Четворица загинати во судир во воздух на хеликоптер и авион во Германија


Карлсруе, 23 јануари, 2018 - 17:11 (META) 

Во страотна воздухопловна несреќа што се случи во Германија, кога во градот Филипсбург се судриле хеликоптер за итна помош и мал авион, четири лица ги загубиле животите.

Несреќата се случила денеска во регионот Карлсруе во покраината Баден-Виртемберг, во близина на нуклеарна централа, а причините за судирот во воздух засега се непознати.


1,2 милиони патници од Македонија летале со „Виз-ер“


Скопје, 11 јануари, 2018 - 12:08 (META) 

„Виз ер“, лани  превезе 1,2 милиони патници на ниско-буџетните македонски авиолинии, што претставува пораст од 20 проценти на годишно ниво и поддржува 900 локални работни места во придружните индустрии.

Лани, компанијата ја прошири својата скопска флота на четири авиони и воведе четири нови авиолинии од Скопје до Будимпешта, Малта, Рим и Ваксјо.

– Како авиокомпанија со најголем удел во патничкиот авиосообраќај, очекуваме „Виз ер“ да продолжи со развојот на нивниот бизнис на македонскиот пазар, притоа инвестирајќи во нови дестинации и зголемување на фреквенциите на постојните авиолинии – изјави генералниот директор на „ТАВ Македонија“, Алпер Ерсој.

„ТАВ Македонија“ лани ја заврши со 2 милиона патници (2.027.344) на скопскиот и охридскиот аеродром, што претставува пораст за 13 проценти споредено со 2016 година. Во исто време со порастот на патничкиот авиосообраќај, вкупниот број на летови на двата аеродрома во Скопје и во Охрид е зголемен за 7 отсто, достигнувајќи 18.130 летови во 2017 година.


Тунис им забрани на авиокомпаниите од ОАЕ да слетуваат на туниска територија


Тунис, 25 декември, 2017 - 10:09 (META) 

Тунис им забрани на авиокомпаниите од Обединети Арапски Емирати (ОАЕ), нивните авиони да слетуваат на туниска територија, соопшти денеска Министерството за сообраќај на Тунис.

Забраната следува два дена откако, туниската влада соопшти дека ОАЕ им забраниле на Тунижанките да слетуваат на нивна територија или ОАЕ да ја користат како транзитна земја, пренесуваат светските медиуми.

Од Министерство за сообраќај на Тунис велат дека, ги суспендирале летовите на компанијата „Емирејтс“, се додека компанијата не најде соодветно решение за летовите „во согласност со меѓународното право и договори“.

Тунис побара објаснување од амбасадорот во ОАЕ, кој известил дека, одлуката била краткорочна и рестрикциите повеќе не важеле.

И покрај тоа, групата за човекови права во Тунис ги осуди овие мерки и ги квалификуваше како „дискриминаторски и расистички“.


1,6 милиони патници патувале преку двата аеродрома во првите девет месеци


Скопје, 9 октомври, 2017 - 16:18 (META) 

Вкупно 1,6 милиони патници патувале преку двата аеродрома, „Александар Велики“ и „Св. Апостол Павле“, во првите девет месеци од 2017 година, што претставува годишен пораст од 12 проценти споредено со истиот период лани, известуваат од „ТАВ Македонија“.

Двата аеродрома од јануари до септември, опслужиле вкупно 13.752 летови, што е зголемување за 6 проценти на годишно ниво.

Според статистиките на „ТАВ Македонија“ за патничкиот сообраќај во првите девет месеци, најфреквентната дестинација од скопскиот аеродром е Истанбул (12,4 проценти), потоа следуваат Цирих (8,7 проценти), Виена (6,8 проценти), Базел (5,1 отсто), Малме (4,6 проценти) и Лондон (3,9 проценти).

Во однос на уделот на авиокомпаниите во патничкиот сообраќај, „Виз ер“ има превезено најголем број од патниците со 57,5 проценти пазарен удел, а потоа следуваат „Туркиш ерлајнс“ (8,5 проценти) и „Аустриан ерлајнс“ (6,8 проценти).

„Скопскиот аеродром годинава го имаше најпрометниот август досега, опслужувајќи 216.409 патници, со пораст од 23,7 проценти во патничкиот сообраќај и 22,4 отсто пораст во бројот на летови, достигнувајќи рекордни бројки во сообраќајот досега, што беше потпомогнато од спортскиот настан, Супер купот на УЕФА. Седми август – понеделник, бил најфреквентниот ден на аеродромот во Скопје во овој период од девет месеци, кога вкупно 8.283 патници беа превезени со 98 летови“, соопштуваат од „ТАВ Македонија“.


Американскиот секретар за здравство, љубител на луксузни авиони, поднесе оставка


Вашингтон, 30 септември, 2017 - 10:17 (META) 

Секретарот за здравство и социјална заштита на САД, Том Прајс поднесе оставка откако беше покрената истрага за неговите патувања со скапи чартер летови, кои го налутија претседателот Доналд Трамп.

