По повод 21 Март, Светскиот ден на поезијата, Министерството за образование и наука (МОН) и поетскиот фестивал „Струшки вечери на поезијата“ распишаа конкурс за избор на најдобра песна, наменет за учениците од основните и средните училишта.
Целта на конкурсот, велат од МОН, е поттикнување на креативноста и имагинацијата на учениците и популаризација на поезијата како литературна форма и највисок јазичен израз.
Учениците до трето одделение можат да се пријават со лично дело на тема „Мојата песничка – моја слика за шарен и весел свет“.
За учениците од четврто до шесто одделение пак, темата е „Збор по збор – песна“, додека учениците од седмо до деветто одделение се натпреваруваат на тема „Да напишеме стих – да создадеме поубав свет”.
Повеќе детали, основците можат да погледнат на овој линк.
За средношколците, пак, темата е „Куќа цел свет братски ми е, а конкурсот е објавен на овој линк.
Темата е стих од песната „Татунчо“ од Кочо Рацин и се однесува на жртвувањето и борбата за поправеден свет наспроти вообичаените очекувања и материјалистички стремежи. Но, пошироко, стихот упатува на една поопшта идеја за космополитизмот и братството меѓу луѓето, велат од МОН.
Од министерството и од „Струшки вечери на поезијата“ информираа и дека во сите основни и средни училишта за време на наставата по мајчин јазик во текот на месец март, ќе се организира и еден специјален час посветен на 21 март – Светскиот ден на поезијата, при што учениците ќе бидат запознаени со важноста на денот востановен од УНЕСКО во 1999 година и важноста на поезијата како една од најблагородните и возвишени уметности на пишаниот збор.
Пред учениците ќе бидат презентирани примери од најпознатите светски и домашни поети, како и значењето на „Струшките вечери на поезијата“ како еден од најзначајните светски поетски фестивали, а ќе бидат прочитани и стихови од годинешните добитници на „Златниот венец“ и „Мостови на Струга“ како највисоки признанија кои се доделуваат на овој фестивал.
