За три месеци од Штип во странство се иселиле 48 основци


Штип, 5 декември, 2018 - 14:56 (META) 

Од почетокот на  учебната година до крајот на ноември, од основните училишта во Штип се испишале 48 ученици. Тоа значи дека секој втор ден во странство заминувал по еден ученик. Во истиот период, 12 ученици од средните училишта се испишале поради заминување во странство.

Податоците се базирани на исписниците од училиштата, во кои прецизно е наведена причината за отпишувањето.

За разлика од минатите години, кога се чекаше да се заврши училишната година, па се повлекуваа децата во земјите каде работат нивните родители, последните две години, децата се отпишуваат од училиште во кој било период од училишната година. Во основните училишта во Општината Штип, настава посетуваат над 4.000 ученици.

За разлика од Штип во Кочани за овие три месеци се испишале 18 ученици. Интересно е дека од кочанските училиштата си заминуваат и наставници. Работата за овие три месеци ја напуштиле четворица наставници.

Од останатите општини во регионот, од  делчевските училишта се отпишале 13 основци, но има и шест новозапишани ученици, додека во Македонска Каменица, каде изминатите години имаше значајно ислелување, од почетокот на учебната година си заминале само двајца ученици.


„Имри Елези“ во Чаир отвори нова паралелка – решен е проблемот прекубројните ученици


Скопје, 5 декември, 2018 - 14:03 (META) 

Во основното училиште „Имри Елези“ во населбата Дижон во Општина Чаир, се отвори нова паралелка во прво одделение, и на тој начин, се реши проблемот со надминување на бројката на максимум дозволен број на деца во една паралелка.

За овој проблем, порталот „Порталб.мк“ имаше неколку последователни написи.

Имено, во прво одделение беа запишани 108 ученици кои учеа во три паралелки, и на тој начин го надминаа максимално дозволениот број на ученици во една паралелка, според Законот за образование.

„Веднаш штом е дадено одобрение од Општината, ја поделивме паралелката, сега е во функција и редовната настава се одвива“, изјави за „Порталб.мк“, директорката на училиштето Мерита Коџаџику.

Во однос на постапката за огласување на конкурсот за вработување на наставничка, од Општина Чаир рекоа дека изборот спаѓа под надлежност на училиштето.

„Овој пат, не беше потребно да се огласи конкурс за вработување, бидејќи имавме наставничка, која две години беше замена и откако ги исполни сите потребни услови, решението за рабољта и беше доделен нејзе“, рече Kоџаџику.

Инаку, основното училиште „Имри Елези“ оваа учебна година ја започна со кршење на законот, бидејќи 108 ученици од прво одделение беа поделени во три паралелки, и сите три го надминуваа максималниот број, 34 ученици во паралелка. Согласно законот на Министерството за образование и наука, минималниот број ученици во еден клас е 24, а максималниот 34, но паралелки може да се формираат и со помал број ученици доколку се исполнат условите.


Изградбата и реновирањето на училиштата е во надлежност на МОН, вели Елези


Скопје, 3 декември, 2018 - 10:12 (META) 

Во врска со училиштата во кои недостасува простор, и некои други каде што е потребно вработување нови наставници, од Министерството за финансии прстот го насочуваат кон Министерството за образование и наука и велат дека ова министерство во својот буџет мора да испланира средства за инвестиции во училиштата, известува Порталб.мк.

Заменик-министерката за финансии Ширете Елези вели дека училиштата и општините со комплетирана документација треба да конкурираат со своите проекти во МОН и тој сектор треба да распредели пари од буџетот врз основа на потребата за реновирање и изградба на основни и средни училишта во земјата.

– Се одобрува буџет за реконструкции и инвестиции во училиштата и Министерството за образование и наука треба да ги распредели потребните средства за работи како што е реконструкцијата на основните, средните училишта, изградбата на нови училишта и т.н. Ние го распределуваме буџетот што е определен за МОН, а тие се одговорни за планот и програмата. Потоа, општините конкурираат во МОН со различни проекти, се разбира со комплетирана документација, со детална и проектна дозвола итн. А потоа започнува реализацијата. Ова е целосно децентрализирано на ниво на МОН, кое треба да ги обезбеди средствата – изјави Елези.

