Џафери утре во Бугарија на ратификацијата на Протоколот за членство во НАТО


Скопје, 19 февруари, 2019 - 14:27 (META) 

Претседателот на Собранието, Талат Џафери, денеска и утре е во официјална посета на Република Бугарија. Тој утре ќе присуствува седницата на која што ќе се ратификува Протоколот за пристапување на Република Северна Македонија во НАТО во Народното собрание на Република Бугарија.

Од македонското собрание информираат дека по ратификацијата, Џафери ќе има средба со претседателката на Народното Собрание на Бургија, Цвета Карајанчева со која ќе дадат заеднички изјави за медиуми.

Во рамките на посетата предвидена е и средба со вицепремирката и министерка за надворешни работи на Бугарија Екатерина Захариева.

Протоколот за членство во НАТО прва го ратификуваше Грција, а досега тоа го направија и Словенија и Албанија.


Бугарија в среда ќе го ратификува Протоколот за членство на Македонија во НАТО


Софија, 18 февруари, 2019 - 9:36 (META) 

Парламентот на Бугарија в среда на пленарна седница треба да го ратификува Протоколот за членство на Македонија во НАТО.

Се очекува на ратификацијата на протоколот да присуствува претседателот на македонското Собранието, Талат Џафери.

Парламентарната Комисија за одбрана на 15 февруари го одобри протоколот и им препорача на пратениците да го усвојат.

Претседателот на Комисијата, Константин Попов изјави дека Северна Македонија може да смета на целосна поддршка и соработка од Бугарија на патот кон полноправно членство во НАТО.

Протоколот за членство во НАТО прва го ратификуваше Грција, а досега тоа го направија и Словенија и Албанија.


Албанија го ратификуваше Протоколот за членство на Македонија во НАТО


Тирана, 14 февруари, 2019 - 14:17 (META) 

Албанскиот Парламент денеска со 130 гласови „за”, ниту еден против го изгласа Протоколот за членство на Македонија во НАТО. На седницата присуствуваше претседателот на Собранието на Македонија, Талат Џафери кој по изгласувањето на Протоколот изрази голема благодарност за поддршката што Албанија и ја дава за земјата.

Спикерот Џафери рече дека Скопје е посветено на градење општество за сите, без оглед на етничката, социјалната или каква било друга припадност.

Тој рече дека се надева оти до крајот на оваа или почетокот на 2020 година, Протоколот за полноправно членство во НАТО, потпишан од сите 29 амбасадори на земјите-членки, ќе биде ратификуван од сите национални парламенти, со Република Северна Македонија ќе стане и официјално 30-та членка.

– Со денешната ратификација Република Албанија и албанскиот народ уште еднаш го потврдија пријателскиот однос кон Република Северна Македонија и нејзините граѓани. Бидете сигурни дека секогаш ќе се сеќаваме на ова и секогаш сме знаеле да ги почитуваме и ги цениме нашите вистински пријатели – истакна Џафери.

На седницата се обрати и премерот Еди Рама, кој високо ги оцени односите меѓу двете земји и ја нагласи поддршката на Тирана за Скопје.

На седнцата се случи мал инцидентот, кога пратеникот од пратеничката група на опозициската Демократска партија Еди Палока, воедно и потпретседател на партјата, истури боја врз премиерот Еди Рама, по што беше отстранет од собраниската сала.


Албанија утре ќе го ратификува протоколот за членство на Македонија во НАТО


Тирана, 13 февруари, 2019 - 10:00 (META) 

Претседателот на Собранието, Талат Џафери денеска ќе отпатува во работна посета во Република Албанија.

Како што информира собраниската прес-служба, Џафери во Албанија ќе присуствува на утрешната пленарна седница на Собранието на Република Албанија на која ќе се ратификува Протоколот за членство на Република Македонија во НАТО.

Вчера, Државниот Збор на Република Словенија на вонредна седница го ратификуваше Протоколот за пристапување на Македонија во НАТО. Со тоа, Словенија стана втората земја-членка на Алијансата, која по Грција, го ратификува Пристапниот протокол во НАТО.


Словенија го ратификуваше протоколот за влез на Македонија во НАТО


Љубљана, 12 февруари, 2019 - 12:19 (META) 

Државниот Збор на Република Словенија денеска на вонредна седница го ратификуваше Протоколот за пристапување на Македонија во НАТО. Со тоа, Словенија стана втората земја-членка на Алијансата, која по Грција, го ратификува Пристапниот протокол во НАТО.