„Секретарот за здравство и социјална заштита Том Прајс ја понуди оставката и претседателот ја прифати“, се наведува во соопштението на портпаролката на Белата куќа, Сара Сандерс. Изјавата ја дадоа помалку од еден час откако Трамп на новинарите им изјави дека Прајс не понудил да поднесе оставка, но дека неговата судбина ќе биде решена подоцна во петок.

Трамп изрази разочарување поради тоа што американскиот министер за здравство летал со  скапи приватни чартер летови при извршување владини обврски. Прајс имал 26 одделни патувања оваа година со приватни авиони, во вкупна вредност од околу 400.000 долари, наведува Политико.

– Не сум среќен, тоа можам да ви кажам, не сум задоволен – изјави Трамп вчера пред новинарите.

Министерот Прајс беше на функцијата помалку од осум месеци.


На двата аеродроми, зголемен број на патници за 10,5 отсто во однос на лани


Скопје, 15 септември, 2017 - 11:24 (META) 

Од двата аеродроми во Македонија, „Александар Велики“ во Скопје и „Св. Апостол Павле“ во Охрид, од јануари до август годинава превезени се вкупно 1.339.065 патници, што претставува зголемување од 10,5 проценти споредено со истиот период лани, информираат од Министерство за транспорт и врски.

На аеродромот „Александар Велики“ во Скопје, во истиот период биле регистрирани вкупно 1.223.630 патници, што во споредба со истиот период од лани, кога биле превезени 1.108.157 патници, претставува зголемување од 10,4 отсто.

На аеродромот „Св.Апостол Павле“ во Охрид за периодот од јануари до август 2017 година, биле превезени 115.435 патници, и во споредба со истиот период од 2016 година, кога биле превезени 113.431 патници, се бележи зголемување од 11, 6 проценти.

Најзастапени дестинации, според бројот на патници, за периодот јануари – август се Истанбул со 12,5 проценти, Цирих со 9 проценти, Виена со 6,6 проценти и Базел 5,1 отсто.


Беснее пожар на планината Ловќен, во опасност е мавзолејот на Његош


Подгорица, 16 август, 2017 - 14:09 (META) 

На планината Ловќен во Црна Гора, неколку дена беснее пожар, а од утринава ситуацијата е критична бидејќи огнената стихија се приближува кон мавзолејот на Петар Петровиќ- Његош, кој се наоѓа на врвот на планината, јавуваат црногорските медиуми.

Во гаснењето на пожарот пристигнала и војската, како и хеликоптери и авиони на Министерството за внатрешни работи.

Огнот е проширен на целата планина, а активни пожари има и во Подгорица.


Активни пожарите во Чашка, Македонски Брод и во Маврово – Ростуше


Скопје, 6 август, 2017 - 12:54 (META) 

Дирекцијата за заштита и спасување соопшти дека во 12 часот се регистрирани активни пожари во општините Чашка, Македонски Брод и Маврово – Ростуше. Ангажирани се два авиона, хеликоптери, 40 лица преку ДЗС во координација со „Македонски шуми“, како и месно население.

Во Чашка пожарот е кај селото Богомила, местото Бела Вода и во Урбанци, село Дреново. Пожарот е на терен непристапен за гаснење. Ангажирани се авионите на Дирекцијата за заштита и спасување и тој е локализиран. Авионите се упатени во селото Таор каде гори мешана шума.

Кај Македонски Брод пожарот е околу селото Калуѓерец и кај местото Сува Гора кај селото Волче, каде гори запалена сува трева и лисната постилка од борова шума.

Во општина Маврово – Ростуше регистриран е нов пожар на планината Бистра каде гори трева и смрека. На терен се лица од ЈП „Лопушник“.

Како што соопшти ДСЗ, изгаснати се пожарите кај кумановските села Проевце, Орашец, Слупчане и Умни Дол, во Беровско кај месноста Копан Поток, Маџила, село Будинарци и Кочански Рид, село Владимирово. Изгаснати се и пожарите кај гостиварската населба Грудеица и село Јеловце, охридското село Мраморец и кај неготинското село Челевец.

Од 7 часот авионите дејствувале на потегот Чашка, село Лисец и село Јаболчиште и тоа во четири налети. Во овој момент два авиони дејствуваат во село Богомила, Бела Вода.

Заклучно со вчерашниот ден, според ДСЗ, авионите вкупно имале 295 налети со 837 тони вода. Хеликоптерите се ангажирани во селото Дреново, кај месноста Урбанци.


СДСМ: Сите надлежни институции се на терен за побргу да се изгаснат пожарите


Скопје, 5 август, 2017 - 14:38 (META) 

Криминалното и расипничко владеење на Никола Груевски и на ВМРО-ДПМНЕ зад себе оставија нефункционален систем за справување со кризни ситуации, застарена и запуштена механизација и стара и дотраена опрема во службите задолжени за заштита, се вели во реакцијата на СДСМ на соопштението на ВМРО-ДПМНЕ.