Што се однесува до процедурата за вработување, Елези додаде дека одобрението се издава од Министерството за финансии.

– Бидејќи се работи за нови вработувања, тоа има фискална импликација и сите се обраќаат до Министерството за финансии, при што ние вршиме проверка на рамките на дотациите и ги одобруваме истите – објаснува Елези.

Инаку, основните училишта „Петар Здравковски – Пенко“ и „Исмаил Ќемали“ се соочуваат со недостиг на простор, така што во едното училиште речиси сите паралели го надминуваат максималниот број дозволен со закон, додека во другото, учениците од прво одделение учат во просториите на една градина.

Од МОН за училиштето „Исмаил Ќемали“, рекоа дека се информирани, но не прецизираа кога тоа ќе се реши проблемот, а што се однесува до училиштето „Петар Здравковски – Пенко“, рекоа дека барањето за проширување на сегашниот објект сè уште не е поднесено во овој оддел од општината Бутел, под чија надлежност спаѓа ова училиште.

Инаку, согласно законот на Министерството за образование и наука, минималниот број ученици во еден клас е 24, а максималниот 34, но паралелки може да се формираат и со помал број ученици доколку се исполнат условите.


Е-дневникот „падна“, се бара фирма што ќе го поправи


Скопје, 28 ноември, 2018 - 10:22 (META) 

Оваа учебна година, електронскиот дневник не работи. Наставниците не можат да внесуваат податоци ниту оценки во него бидејќи страницата не е во функција.

– Засега пишуваме се` што е потребно само во пишаниот дневник. Чекаме насоки од администраторот кога да почнеме да внесуваме оцени и во електронска форма. Родителите на учениците сега не добиваат смс-пораки за изостаноците и оценките на нивните деца, бидејќи има некаков проблем во системот. Праксата покажа дека е-дневникот е добра алатка зашто родителите редовно добиваа информации за успехот на учениците – вели Драгица Поповска, одделенски наставник во основното училиште „Панајот Гиновски“ во Бутел.

Во Министерството за образование објаснуваат дека има технички проблеми кои се` уште се решаваат.

„Во моментов компанијата која е избрана преку спроведена јавна набавка за ажурирање и одржување на електронскиот дневник, работи на надминување на извесни технички предизвици и надградба на системот, но и на ажурирање на податоците. Така што, по завршувањето на предвидените активности и тестирање на платформата, наставниците ќе продолжат непречено да го користат електронскиот дневник. Тој задолжително се пополнува и ќе треба да се пополни, согласно актуелните законски прописи“, информираат од МОН.

Со тоа, додаваат од МОН, и родителите/старателите на учениците ќе продолжат да имаат брз и едноставен увид во оценките и поведението на своите деца.

На прашањето, до каде е најавената новина за кратење на купот административни обврски што ги имаат наставниците, од Министерството одговараат дека во оваа фаза е рано да се говори за тоа.

„Рано е да се зборува за конкретни одредби со кои се уредуваат одредени обврски на наставниците, а кои ќе бидат содржани во новите законски решенија кои ќе ја регулираат областа на основното и средното образование, бидејќи процесите на нивната изработка, односно формулирање (конкретно на Законот за основното образование) се се` уште во тек и се работи на утврдување на конечната верзија која ќе биде и понудена на јавна дискусија“, појаснуваат оттаму.

Електронскиот дневник беше воведен во февруари 2011 година. Сите наставници во државата имаат законска обврска редовно да го пополнуваат, исто како што го пополнуваат и пишаниот дневник. Овој проект имаше за цел да ја подобри комуникацијата меѓу наставниците и родителите, но праксата покажа дека системот често им тренира нерви на просветниците бидејќи „паѓаше“, со што им беше овозможено да го пополнуваат навремено. Проблемите беа изразени пред крај на учебна година, кога речиси 20.000 наставници во исто време пополнуваа конечни оценки на сите ученици во Е-дневникот.

