Украина денеска ја одбележува 30-годишнината од катастрофата во нуклеарната централа во Чернобил. Одбележувањето почна рано утрово, со симболично огласување на сирените во исто време кога на 26 април 1986 година се случила првата експлозија во нуклеарниот реактор.
Несреќата во централата и топењето на реакторите во Чернобил остануваат запаметени како најтешката нуклеарна катастрофа во историјата на човештвото.
Неконтролираната реакција го разнела покривот на централата, исфрлајќи облак од радиоактивен материјал кој се рашири надвор од границите на Украина, во Русија, Белорусија и низ поголемиот дел на Источна Европа.
Роднини на загинатите во катастрофата запалија свеќи и одржаа бдеење во неколку цркви низ земјата, вклучувајќи ги и главниот град Киев и Славутич, град изграден за сместување на работниците од Чернобил.
Дел од поранешните жители на Чернобил денеска ја посетуваат напуштената и обрасната со шуми област во близина на централата.
„Едвај си го најдов станот, кој сега е шума – дрвја растат низ патеките и на покривите. Сите соби се празни, стаклото го нема од прозорците и сè е уништено“, изјавила 66-годишната Зоја Перевошченко за светските агенции.
Нивото на радиоактивност и понатаму останува високо во околната Чернобил. Голем број бебиња сè уште се раѓаат со тешки деформитети, а невообичаено висока стапка луѓе имаат ретки форми на рак.
