Лидерската средба во Виена нема цел да постави некој нов договор туку да обезбеди имплементирање на постојниот Договор од Пржино, изјави денеска портпаролката на Европската комисија, Маја Коцијанчич.
– Целта на состанокот е да се дискутира за начините за решавање на кризата и да се обезбеди дека лидерите ќе продолжат со имплементација на Договорот од Пржино и со реформските приоритети, за да покажат волја да ја вратат земјата на евроатланскиот пат – истакна Коцијанчич.
Портпаролката рече дека веќе се испратени покани во име на комесарот Јоханес Хан и на тројцата европарламентарци, кои се посветени на ова прашање за средба со лидерите на македонските политичките партии, закажан за петок во Виена.
На прашањето зошто средбата е закажана во Виена, а не како досега во Брисел или Скопје, Коцијанчич кратко праша: „А зошто не Виена?“
Лидерската средба доаѓа по новата политичка криза, настаната откако претседателот Ѓорге Иванов донесе одлука за сопирање на сите судски процеси против политичари и нивните соработници, како и по одлуката на ДИК да се распишат избори, без согласност од нејзиниот претседател Александар Чичаковски и од членовите од СДСМ.