  • Е-дневникот се пополнува од 2011 година.  
  • 17.997 наставници во основните и 7.420 наставници во средните училишта имаат законска обврска да го пополнуваат.
  • Родителите на 192.448 основци и на 71.458 средношколци добиваат смс-пораки за изостаноците и оценките. 
  • Е-дневник водат сите просветници во 993 основни и во 132 училишта за средно образование

Општина Чаир има проект за проширување на училиштето „Исмаил Ќемали“, на ред е МОН


Скопје, 23 ноември, 2018 - 10:21 (META) 

Од Општина Чаир, под чија надлежност е основното училиште „Исмаил Ќемали“, велат дека имаат проект за решавање на проблемот на преголемиот број на ученици, каде што во речиси сите паралелки е надминат максималниот број дозволен со закон – 34 ученици.

Од оваа општина велат дека барањето за проширување на сегашниот училиштен објект е испратено до Министерството за образование и наука и дека се чека одобрувањето, по што ќе започнат со реализација на предвидениот проект.

Портпаролот на Општина Чаир, Куштрим Ала за „Порталб.мк“ објасни дека во подготвениот проект од општината, се планира да се изградат уште осум паралелки.

Директорката на ова училиште, Бурбуќе Имери изјави дека најоптоварени се паралелките од петто одделение, каде што во секоја паралелка е надминат бројот од 34 ученици, а во некои случаи тој достигнува и до 40.

Таа рече дека најдобро би било да се изгради ново училиште, бидејќи според неа, проширувањето на сегашниот објект е краткорочно решение и дека во иднина бројот на ученици повторно ќе се зголеми.И наставниците се пожалија дека е многу тешко да се работи со толку голем број ученици во една паралелка, и велат дека се потребни итни решенија.

Инаку, согласно законот на Министерството за образование и наука, минималниот број ученици во еден клас е 24, а максималниот 34, но паралелки може да се формираат и со помал број ученици доколку се исполнат условите.

Родителите бараат Општината Чаир да бара долгорочно решение на проблемот, МОН да се ангажира повеќе за распределба на паралелките во кои е надминат максималниот број на ученици определен со Закон и изградба на училишта, а таму каде што има потреба, Министерството за финансии да даде согласност за спроведување на законот.


ОУ „Исмаил Ќемали” e преоптоварено со ученици и со недостиг на простор


Скопје, 21 ноември, 2018 - 11:48 (META) 

Основните училишта „Имри Елези” и „Петар Здравковски-Пенко“ во скопските општини Чаир и Бутел не се единствените што имаат проблем со преголемиот број на ученици.

Уште еден случај на прекршување на законот откри редакцијата на „Порталб“ во основното училиште „Исмаил Ќемали“ во населбата Топанско Поле. Во ова училиште речиси сите паралелки се многу блиску до законски утврдената граница за дозволен број на ученици по паралелка, а тоа е 34, додека неколку од нив дури и го надминуваат овој број.

Директорката на ова училиште, Бурбуќе Имери, вели дека најоптоварени паралелки се тие од петто одделение, каде бројот на ученици во секоја паралелка е над 34.

– Речиси сите паралелки се преполни, но најголемиот проблем е со петтите одделенија и дневниот престој, во кои има по 39 и 40 ученици – изјави Имери за „Порталб“.

Таа рече дека општина Чаир е запознаена со состојбата во ова училиште.

– Разговаравме со општината и ни ветија дека ќе ни помогнат и дека ќе бидеме нивни приоритет. Но дури и да се отворат паралелки и да се вработат наставници, немаме каде да ги носиме, бидејќи имаме недостиг на простории. Ќе треба да се изградат најмалку 7 училници за да се реши еднаш засекогаш нашиот проблем. Или да се изгради ново училиште во овој регион – изјави Имери.

Наставниците велат дека е прилично тешко да се работи со толку голем број ученици во една паралелка.

Дополнително и родителите бараат нов училиштен објект и соодветни услови за образование на нивните деца.

– Како што гледате и самите, ова училиште има премногу ученици, би било добро општината да преземе мерки и да изгради ново училиште и еднаш засекогаш да го реши проблемот во ова училиште – велат некои од родителите.


Учебниците по математика за основно образование, проблем за наставниците и учениците


Штип, 15 ноември, 2018 - 16:06 (META) 

Учебници кои не даваат објаснување, со плитки и површни содржини се користат во наставата по матаматика во основното образование. Поради тоа, наставниците и учениците се соочуваат со проблеми при наставата, со што математиката станува непознаница, а на меѓународните тестирања, учениците добиваат слаби оценки.

