Откако Македонија се крена на нозе во одбрана на уставниот поредок, државноста и на законите, ВМРО-ДПМНЕ очајнички се обидува да избега од одговорноста за антидржавната одлука на Ѓорге Иванов, реагираат од СДСМ на соопштението на ВМРО-ДПМНЕ, во кое владејачката партија предлага сите партии да испратат писмо до Иванов со барање да ја преиспита одлуката за помилувањето.
Од опозицијата велат дека граѓаните знаат дека Никола Груевски е нарачателот на одлуката на Иванов.
„Кризата во Македонија ја создаде токму криминалната банда, која не само што ги крадела парите на граѓаните туку и нивните гласови преку криминален избирачки список и бројни злоупотреби. ВМРО-ДПМНЕ не може да ги лаже граѓаните. Бидејќи Иванов и Груевски се тим, ВМРО-ДПМНЕ и Никола Груевски нека го повикаат Иванов да ги поништи, односно да ги отповика сите одлуки за помилување. Идентично како што ја поништи аболицијата за Ламбе Арнаудов, поради „техничка грешка“. Ставот на СДСМ е јасен уште од почеток: поништување на сите одлуки за помилување донесени на 14 април 2016 година и одговорност на сите за сторениот криминал“, пишува во соопштението на СДСМ.
Од партијата велат дека нивниот лидер прв јавно ја отфрлил аболицијата и повикал на поништување на одуката. Од СДСМ дополнуваат дека во Македонија не смее да има „недопирливи граѓани“ и „обични граѓани од втор ред“.
