!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Повеќе од 200 градоначалници од Каталонија протестираа во Брисел


Брисел, 7 ноември, 2017 - 20:39 (META) 

Околу 200 каталонски градоначалници денеска се собраа во Брисел за да му изразат поддршка на сменетиот претседател на овој шпански регион, Карлес Пучдемон, додека Мадрид бара негова екстрадиција.

Собирот на градоначалниците се одржа во таканаречениот европски кварт на Брисел, каде се сместени институциите на ЕУ, а во близина се собраа и стотина приврзаници за единствена Шпанија, кои носеа транспаренти на кои беше испишано „Не за каталонската независност“.

Осум сменети членови на каталонската влада се во затвор во Шпанија, еден е пушен со кауција, додека Пучдемон се подготвува да учествува на вонредните избори за каталонскиот парламент, кои Мадрид ги распиша за 21 декември.

– Бараме од Европа и молиме да нè сослуша, ние се чувствуваме како Европејци и тука сме во срцето на Европа за тоа да го кажеме – рече градоначалничката на Англес, Астрид Десед.

Пучдемон и четворица доскорешни каталонски министри доброволно им се предадоа на белгиските власти во неделата, а вчера беа пуштени на условна слобода. Тие не смеат да ја напуштаа Белгија и мора да останат на адресите на кои пријавиле дека престојуваат, но и да одговараат на сите судски и полициски повици.


Пучдемон и министрите се предале на белгиската полиција


Брисел, 5 ноември, 2017 - 14:29 (META) 

Според медиумите во Белгија, сменетиот претседател на каталонската влада, Карлес Пучдемон, ѝ се предал на полицијата. Освен Пучдемон, уапсени се и четворицата министри со кои тој пребега во Белгија, откако шпанските власти наредија апсење на неговиот кабинет.

Обвинителството во Брисел за денеска најави дополнителни информации за ектрадицијата на Пучдемон и на министрите во Шпанија.

По поранешниот каталонски лидер, властите во Мадрид распишаа европска потерница. Десет од поранешните министри во кабинетот на каталонската влада се во затвор, а еден е пуштен со кауција да се брани од слобода.


Пучдемон се наоѓа во Брисел, не се исклучува можноста да бара азил


Брисел, 31 октомври, 2017 - 10:45 (META) 

Разрешениот каталонски лидер, Карлес Пучдемон е во Брисел и не се крие, изјавил неговиот адвокат Пол Бекарт, кој не ја отфрла можноста Пучдемон да бара азил во Белгија.

– Тој ги има сите права да биде таму, против него не се води никаква постапка – изјавил Бекарт за фламанското државно радио.

Прашан дали Пучдемон планира да бара азил во Белгија, Бекарт одговорил дека сите опции се отворени, но оти сè уште ништо не е одлучено, пренесува „Би-би-си“.

Шпанското обвинителство предложи Пучдемон и другите организатори на каталонскиот референдум за независност да бидат обвинети за бунт.

Централната влада во Мадрид вчера ја презеде контролата над Каталонија.


Иванов: ЕУ ѝ го попречува просперитетот на Македонија ставајќи ја во статус кво


Брисел, 27 октомври, 2017 - 10:44 (META) 

Претседателот на Македонија, Ѓорге Иванов, во Брисел се сретна со заменик-претседателот на владата и министер за надворешни работи и европски прашања на Кралството Белгија, Дидие Реиндерс.

Иванов и Реиндерс размениле мислења за севкупните билатерални односи, при што било констатирано дека двете земји имаат пријателски односи, со заемни заложби за нивно постојано унапредување.

Претседателот Иванов изразил благодарност за принципиелната поддршка што Кралството Белгија ја дава за аспирациите на Република Македонија за членство во Европската Унија и во НАТО и посочил на потребата тие што поскоро да се деблокираат.

– Со состојбата статус кво, на Македонија ѝ е попречено правото на просперитет. Европската Унија треба да преземе итни чекори и да го одблокира интеграцискиот процес на Македонија, кој е неповратен. Како земја, потребна ни е трансформирачката моќ на интегративниот процес – рече претседателот Иванов.

На средбата Реиндерс изразил поддршка на заложбите на Македонија за отворање на пристапните преговори за членство во Европската Унија.


Анѓушев – Маргхем: Иднината на енергетиката е во обновливите извори на енергија


Брисел, 26 октомври, 2017 - 12:56 (META) 

Моменталната позиција и идните планови и перспективи на Макакедонија во енергетскиот сектор биле теми на денешната средба на вицепремиерот за економски прашања, Кочо Анѓушев, со министерка за енергeтика, животна средина и за одржлив развој на Белгија, Мари Кристин Маргхем, во Брисел.

– Македонија подготвува нов закон за енергетика, во кој ќе биде имплементиран третиот енергетски пакет на Европската Унија и мерките препорачани од Енергетската заедница. Иднината во енергетиката ќе се базира на обновливи извори на енергија, преку рационален, одржлив и исплатлив концепт – истакнал Анѓушев на средбата, соопштуваат од неговиот кабинет.