Од партијата велат дека дури и авионите за гаснење на пожар не биле функционални сè до доаѓањето на новата власт.

„Сепак, дури и во такви тешки услови, сите ангажирани лица на терен, пожарникарите, припадниците на армијата и доброволците, заедно со надлежните министерства и институции, даваат сè од себе за што е можно побрзо локализирање и целосно гаснење на активните пожари, од кои за дел постои сомневање дека се подметнати намерно“, се вели во соопштението.

Од СДСМ порачуваат ВМРО-ДПМНЕ да ги остави надлежните институции да ја работат својата работа и да престане да шири паника помеѓу граѓаните.


Се разгоруваат пожарите на многу места во земјава, изгореа четири куќи


Скопје, 4 август, 2017 - 20:47 (META) 

Според најновите информации од Центарот за управување со кризи (ЦУК), состојбата со шумските пожари е алармантна и на многу места во земјава пожарите се разгоруваат. Во селото Могилец целосно изгореле четири куќи, а една е делумно оштетена.

Како што извести „ЕВН Македонија“, поради големите пожари во Богомила, Ореше, Папрадиште, како и планинарски дом Чеплес, сите корисници на општина Чашка ќе останат без струја подолг период. Екипи на „ЕВН Македонија“ се на терен и работат на санирање на 11 изгорени столбови и опрема кои се зафатени од огнената стихија, а помагаат и во гаснење на пожарот.

Според извештајот на ЦУК за состојбата до 18 часот, попладнево се појавил пожар кај скопското село Осинчани, за што испратена е пожарникарска екипа да интервенира. Пожар има и кај селото Јаболце, а пожар се појавил и над Волково. Гори и меѓу селата Бојане и Копаница.

Пожар кај селото Орешани и попладнево бил активен и ја поминал Орешанска Река и се доближува кон неколку штали кај селото Вражале. Со него е опфатена нискостеблеста шума од смрека. Исто така, има дојава дека пожарот на Матка повторно се активирал и ја сменил насоката кон Шишевски манастир.

Пожарот кај Барово брзо се разгорува и се заканува да ја зафати боровата шума кон Водно. Интервенира екипа од ЈП „Паркови и зеленило“.

За пожарот кај селото Моране дејствуваат екипи на скопската противпоарна бригада, кои исто така интервенираат и кај Долна Матка, Рашче, Елово и кај Никиштани.

Пожарот во атарот на селата Требовље и Растеш во општина Македонски Брод сè уште е активен и во гаснењето се вклучени АРМ, која ангажирала и два хеликоптера, како и дел од месното население и доброволци од Кичево, Прилеп и од Скопје.

Пожарот од атарот на Растеш се проширил на атарот на селото Волче, а постои голема опасност да се прошири во атарот на Битово и на Заград.

Повторно се активирал и пожарот во атарот на селото Близанско и се движи кон месноста Фојник.

На пожарот во селото Девич ангажирани се лица од Шумското стопанство „Сандански“ – Македонски Брод, кои го контролираат пожарот. Горните куќи во Девич не се загрозени.

На пожарот во атарот на селото Могилец интервенираат пожарникарите од Македонски Брод, лица од месното население и лица од Шумското стопанство „Сандански“. Пожарот се шири кон атарите на селата Клуќерец и Инче, како и кон атарот на селото Модриште. Гори дабова и борова шума. Од 17 часот интервенираат и два авиона на Дирекцијата за заштита и спасување. Во селото Могилец опожарени се две напуштени дотраени куќи, како и три куќи во кои живеат луѓе од селото и една куќа е делумно оштетена.

Во Пелагонискиот Регион, активен е пожарот на атарот на селото Подвис. Гори нискостеблеста деградирана дабова шума, сува трева и стрништа. Поради високата температура, правецот на ветерот и непристапноста на теренот отежнато е гаснењето. Пожарот се шири од  пределот по ридот кон селото Алданци.

Пожарот во атарот на селата Дрен и Смолани, е активен и веќе се проширува на горниот дел на планината. Зафатена е претежно ниско стеблеста дабова шума, чалија, смрека.

Во Тетовскиот Регион активни се два шумски пожари, Едниот над селото Копанце, каде гори сува трева и ситна деградирана шума на планината Жеден. По сртот на планината, тој се шири кон селото Туденце, како и кон селото Бојане.

Во атарот на селото Гургурница активен е пожарот во кој гори сува трева и пасишта. Во гаснењето учествуваат лица од месното население.

Во општина Гостивар, активен е пожарот во атарот на селото Корито, каде нема можност да се интервенира.

Во Повардарскиот Регион, активен е пожарот во атарот на селото Дреново, а се појавиле и два нови пожари. Огнената стихија полека се движи кон планината Лисец.

Пожарот во атарот на селото Богомила кој се закануваше да ги зафати манастирот „Свети Спас“ и селото е изгаснат со помош на авионите на ДЗС. Другиот дел од пожарот е активен и се движи кон прилепска страна.

Пожарот на падините на Горна Јакупица е активен, а теренот е непристапен за гасење.