July 13, 2015
Тој истакна дека ќе биде поставен посебен фонд за отплата на грчкиот долг.
„Министрите за финансии итно ќе разговараат како да ѝ помогнат на Грција на краток рок да ги исполни своите финансиски потреби“, напиша Туск.
Finance ministers will as a matter of urgency discuss how to help #Greece meet her financial needs in the short term (bridge financing).
— Donald Tusk (@eucopresident) July 13, 2015
Претседателот на еврогрупата, Јерун Дејслеблум, денеска изјави дека грчките банки бараат 25 милијарди евра за докапитализација.
Францускиот претседател Франсоа Оланд изјави дека договорот ќе ѝ помогне на Грција да остане во еврозоната доколку ги следи правилата што ѝ ги наметна ЕУ.
– Направивме добар чекор за да се изгради доверба, но има уште многу чекори кои треба да се направат за да се имплементира постигнатото – изјави директорката на ММФ, Кристин Лагард.
