!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Гешковска: Сè во врска со „Монструм“ беше направено по закон и со докази


       
Скопје, 4 октомври, 2017 - 12:24 (META) 

Сè во врска со обвинението за случајот „Монструм“ беше направено според закон и врз основа на докази, вели за „Мета“, обвинителката Гордана Гешковска, која го застапуваше обвинението за петкратното убиство кај Смиљковско Езеро.

Гешковска не сакаше да го коментира барањето на Јавното обвинителство за укинување на пресудите на Кривичниот и на Апелацискиот суд и за враќање на случајот „Монструм“ на повторно судење, додавајќи дека за тоа треба да одлучи Врховниот суд, кој го има последниот збор.

– Јас, како обвинител, постапував во тој предмет и направив сè врз основа на докази и според закон. Сè е направено како што треба и по закон. За случајот имаше првостепена пресуда, која беше потврдена од петчлен совет на второстепениот суд – вели Гешковска.

Таа додава дека обвиненијата по закон подлежат и на контрола и на оценка од судот.

– Како и за секој друг предмет, судот одлучува дали обвинителниот акт е во ред и дали е заснован на докази – нагласува обвинителката.

Инаку, Гордана Гешковска беше обвинител во Основното јавно обвинителство за гонење организиран криминал и корупција по што стана шеф на Основното јавно обвинителство Скопје и заменик на поранешниот државен јавен обвинител, Марко Зврлевски, кој беше разрешен неодамна. Четиригодишниот мандат на Гешковска како шеф на ОЈО Скопје истече во мај годинава, но сè уште не е избран нејзин наследник.

Бурни реакции во јавноста предизвикаа завршните зборови на Гешковска на крајот на судењето за случајот „Монструм“.

– Не е случаен денот Велики четврток, кога се случи убиството кај Смиљковци. Намерата била да се убијат само машки млади лица од македонска националност и христијани. Пораката е – пукаме на Велики четврток. Заклучок – за да ви биде крвав Велигден. За да ви ја уништиме верата. Пукаме во машки млади луѓе за да ви ја уништиме нацијата. Заклучок – пукаме во иднината на државата. Зарем ова не говори доволно за мотивот за извршување на кривичното дело и за намерата да се предизвика чувство на страв и на несигурност кај граѓаните – рече Гешковска во завршните зборови на крајот на мај 2014 година.

Од скопскиот Кривичен суд на прашање на „Мета“ кој е нивниот став во врска со барањето за укинување на пресудата и за враќање на предметот на повторно судење, кратко изјавија дека Основниот суд Скопје 1, во согласност со законските одредби „ќе ја почитува одлуката на Врховниот суд, без разлика како ќе одлучи во врска со конкретниот предмет“.