Штипската полиција привела ученик од гимназијата „Славчо Стојменски” откако тој вчера на социјалната платформа Инстаграм објавил заканувачка порака. СВР Штип потврди дека 18-годишниот Б.Д. е приведен и дека е информиран јавен обвинител.
Според соопштението на СВР Штип, се преземаат мерки за расчистување на случајот.
Директорот на училиштето, Марјан Арсов, за медумите изјави дека училишните служби разговарале со ученикот и со неговите родители. Арсов истакна дека пријавениот случај предизвикал моментална реакција и биле преземени сите достапни мерки, а наставата во училиштето се одвива според редовниот распоред.
„Апелираме до родителите совесно да ги пуштат децата на училиште и дека сè ќе биде во најдобар ред. Ова е прва ваква објава на социјалните мрежи од страна на ученик во Штип“, рече Арсов.
По масакрите во Србија кои се случија минатата недела, во кои беа убиени 17 луѓе од кои поголем број деца, во регионот, а и кај нас, зачестија инциденти во кои деца и млади повикуваат на насилство.
Вчера, како што соопшти Министерството за внатрешни работи, 11-годишни деца од Тетово завршиле во полициска станица откако во училишниот тоалет оставиле лист со испишани имиња на нивни соученици и закани кон нив.
Ученичка во „Кочо Рацин“ направила список со соученици кои сака да ги повреди
Еден ден пред тоа, градоначалникот на Општина Центар, Горан Герасимовски, ги свика на состанок сите директори на училишта, откако во полициската станица Центар во Скопје во присуство на стручен тим од Центарот за социјални работи и неговите родители, беше извршен службен разговор со 12-годишен ученик од основно училиште „Кочо Рацин“, по добиена пријава дека додека бил на час на кој се разговарало за случајот во соседна Србија, почнал да пишува имиња на ученици.
Немилите настани во Србија повторно го вклучија алармот за начинот на кој младите ги користат социјалните мрежи. Во Македонија беше предложена и забрана или ограничување на социјалната мрежа ТикТок, но засега нема конкретни одлуки.
