Лидерот за Социјалдемократскиот сојуз на Македонија (СДСМ), Зоран Заев, нема да се појави во Скопскиот кривичен суд ни следниот понеделник, на 7 септември, за кога е закажан почетокот на судскиот процес за случајот „Пуч“, изјави за „Мета“ портпаролот на СДСМ, Петре Шилегов.
– Нема ретирирање од ставот кој е соопштен претходно – соопшти кратко Шилегов.
Лидерот на опозицијата уште на почетокот на јули, кратко по соопштувањето на терминот за почетокот на главниот претрес за „Пуч“, на прес-конференција соопшти дека не го признава и нема да ја почитува одлуката на судот за случајот „Пуч“. Тој тогаш соопшти дека нема да ја почитува мерката на претпазливост што му ја одреди судот, секој понеделник да се јавува во струмичкиот суд, како и дека нема да се јавува на закажаните рочишта по предметот.
Заев, истовремено, изјави дека, поради неговата одлука, судот во секое време може да издаде налог за негово апсење и за одредување мерка притвор.
Почетокот на главниот претрес за „Пуч“ првично беше закажан за 5 август, но беше одложен бидејќи во судницата не се појави лидерот на опозицијата, кој е четвртообвинет во случајот.
Од СДСМ сметаат дека случајот „Пуч“, како и истрагата за наводите што произлегуваат од содржината на разговорите од аферата „Прислушување“, треба да бидат предмет на работа на специјалниот јавен обвинител, за чие назначување во моментот преговараат четирите партии потписнички на Договорот од Пржино.
Во овој контекст, на 5 јуни, адвокатот на Заев, Филип Медарски, пред судот рече дека треба да се даде подолг рок за почеток на судењето бидејќи „во меѓувреме бил постигнат Договорот од Пржино, според кој, овој случај ќе го преземе специјален јавен обвинител“.
Сепак, на ова претседавачот со Судскиот совет, судијката Љубинка Башевска, реплицираше дека „не работи според договор, туку според закон“.
Од судот тогаш соопштија дека на Заев ќе му биде испратена нова покана за да се јави на закажаното рочиште. Доколку лидерот на опозицијата повторно не се појави, судот ќе одлучува околу негово евентуално приведување.
Во случајот „Пуч“, покрај Заев, обвинети се и поранешниот директор на Управата за безбедност и контраразузнавање (УБК), Зоран Верушевски, неговата сопруга, Соња Верушевска, Бранко Палифров, службеник во Општина Струмица, и фунционерот во МВР, Ѓорѓи Лазаревски. Тие, според обвинението, се товарат за кривичните дела шпионажа, неовластено прислушување и тонско снимање и насилство на претставници на највисоките државни органи.