На седницата пред гласањето се обрати претседателот на Собранието на Македонија, Талат Џафери, кој се заблагодари во име на Собранието и граѓаните на Македонија и нагласи дека со овој чин се потврди пријателскиот и принципиелен однос кон граѓаните на нашата земја.

Според Џафери, потпишувањето на Преспанскиот договор и неговото усвојување на националните парламенти е т.н. вин-вин, сите сме победници и губитници. Изрази надеж дека до крајот на оваа година Протоколот ќе биде усвоен од Парламентите на сите 29 земји-членки на НАТО. Џафери очекува оваа година да добиеме и датум за почеток на преговорите за членство во ЕУ

Според најавите од Албанија, в четврток пристапниот Протокол треба да биде ратификуван и од албанскиот Парламент. Албанските медиуми јавија дека Протоколот за членство на Македонија во НАТО веќе добил зелено светло од законодавно- правната комисија и оти во четврток е закажана седница на Парламентот.


Одиме во НАТО по брзата патека (видео)


Скопје, 12 февруари, 2019 - 11:10 (META) 

Денеска на платото пред владата, на свечена церемонија се крева знамето на НАТО. Иако Македонија, со потпишувањето на пристапниот протокол доби место во Алијансата, постојат повеќе чекори до полноправното членство.

Најкус период во кој што една земја станала полноправна членка по по потпишување на пристапниот протокол биле девет месеци. Толку чекале Хрватска и Албанија, чии пристапни протоколи беа потпишани на 9 јули 2008 година, а формално станаа членки на 1 април следната година. Македонија формално ќе стане полноправна членка на НАТО во моментот кога во Вашингтон ќе го предаде „пристапниот инструмент“, во нашиот случај одлуката за пристапување и закон за ратификација на меѓународниот договор за Северноатлантски сојуз (Вашингтонски договор).

Според објаснувањето на НАТО, сега сојузниците треба да го ратификуваат протоколот за пристапување на Македонија според своите национални процедури.

– Процедурата за ратификација е различна од земја до земја. На пример, во САД е потребно двотретинско мнозинство за потребната легислатива да мине во Сенатот. Во други земји, на пример во Обединетото кралство, не е потребно формално гласање во парламентот – наведува Алијансата.

Откако сите сојузници ќе го ратификуваат протоколот, според процедурата, генералниот секретар на НАТО формално ја поканува земјата да му се приклучи на Северноатлантскиот сојуз. Ова се случува откако сите сојузници ќе ја известат владата на САД, во чие „владение“ е Вашингтонскиот договор.

Новата членка тогаш го прифаќа Вашингтонскиот договор според својата процедура за ратификација на меѓународни договори – некаде со собраниско гласање, некаде со референдум, некаде со владина одлука.

Одлуката или законот за ратификација на Вашингтонскиот договор, формално „пристапен инструмент“, потоа му се доставува на Стејт департментот, а чинот претставува формален прием во членство во НАТО.

Периодот на ратификација во последните четири бранови на проширување се движел од 15 месеци до девет месеци. Земјите од Вишеградската група (Чешка, Унгарија и Полска) биле поканети на Самитот во Мадрид во 1997 година, во декември таа година боле потпишани протоколите за пристап,  а станале членки на 12 март 1999 година. Вилнус групата (Бугарија, Естонија, Латвија, Литванија, Романија, Словачка и Словенија) по поканата на Вашингтонскиот самит во 1999 година, потпишале протокол во март 2003, а станале членки на 29 март 2004 година.

Најбрз прием имале земјите од Јадранската група – Хрватска и Албанија. По поканата на Самитот во Букурешт со 2008 година, кога влезот на Македонија беше блокиран од Грција, двете земји добиле пристпани протоколи на 9 јули 2008, а членство на 1 април 2009 година. Последната членка, Црна Гора, доби покана во декември 2015 година, протокол во мај 2016 година, а формално членство во јуни 2016 година.


Словенија денеска ќе го ратификува протоколот за членство на Македонија во НАТО


Скопје, 12 февруари, 2019 - 11:01 (META) 

Словенечкиот парламент на вонредна седница ќе го ратификува протоколот за членство на Република Македонија во НАТО, информираат од македонското Собрание. Со тоа, Словенија ќе биде втората земја-членка на Алијансата која по Грција ќе го ратификува Пристапниот протокол во НАТО.

„Државниот збор на Република Словенија, денеска ќе има вонредна пленарна седница на која во 10:55 ќе се гласа за ратификацијата на протоколот за членство на Република Македонија во НАТО, со што ќе биде првиот национален парламент на земја членка на НАТО што по Република Грција ќе го отвори патот за следните национални парламенти“, соопштија од собраниската прес-служба.