Ова беше заедничката констатација на наставниците од денешната средба во Штип, на која беа претставени новите збирки по математика.

Група на наставници и професори по математика ги изработиле овие збирки, со цел олеснување при учењето математика. Овие збирки се од прво до деветто оделение, а при изработката, авторите се воделе според практичната потреба на учениците.

-Во учебникот за четврто одделение ставивме да се изучуваат равенки, што според наставната програма се дури во осмо одделение. Сметаме дека е предоцна во осмо да се изучуваат равенки- изјави провесорот Трајче Ѓеоргиевски, кој е дел од авторскиот тим.

Околу 600 наставници и професори денеска во Штип имаа прилика да ги погледнат новите збирки по математика. Според нив, актуелните учебници се со стеснети содржини, кои не нудат доволно објаснување, а понекогаш создаваат и забуна.

На ПИСА тестирањето, што го спроведува Меѓународната организација за соработка и развој – ОЕЦД, македонските 15-годишници на тестот по математичка писменост беа на дното на табелата, во групата на четири последни земји.

Оваа година ПИСА тестирањето беше спроведено во текот на април, во 60 земји од светот, меѓу кои и Македонија. Резултатите ќе бидат познати на крајот на 2019 година.


По тројца ученици на една клупа во „Петар Здравковски Пенко“ во Општина Бутел


Скопје, 24 октомври, 2018 - 11:30 (META) 

Основното училиште „Петар Здравковски Пенко“ во Општина Бутел, се соочува со голем број на ученици, поради недостаток на простор. Во ова училиште има 1.654 ученици, поделени на 65 паралелки на три наставни јазици, албански, македонски и турски јазик. Некои од албанските паралелки се пренатрупани, дури и со 37 ученици. „Порталб.мк“ го посети училиштето, на една клупа има и по тројца ученици, што го попречува учењето на децата.

Од друга страна, паралелките на македонски и турски наставен јазик, поради немање деца работат со по 10 ученици.

Родителите се жалат во врска со овој проблем, и вината ја гледаат во раководството на училиштето, со обвинување дека се прифаќаат деца кои не се од оваа населба, и на тој начин се преоптоваруваат паралелките.

„Многу деца кои се примени во училиштето не се од оваа населба, ги избегнуваат училиштата во нивна близина за да ги донесат своите деца овде. Јас не знам зошто се дозволува нивниот прием ако паралелките се веќе преполни со ученици и со тоа им нанесуваат штета на нашите деца, бидејќи наставниците не можат да работат со сите 37 ученици, во толку краток временски рока колку што трае еден час”, велат родителите , кои беа се насобрани пред училиштето чекајќи ги нивните деца да ја завршат наставата.

Раководството очекува одговор од Министерството за образование на нивната реакција за поделба на паралелката која го брои повеќе од 34 ученици.

Директорот на основното училиште „Петар Здравковски-Пенко“, Енис Мемети за „Порталб.мк“ вели дека интересот на децата за запишување во ова училиште е огромен, а сега е поднесено барање и во општина и во МОН за проширување и зголемување на бројот на паралелки.

„Ние сме во разговори со општината и МОН идејата е од порано, но дојде до политички турбуленции сега кога повторно почнавме со нашето барање. Пред две недели имавме средба со Министерот за образование, Арбен Адеми и ја обновивме оваа идеја, и верувам дека до следната година таа ќе биде во програмата на МОН, за проширување на објектот на нашето училиште”, рече Мемети.

Тој додаде дека поради вработените и барањата од родителите за да ги запишат децата во ова училиште, една паралелка го надминува бројот пропишан со закон, што е 34 ученици, и дека до Министерството е поднесено барање за поделба на истата.

„Имаме добар наставнички кадар и затоа родителите брзаат да ги запишат децата кај нашите најдобри наставници. Има една паралелка со повеќе од 34 ученици и ние веќе имаме поднесено барање за поделба, па сега чекаме одговор од Министерството за образование и наука ја имаме поднесено потребната документација за оваа поделба. Да се отворат дури пет паралелки во прво одделение, тие веднаш се пополнуваат, интересот е огромен“, додаде Мемети.

