По осумдневната полициска потрага, во полициската станица во Тетово вчера попладне сам се пријавил 17-годишниот малолетник кој учествуваше во нападот на полицајците, што се случи во близина на центарот на Тетово.
– Малолетникот, син на 40-годишниот И.И. и внук на 69-годишниот А.И., кои на полицајците им нанесоа тешки телесни повреди, е осомничен за соизвршителство во напад на службено лице при вршење работи на безбедноста и ќе биде изведен пред судија за малолетници во Основниот суд во Тетово – рече портпаролот на СВР Тетово, Марјан Јосифовски.
За истото дело осомничен е и 36-годишниот Е.Ј., кој беше приведен уште минатиот петок, додека А.И., осомничен за обид за убиство, и И.И., осомничен за напад на службено лице при вршење работи на безбедноста, сами се пријавија во полиција во средата. За сите три лица определен е притвор во траење од 30 дена.
Нападот врз полициските службеници се случи при обид да биде уапсен 40-годишниот И.И. поради одлежување затворска казна. Во инцидентот двајца полицајци добија тешки телесни повреди. Едниот од нив е во животна загрозувачка состојба. Тој од лицето А.И. беше нападнат со железна прачка, при што му беа нанесени повреди на главата и по телото.