Тој нагласил дека Македонија се стреми кон целосна интеграција во ЕУ и во тој процес, како што додал, клучна е соработката со земјите членки, како што е и Белгија, и користење на нивните искуства, особено во однос на усогласување на националната регулатива со европските прописи.

Министерката Маргхем порачала дека во евроинтегративниот процес, Македонија може да очекува поддршка од Кралството Белгија и оти очекува односите помеѓу двете земји да продолжат да се развиваат и да се интензивираат.

Анѓушев на Маргхем ѝ ги презентира мерките од планот за економски пораст на Владата и ѝ порачал дека странските инвеститори, вклучително и тие од Белгија, се добродојдени да инвестираат во Македонија.


Иванов во Брисел ќе се сретне со Туск


Брисел, 25 октомври, 2017 - 9:32 (META) 

Претседателот Ѓорге Иванов од денеска во Брисел ќе се сретне со претседателот на Европскиот совет, Доналд Туск, соопштија од кабинетот на претседателот.

Иванов, кој се наоѓа во дводневна посета на Кралството Белгија, утре ќе учествува на 19. годишна сесија на Форумот за домашна и глобална безбедност, во рамки на Форумот „Кран Монтана“. Предвидено е Иванов да се обрати на официјалната сесија на отворањето на форумот, како и на пленарната сесија посветена на соседската политика на Европската Унија, со посебен фокус на иницијативата „Три мориња“.

За време на посетата на Брисел, Иванов ќе се сретне со заменик-претседателот на владата и министер за надворешни работи и европски прашања на Кралството Белгија, Дидие Реиндерс.


Иванов во дводневна работна посета на Брисел


Скопје, 24 октомври, 2017 - 12:42 (META) 

Претседателот на државата, Ѓорге Иванов, од утре ќе претстојува во дводневна работна посета на Брисел, соопштија денеска од неговиот кабинет.

Утре, како што информираат од кабинетот, Иванов ќе има средба со претседателот на Европскиот совет, Доналд Туск.

В четврток, македонскиот претседател ќе учествува на 19. годишна сесија на Форумот за домашна и глобална безбедност, во рамки на Форумот „Кран Монтана“. Предвидено е Иванов да се обрати на официјалната сесија на отворањето на форумот, како и на пленарната сесија посветена на соседската политика на Европската Унија, со посебен фокус на иницијативата „Три мориња“.

„За време на работната посета на Брисел, претседателот Иванов ќе оствари средба со заменик-претседателот на владата и министер за надворешни работи и европски прашања на Кралството Белгија, Дидие Реиндерс“, стои во соопштението.


ИД ја презеде одговорноста за нападот во Брисел


Брисел, 27 август, 2017 - 11:19 (META) 

Милитантите од Исламска држава ја презедоа одговорноста за нападот со нож на војниците во Брисел, стои во соопштението кое преку сервисот „Телеграм“ го објави „Амак“, пропагандистичкиот орган на организацијата.

Маж во петокот навечер со нож нападна војници во центарот на Брисел, пред да биде убиен, а белгиското обвинителство наведе дека нападот може да се смета за „терористички“.

Белгиските војници веќе две години патролираат во центарот на Брисел поради потенцијални терористички закани.

Агенцијата „Белга“ пренесе дека напаѓачот бил на возраст од околу 30 години и дека веднаш по нападот бил пренесен во болница, каде починал.


Пукање и полициска потера по возило со експлозив во Брисел


Брисел, 8 август, 2017 - 19:50 (META) 

Бриселската полиција пукала во возило во квартот Моленбек и повикала единица за деминирање откако возач им соопштил дека во автомобилот има експлозив.

Белгиското федерално обвинителство и локалната полиција засега не се достапни за коментар.

Локалните медиуми јавуваат дека полициската потера по возилото завршила откако возачот заглавил во сообраќајниот метеж во Брисел. Дел од медиумите јавуваат дека станува збор за возило со германски регистарски таблички.

– Го извлековме возачот, а тој веднаш ни рече дека во автомобилот има експлозив – изјавил портпаролот на полицијата за белгиската телевизија „Ер-те-ел“.

Моленбек е сиромашен кварт со голем број жители по потекло од Мароко. Овој дел од Брисел стана озлогласен откако ќелија на Исламска држава со седиште во овој дел на градот ги организираше самоубиствените напади во Париз во ноември 2015 година.

За време на минатогодишните терористички напади во Брисел загинаа 32 лица.


Со 240 километри на час, 79-годишна жена возела „порше“


Брисел, 25 јули, 2017 - 16:38 (META) 

Сообраќајни полицајци во Белгија биле многу изненадени кога констатирале дека зад воланот на автомобилот „порше бокстер ГТС“, за кого во 2 часот наутро на 18 јуни измериле дека се движел со брзина од 238 километри на час, седи 79-годишна жена.

Кога нивни колеги подоцна ја сопреле, таа рекла дека немала поим дека вози толку брзо, а излегла да се вози среде ноќ за да си ја разбистри главата.

Старицата завршила пред суд за прекршоци, каде добила казна од 4.000 евра за пречекорување на брзината и дозволата ѝ била одземена за период од три месеци. Сепак, тоа не ѝ паднало толку тешко колку да го убеди судот дека навистина таа била зад воланот.