Согласно законот на Министерството за образование и наука, минималниот број ученици во еден клас е 24, а максималниот 34, но паралелки може да се формираат и со помал број ученици доколку се исполнат условите.

Родителите бараат МОН да ја подели паралелката која го надминува бројот на ученици предвидени со закон,  а раководството на училиштето да го применува законот и да не дозволи надминување на бројот на ученици за време на уписот како и да се зголеми простор на објектот согласно потребите.

Секој родител кој има поплаки за нерегуларности во основните училишта на Македонија може да го пријави случајот во два сектори и одговорни лица во Министерството за образование и наука.

Секторот за основно образование има две единици Единица за основно образование
и Единица за финансирање на основното образование и развој на кариера. Раководител на сектор е Елена Ивановска +389 2 3117 896 elena.ivanovska@mon.gov.mk.

Во Сектор за стандарди на учениците и студентите постојат Единица за стандард на учениците и Единица за стандард за студентите.Одговорни лица за овие сектори се Ќенан Сали +389 2 3117 896 qenan.sali@mon.gov.mk и Џемиле Идризи +389 2 3117 896 xhemile.lamallari@mon.gov.mk


Медицинските струки се виза за работа во странство за младите од Источниот регион


Штип, 4 септември, 2018 - 16:59 (META) 

На последниот ден од уписите на универзитетот „Гоце Делчев“ од Штип, се повтори сликата од уписите во средните училишта. Пополнети се речиси сите места на факултетите со медицинските струки. Според последните бројки до 15 часот се пријавиле 389 завршени ученици.

– Се очекува и во вториот уписен рок да има голем интерес за Факултетот за медицински науки, од студенти од Медицинскиот факултет од Скопје, кои ќе конкурираат на некои од слободните места од студиските програми – изјави Кире Барбареев, проректор за настава.

На првиот уписен рок се пријавиле 1.600 завршени средношколци. Од нив 120 се студенти од Турција, Бугарија и Србија. Покрај за медицинските науки, интерес има и за Информатика, Економскиот, Филолошкиот и Правниот факултет.

Идентична слика е и во средните училишта во Штип. Целосно пополнети се паралелките во прва година на Средното медицинско училиште „Јане Сандански“, каде се запишани 238 ученици од Штип и регионот.

Остантите три средни училишта побараа дозвола од Општина Штип да формираат паралелки со помал број од законски дозволениот минимум од 25 ученици, поради помалиот број на запишани во прва година.

Интересот за медицинските струки не е случаен. Отворена е можноста за работа во странство, особено на завршените лекари со лиценца и медицинските сестри. Германија е најчесто земјата каде заминуваат, за што покрај основното познавање на германскиот јазик, се заминува и со бугарски пасош. Во источниот дел на Македонија активни се агенции кои се специјализирани при посредувањето во наоѓање работа по германските болници.

Последиците од масовното заминување на медицински кадар од Истокот, најдобро се рефлектира во Клиничката болница во Штип, која има потреба од најмалку 100 нови работувања од средношколски кадар.


Почнува новата учебна година со околу 270.000 ученици


Скопје, 3 септември, 2018 - 10:16 (META) 

Денеска почнува новата учебна година со околу 270.000 ученици. Според најавите од Министерството за образование и наука (МОН), учебната 2018/2019 година се очекува да започне со ревидираните наставни планови за прво, второ и трето одделение.

Оваа година ќе бидат доставени 22 корегирани учебници, а новина е и што учебниците што бесплатно им се даваат на учениците ќе бидат достапни и во слободнна продажба, по истата цена по која ги откупува министерството.

Станува збор за учебниците по математика од прво до деветто одделение, учебниците по природни науки од прво до шесто одделение, потоа тие по биологија од седмо до деветто одделение. Корегирани се и учебниците по хемија и по физика за осмо и деветто одделение.

За првачињата се предлага намалување на бројот на предмети, најмногу четири наставни часа во денот, повеќе одмор и игри, вежбање на часовите наместо домашни задачи и редуцирање на тестовите.