Владата на РСМ попладнево го објави и на македонски јазик европскиот предлог, изработен за време на француското претседателство со ЕУ, за отстранување на ветото од Бугарија за почетокот на преговорите со ЕУ.
„Со цел транспарентно информирање на јавноста, Владата на Република Северна Македонија денеска на официјалната веб страна интегрално преведен на Македонски јазик, го објави европскиот предлог“, соопштија од владината прес-служба.
На веб-страницата на Владата на РСМ се објавени:
- Министерски состанок на меѓувладината конференција за завршување на отворањето на преговорите за пристапување на Северна Македонија во Европската Унија – Општ став на ЕУ
- Предлог заклучоци на ЕУ
- Заеднички став на ЕУ
- Линк до објава на предлогот на француското претседателство на англиски и македонски јазик
Од Владата велат дека предлогот во кој се вградени владините забелешки од средината на минатата недела е достапен за јавноста и ставен на широка консултација која премиерот Димитар Ковачевски ја води со сите чинители во државата, вклучувајќи ги и опозициските партии, граѓанските организации и медиумите.
Верзијата на англиски јазик на европскиот предлог беше објавена на 1 јули, по што започнаа консултациите на премиерот Димитар Ковачевски со претставниците на владината коалиција и опозицијата.
Албанската опозиција го прифаќа предлог, помалите партии од власта се против
Инаку, водечката албанска опозициска партија Алијанса за Албанците денеска изјави дека го прифаќа францускиот предлог за почеток на преговорите на земјава со ЕУ. И опозициското движење БЕСА на Биљал Касами денеска преку соопштение информираше дека ќе го прифати секој предлог што го отвора патот за интеграција во ЕУ и дека истиот нема да им наштети на интересите на Албанците во земјата.
За разлика од опозициските партии на Албанците, ДОМ, Демократски Сојуз и ЛДП како помали партии од владејачката коалиција денеска излегоа со сериозни резерви во однос на европскиот предлог.
Од Демократскиот Сојуз информираа дека не се задоволни со доставениот предлог и бараат измени во преговарачката рамка и исфрлање на историските прашања од неа. Тие бараат и признавање на македонското малцинство во Бугарија.
Од ЛДП излегоа со став ќе чекаат на целосен превод на францускиот предлог, а сакаат да го видат и билатералниот протокол.
И од ДОМ очекуваат да го видат билатералниот протокол со Бугарија, но и порачуваат дека за нив е неприфатливо билатерални прашања за историјата и образованието да бидат дел од преговарачкиот процес со ЕУ.