Непосредно пред гласањето, пред пратениците на Државниот збор, ќе се обрати претседателот на македонското Собрание, Талат Џафери.

В четврток Пристапниот протокол треба да биде ратификуван и од албанскиот Парламент. Албанските медиуми јавија дека Протоколот за членство на Македонија во НАТО веќе добил зелено светло од Законодавно парламентарната комисија и оти во четврток е закажана седница на Парламентот.


Косачев: Пристапувањето на Македонија во НАТО никому нема да донесе добро


Москва, 7 февруари, 2019 - 10:47 (META) 

Претседавачот на Комитетот за меѓународни односи при Советот на Руската Федерација, Константин Косачев, оцени дека тоа што Македонија го потпиша пристапниот протокол за НАТО претставува можеби симболичен чин, но е важен за Алијансата, имајќи го предвид растечкиот судир помеѓу Алијансата и Москва.

-Ова е повеќе симболичен отколку практичен чекор, бидејќи станува збор за мала земја која нема никаква важност за НАТО. Но, ова, сепак, е важно за Алијансата имајќи го предвид судирот со Русија, која постојано укажува на деструктивната улога на НАТО како остаток од Студената војна – вели Косачев.

Според него, целиот случај околу Македонија покажува дека е оправдано руското незадоволство во врска со Алијансата. Укажува и дека критиката на американскиот претседател Доналд Трамп на сметка на НАТО, овде одиграла клучна улога.

-Тоа несомнено ги алармирало официјалните лица на Алијансата во Брисел кои сега чинат се’ да му покажат на Вашингтон дека НАТО стои добро и дека се шири – вели Косачев.

Рускиот сенатор верува дека пристапувањето во НАТО нема да и донесе добро ниту на Македонија, ниту на европската безбедност.


Комитетот за надворешни работи на Конгресот на САД со поддршка за членството на Македонија во НАТО


Вашингтон, 7 февруари, 2019 - 10:38 (META) 

Претседателот на Комитетот за надворешни работи на Претставничкиот дом, Елиот Л. Енгел ја повика администрацијата на претседателот Доналд Трамп да го поддржи членството на идната Република Северна Македонија во НАТО.

Во писмо до државниот секретар Мајк Помпео, лидерот на Комитетот за надворешни работи пишува дека членството на Северна Македонија во НАТО ќе помогне да се обезбеди стабилноста и мирот на Балканот.

„Членството на Северна Македонија во НАТО ќе има значителна корист не само за Северна Македонија и Грција, туку и за САД и останатите земји членки“, се наведува во писмото.

Во него, се нагласува дека членството на Северна Македонија во Алијансата е јасен знак за континуираната одржливост на НАТО во 21 век.

„Членството на Северна Македонија ќе ѝ помогне на Алијансата да ги отфрли руските злонамерни активности на Балканот, каде Владимир Путин се обидува да сее немир и несогласувања. Прифаќањето на Северна Македонија ќе ја приближи Европа чекор поблиску до еден слободен, обединет и во мир континент“, се додава во писмото.

Комитетот за надворешни работи на Претставничкиот дом, во писмото уште ја охрабрува админситрацијата на Трамп да дејствува брзо за напредокот на Северна Македонија на нејзиниот пат за 30. членка на НАТО.


Протоколот за членство во НАТО пред комисија во грчкиот Парламент


Атина, 7 февруари, 2019 - 9:28 (META) 

Комисијата за национална одбрана и надворешни работи на грчкиот Парламент, денеска во 13 часот по локално време ќе го разгледа нацрт законот за „Ратификација на Протоколот кон Северноатлантскиот договор за пристап на Република Северна Македонија“, јави дописничката на МИА од Атина.

Известувачи за нацрт законот се пратеникот од СИРИЗА и поранешен министер за цивилна заштита, Никос Тоскас и пратеникот од Нова демократија, одговорен за надворешна политика, Јоргос Кумуцакос.

Се очекува комисијата да одржи една седница, а утре законот да биде донесен на пленарна расправа во грчкиот Парламент, што ќе заврши со гласање од пратениците.

Нацрт законот вчера бил доставен во грчкиот Парламент, потпишан од алтернативниот министер за надворешни работи, Јоргос Катругалос, од министерот за одбрана, Евангелос Апостолакис и од министерот за финансии, Евклисдис Цакалотос, а содржи три членови.

Во првите два члена се објаснети следните чекори по ратификацијата на Протоколот, а третиот се однесува на тоа дека Протоколот ќе биде доставен до архивата на американската администрација.